Sabagia nggedi to Israel nomparasaya i Pue Yesus, tapi to nadeana nompakakoꞌo rara
11
Jadi aku nekutana iweꞌi: “Alatala nompoara todeana to Israel?” Natantumo etu daꞌa ntoto nakono! Sabana aku mboto tau to Israel, muli Abraham to nipomuli i Benyamin.
2 Alatala daꞌa ntoto nompoara todeana to nipelisina nggari lamba pamulana. Tantu ninjani komi mbotomo tesa nggari Buku Nagasa ewa nabi Elia. Iꞌa nompangadu to Israel ri ngayo Alatala iweꞌi:
3 “Pue, nabi-nabimu nipatesi ira, bo petoꞌo pesomba ka Pue nigero iramo. Damo njambaꞌaku eꞌi topomparasaya to nabolina, pade ira nompasimbuku mompatesi aku.” a
4 Tapi nuapa to niuli Pue ka iꞌa? Niulina, “Danaria pitunjobu mbaꞌapa to niboliku najadi bagiaku mboto. Ira daꞌa sanggani nekadede mombasomba wiata Baal.” b
5 Iwetu woꞌu tempo weꞌi-weꞌi. Danaria sabagia nggedi nggari to Israel to nomparasaya i Pue Yesus. Iramo to nipelisi Alatala nantuki towe belona mboto.
6 Ira nipelisina nantuki towe belona mboto, daꞌa nantuki pokainggu ira to nabelo. Sabana ane ira nipelisi nantuki pokainggu ira mboto, batuana towe belo Alatala etu daꞌa towe belona mpuꞌu. Etu aga pombabalasi pokainggu ira to nabelo.
7 Jadi iwenumo? Todea to Israel daꞌa nombarata kabelona to nielo ira. Aga sabagia nggedi to Israel to nombarata kabelona etu pade najadi nanoa riara mpanggita Alatala, etumo ira to nipelisi Alatala nggari lamba pamulana. Pura-pura tau to Israel ntanina aga nompakakoꞌo rara.
8 Etu ewa to nitulisi riara Buku Nagasa iweꞌi:
“Alatala nompakabungu pekiri bo rara ntaꞌi ira.
Iꞌa nompakaburo mata ira
sampe ira daꞌa namala manggita jala to nakonona.
Pade Iꞌa nompakabongo talinga ira
sampe ira daꞌa namala nangepe pepatuduki to nakonona sampe ri eo eꞌi.” (Ul. 29:4, Yes. 29:10)
9 Pade Magau Daud woꞌu nanguli iweꞌi:
“Pue, waikamo rasi to naria ri jaꞌi ira majadi ewa talia manjoko ira,
sampe ira mpuꞌu-mpuꞌu rasuku.
10 Waikamo mata ira maburo
sampe daꞌa mamala ira manggita jala to nakonona.
Pade pakandasamo ira ante katomona
sampe ira mabunggu sampe ri kasae-saena.” (Mzm. 69:23-24)
Silaka to Israel nompoara Kristus nombabuka jala ka tau-tau daꞌa to Yahudi ala rapakasalama
11 Jadi sangganipa kupekutana, “Iwenumo? Tau-tau to Israel nanawu riara silaka sampe ri kasae-saena?” Natantumo daꞌa! Tapi nggari silaka ira tau-tau daꞌa to Yahudi nombarata loga rapakasalama. Ante manggita kajadia etu tau-tau to Israel kana masiriati ka tau-tau daꞌa to Yahudi.
12 Nggari silaka tau-tau to Israel etu, tau-tau ntanina ri dunia nombarata rasi nadea. Pade nggari kanawu ira, tau-tau daꞌa to Yahudi nombarata belo. Jadi ane iwetu to najadi sabana tau-tau to Israel daꞌa nomparasaya, natantumo neliu nggadea rasi nggari jaꞌi Alatala ane ira pura-pura majea bo momparasaya.
13 Tesaku eꞌi kupawela ka komi tau-tau daꞌa to Yahudi. Aku suro i Pue Yesus to nisurona manggeni Kareba Belo ka komi tau-tau daꞌa to Yahudi. Bagoku eꞌi mpuꞌu-mpuꞌu nitesaku ka tau pura-pura
14 ante manjarumaka aku mamala mompakaino rara sampesuwu-sampesuwuku to Israel sampe maria ira to madota momparasaya bo rapakasalama.
15 Jadi tempo ira nipoara Alatala jala nibuka ka pura-pura tau ntanina ri dunia ala mosinggabelo ante Iꞌa. Pade neliupa kabelona ane tau to Israel ratarimana bali. Natantumo kajadia etu masimbayu ewa tau namate matuwu bali!
Porapa ewa kayu zaitun
16 Ane asele ntanata pamulana niwai ka Alatala, batuana pura-pura asele ntanata woꞌu bagiana. c Pade ane kale nu kayu nireke bagia nu Alatala, batuana rangga-ranggana woꞌu bagiana.
17 Tau-tau to Israel to nipoara Alatala namala nirapaka ewa rangga-rangga kayu zaitun to nikoto bo nitajiaka. Pade komi tau-tau daꞌa to Yahudi to nomparasaya Yesus nirapaka ewa rangga-rangga kayu zaitun nggakayu to nipataka ri walea rangga-rangga to nikoto etu ri olo rangga-rangga kayu zaitun to nipiara. Pade komi woꞌu nombarata rasi bo belo to niwai Alatala ka tau-tau to Israel nggaolu nasimbayu ewa rangga-rangga to nipataka mombarata panggoni nggari kale kayu zaitun to nipiara.
