POKAINGGU TO MASIPATO KA TOPOMPARASAYA I PUE YESUS (12:1-15:13)
12
Sampesuwu-sampesuwu, naasi mpuꞌu mata Alatala manggita kita. Sabana etu kuperapi ante mpuꞌu-mpuꞌu ala komi mombajuju koro komi ka Alatala ewa sangele pesomba to natuwu bo nagasa to nikonoa rara Alatala. Etumo ada mpesomba komi to masipatona.
2 Neꞌe mana komi mompasiala pokainggu bo kabiasa nu dunia, tapi pakambamo katuwumu rabali Alatala ante mombawai pekirimu rapakabouna. Ante iwetu komi kana mangginjani nuapa dota Alatala riara nggatuwumu, etumo nuapa to nabelona, nuapa to nikonoa Alatala, bo nuapa to daꞌa nasala riara mpanggitana.
Pompakule to niwai Alatala kana rapaketa mantulungi todea topomparasaya
3 Aku nionggotaka Alatala najadi surona nggari towe belona mboto. Jadi etu sampe aku manguli ka komi pura-pura iweꞌi: Neꞌe komi mompakalanga rara ane mompekiri koromu mboto. Tapi nabelopa komi mompekiri koromu ante manoa nantuki kadea nu pomparasaya to niwai Alatala ka komi sambaꞌa bo sambaꞌa.
4 Ri korota sambaꞌa bo sambaꞌa nadea sipa, pade sipa etu pura-pura naria gunana mboto.
5 Iwetu woꞌu kita topomparasaya Kristus. Naupa kita nadea, kita najadi saongu riara Kristus. Pade kita nosidai sambaꞌa bo sambaꞌa ewa sipa-sipa nu koro.
6 Kita sambaꞌa bo sambaꞌa niwai ka pompakule to nosisala nantuki towe belo nu Alatala, tapi pura-pura pompakule etu naria gunana mboto. Jadi ane kita niwai ka pompakule mompasimbayu tesa nggari jaꞌi Alatala, kita kana mompowia etu nantuki pomparasaya to naria ri jaꞌita.
7 Ane kita niwai ka pompakule mantulungi tau ntanina, kita kana mpuꞌu-mpuꞌu mantulungi ira. Ane kita niwai ka pompakule mopaguru, kita kana mopaguru ante mpuꞌu-mpuꞌu.
8 Ane kita niwai ka pompakule mompakaroso rara tau ntanina, kita kana mpuꞌu-mpuꞌu mowia etu. Ane kita niwai ka pompakule mombawai ka tau ntanina, kita kana mombawai ante majoi rarata. Ane kita niwai ka pompakule manggeniaka todea, kita kana manggeniaka ira ante mpuꞌu-mpuꞌu rarata. Ane kita niwai ka pompakule mompopokita asi mata ri jaꞌi ntau to nandasa, kita kana mowia etu ante madamba rarata.
Pokaingguta kana mabelo ri jaꞌi pura-pura tau
9 Kita kana mompotowe roata ante mpuꞌu-mpuꞌu. Neꞌe aga tumoni-moni mosipotowe. Pakakawaomo pokainggu to najaꞌa, pade powiamo to nabelona ante mpuꞌu-mpuꞌu rara.
10 Posipotowemo sambaꞌa bo sambaꞌa ewa sampesuwu otemu, pade pasimbukumo komi sambaꞌa bo sambaꞌa mokolu mombabila roamu.
11 Pokarajaamo ante maraji, neꞌe mabuto. Pade pokarajaamo ka i Pue ante mpuꞌu-mpuꞌu raramu, neꞌe mabasa-basa.
12 Komi kana madamba-damba riara panjarumakamu ka i Pue. Pakaroomo raramu tempo komi nipandasa. Neꞌe mabasa mosambaya.
13 Tulungimo roamu topomparasaya to nakabuna, pade tarimamo torata riara njapomu.
14 Ane maria tau mompandasa komi, neꞌe mombajanjiaka ira tapi perapimo ka ira rasi nggari jaꞌi Pue.
15 Komi kana madamba-damba mpasanggani-nggani ante tau to nadamba, bo motumangi mpasanggani-nggani ante tau to notumangi.
16 Komi kana matuwu mosaongu rara sambaꞌa bo sambaꞌa. Neꞌe mompakalanga raramu, tapi komi kana mosimporoa ante tau to naede katuwuna. Neꞌe mompekiri koromu neliu nggapande nggari roamu.
17 Ane maria tau mompakajaꞌa komi, neꞌe rabalasi ante kajaꞌana. Kawiamo nuapa to nireke nabelo riara mpanggita ntau pura-pura.
18 Ane mamala nggari komi, pasimbukumo matuwu mosinggabelo ante pura-pura tau.
19 Sampesuwu-sampesuwuku, neꞌe mombabalasi kajaꞌa ntau ri jaꞌimu, tapi pakambamo Alatala mombabalasi ira to nompakajaꞌa komi. Sabana naria nitulisi riara Buku Nagasa iweꞌi:
“Akumo to mebalasi,
Akumo to mesawa.
Iwetu panguli i Pue.” (Ul. 32:35)
20 Tapi ane balimu maoro taꞌi, wai ka ira panggoni. Ane ira mabai tambolo, wai ka ira panginu. Sabana ante mowia iwetu, kaopuna maeya mboto mata ira mompekiri powia ira to najaꞌa.
21 Neꞌe sampe komi radagi kajaꞌana, tapi balasimo kajaꞌana ante pokainggu to nabelo ala komi mamala mombadagi to najaꞌana ante kabelona.