Kita kana matundu ri jaꞌi pomarenta
13
Butu mbaꞌa tau kana matundu ri jaꞌi pomarenta, sabana daꞌa ria topoparenta to daꞌa nombarata kuasana nggari jaꞌi Alatala. Pura-pura topoparenta to naria weꞌi-weꞌi nipakakuasa Alatala.
2 Etu sampe tau to nangewa pomarenta nangewa nuapa to nipakatantu Alatala mboto. Pade tau noinggu iwetu natantumo kana rasuku.
3 Pomarenta daꞌa paraluu rapokaeka ntau to noinggu nabelo. Aga tau to noinggu najaꞌa to masipato maeka ri jaꞌi pomarenta. Jadi ane komi madota matuwu ante daꞌa ria eka rara ri jaꞌi pomarenta, kawiamo to nabelona pade komi kana ratoiya ntopoparenta.
4 Sabana topoparenta batua nu Alatala to nokarajaa mompakabelo katuwuta. Tapi ane komi mowia kajaꞌana, natantumo komi kana maeka ri jaꞌi ira, sabana naria mami kuasa ira mombasuku tau najaꞌa. Ira batua nu Alatala to mompakawela pesuku Alatala ka tau-tau to mowia kajaꞌana.
5 Etu sabana kita masipato mekou ri jaꞌi pomarenta. Kita mekou ri jaꞌi ira ala kita daꞌa mawela pesuku. Tapi daꞌa aga etu, kita woꞌu mekou ri jaꞌi ira sabana pekiri rara ntaꞌita mboto nompakanoto ka kita etu masipato rapowiata.
6 Etu woꞌu sampe kita masipato mombabayari balasitee, sabana topoparenta batua nu Alatala to nipakatantu mantui bago etu woꞌu.
7 Wai ka pura-pura pomarenta nuapa to masipato rawai ka ira. Bayarimo balasitee ka ira to nipakatantu mantarima balasitee. Pade bayarimo bea ka ira to nipakatantu mantarima bea. Pekoumo ri jaꞌi ntau to masipato rapekou, bo bilamo tau to masipato rabila.
Kita kana mosipotowe sabana namosumo karata i Pue Yesus bali ri dunia
8 Neꞌe kita moinda nuapa-nuapa ka tau ntanina, tapi kita kana tunggai mosipotowe sambaꞌa bo sambaꞌa. Aga etu inda to masipato ka kita. Sabana isema-sema to nosipotowe, batuana ira natundu riara pura-pura Atura agama.
9 Riara Atura etu naria parenta-parenta iweꞌi: “Neꞌe mogau sala ante tau daꞌa rongomu mboto, neꞌe mepatesi, neꞌe mangangga, neꞌe maino manggita anu roamu.” a Parenta etu pura-pura bo parenta-parenta ntanina woꞌu nesua riara saongu parenta, etumo: “Potowemo sanggamanusiamu nasimbayu ewa komi nompotowe koromu mboto.” b
10 Isema-sema nompotowe sanggamanusiana, natantumo iꞌa daꞌa mompowia kajaꞌana ka ira. Jadi ane kita mompotowe sanggamanusiata batuana kita matundu riara pura-pura Atura agama.
11 Kita masipato mosipotowe iwetu sabana ninjanita tempo weꞌi-weꞌi namosumo karata i Pue Yesus bali ri dunia. Kita kana manoto rara bo mainga, sabana karata i Pue Yesus namosupa weꞌi-weꞌi pade tempo kita nompamula nomparasaya.
12 Tempo narumau ntora naopumo. Namosumo tempo nareme. Jadi etu sampe kita kana manggabasaka pokainggu-pokainggu to narumau bo mompake parewa mposibali to masipato ka tau natuwu riara karemena.
13 Kita kana matuwu ante pokainggu to masipato ka tau to natuwu riara karemena. Neꞌe kita masiromu manggoni mpebasa bo manginu sampe malangu. Neꞌe kita mogau sala ante tau daꞌa rongota mboto atau mompebasa-basa mantuki dota rarata to najaꞌa. Neꞌe kita mosinggarau atau masiriati.
14 Tapi pasialamo pokainggu Pue Yesus Kristus riara nggatuwuta, neꞌe mana mompiara bo mantuki dota rara to najaꞌa.