18 Jadi sampesuwu-sampesuwu daꞌa to Yahudi, neꞌe komi masombo manggita tau to Israel to nipoara ewa rangga-rangga to nikoto etu. Toramo! Komi aga ewa rangga, pade daꞌa rangga to nompakatuwu kale, tapi kale to nompakatuwu rangga.
19 Bara maria ri tatongo komi to manguli iweꞌi: “Rangga-rangga etu nikoto ala kami mamala rapataka.”
20 Etu nakono, tapi toramo! Ira nipoara sabana ira daꞌa nomparasaya, pade komi nitarima sabana komi nomparasaya. Tapi naupa iwetu neꞌe komi masombo, agina komi maeka ka Alatala!
21 Sabana ane naliu rara Alatala nompoara tau-tau to Israel to nirapaka ewa rangga kayu, natantumo Iꞌa woꞌu maliu rarana mompoara komi ane komi daꞌa momparasaya!
22 Jadi nggari setu nanotomo ka kita kabelo nu rara Alatala bo kakoꞌona mombasuku. Iꞌa nakoꞌo nombasuku tau-tau to Israel to daꞌa nomparasaya, tapi Iꞌa nabelo rara ri jaꞌi komi to nomparasaya ane komi maroo manjarumaka kabelona etu. Tapi ane daꞌa, komi woꞌu kana rapoarana.
23 Ane ira tau-tau to Israel mana manjapuaka Alatala tapi majea bo momparasaya, ira woꞌu kana ratarima Alatala bali. Sabana Iꞌa nakuasa mantarima ira mpanjili.
24 Komi tau-tau daꞌa to Yahudi nasimbayu ewa rangga-rangga kayu zaitun nggakayu. Ane komi namala rakoto nggari batanggayu pade rapataka ri kayu zaitun to nipiara naupa etu nontani nggari biasa, neliu-liupa ira to Israel to nasimbayu ewa rangga-rangga kayu zaitun to nipiara. Natantumo ira namala rapataka mpanjili ri batana mboto!
To Israel woꞌu kana rapakasalama
25 Sampesuwu-sampesuwu, to nipodotaku ala komi mangginjani sangele to nitabuniaka nggari lamba pamulana sampe weꞌi-weꞌi. Tesa eꞌi kuuli ka komi ala neꞌe komi mompakalanga rara ante mompekiri komi nangginjani mpengele-ngele. Tesa to nitabuniaka etumo iweꞌi: Sabagia nggari tau to Israel nompakakoꞌo rara weꞌi-weꞌi, tapi ira aga moinggu iwetu sampe maganamo tau-tau daꞌa to Yahudi to nipakatantu Alatala momparasaya i Pue Yesus.
26 Jadi ane etu majadi, pura-pura tau to Israel woꞌu kana rapakasalama. Kajadia etu nosinggawela ante tesa Alatala riara Buku Nagasa iweꞌi:
“Magau to Mompakasalama kana marata nggari Bulu Sion,
pade Iꞌa kana mompakalipo pura-pura kajaꞌana nggari muli Yakub. (Yes. 59:20)
27 Pade Aku kana mombaampungi silaka-silaka ira
nantuki pojanjiku ka ira nggaolu.” (Yer. 31:33-34)
28 Ri tempo weꞌi-weꞌi tau-tau to Israel najadi bali nu Alatala sabana ira daꞌa madota momparasaya Kareba Belo. Pade etumo to nanggeni rasi ka komi tau-tau daꞌa to Yahudi. Tapi naupa iwetu, tau-tau to Israel danipotowe Alatala, sabana Iꞌa nompelisi ira nggaolu najadi todeana, pade Iꞌa bate-batena nantora pojanjina ka totuꞌa ira nggaolu.
29 Sabana ane Alatala mompakatantu mompelisi bo mombawai rasi ka tau, Iꞌa daꞌa mombabali katantuna etu.
30 Tempo nokolu komi tau-tau daꞌa to Yahudi daꞌa natundu ri jaꞌi Alatala. Tapi tempo tau-tau to Israel daꞌa natundu ri jaꞌi Alatala komi nipoasi matana.
31 Iwetu woꞌu tau-tau to Israel. Weꞌi-weꞌi ira daꞌa natundu ri jaꞌi Alatala ala komi rapoasi matana. Tapi kana marata tempona banepia ira woꞌu rapoasi mata Alatala nasimbayu ewa komi.
32 Sabana Alatala nompakamba pura-pura manusia daꞌa natundu ri jaꞌina, ala Iꞌa mamala mompopokita asi matana ka ira pura-pura banepia.
Alatala masipato ratoiyata sabana kabelo nu rarana ka manusia
33 O, nabete mpuꞌu kabelo nu Alatala! Iꞌa mpuꞌu-mpuꞌu nanoto bo pangginjanina daꞌa ria pantaꞌana! Daꞌa ria sambaꞌa to namala mompakanoto katantuna! Daꞌa ria to namala mangginjani pura-pura niana.
34 Riara Buku Nagasa naria nitulisi iweꞌi:
“Isema nangginjani pekiri Alatala?
Isema mamala mompatuduki Iꞌa? (Yes. 40:13)
35 Isema nombawai sangele ka Iꞌa
sampe Iꞌa masipato mompopatingguli ka ira balasina?
Natantu daꞌa ntoto ria!” (Ayb. 41:11)
36 Sabana pura-pura nuapa to naria nopuꞌu nggari jaꞌi Alatala pade natuwu nggari kuasana bo najadi bagiana mboto. Iꞌamo to masipato ratoiya bo rabilata sampe ri kasae-saena! Amin!