10
Sampesuwu-sampesuwu, dota raraku bo posambayaku ka Alatala ala tau-tau to Israel mamala rapakasalama.
2 Ninjanikumo ira mpuꞌu-mpuꞌu naraji mepue ka Alatala, tapi daꞌa ninjani ira jala to nakono mepue ka Iꞌa.
3 Daꞌa nitarima ira jala to nipakasadia Alatala ka manusia ala majadi manoa riara mpanggitana. Ira daꞌa natutu nantuki jala etu sabana ira aga nompasimbuku mompakanoa koro ira mboto riara mpanggita Alatala ante nantuki Atura-atura agama to nipapola i Musa.
4 Tapi ante karata Yesus Kristus, Atura-atura agama mana nalaku pade weꞌi-weꞌi isema-sema momparasaya i Pue Yesus kana rareke manoa riara mpanggita Alatala.
Isema-sema mompangaku i Pue Yesus kana rapakasalama
5 Naria tesa to nitulisi nabi i Musa ewa jala majadi manoa riara mpanggita Alatala ante mantuki Atura-atura agama. Niulina iweꞌi:
“Isema-sema to nantuki pura-pura atura agama,
ira kana mombarata katuwua mabelo.” (Im. 18:5)
6-7 Tapi naria tesa ntanina riara Buku Nagasa ewa jala majadi manoa riara mpanggita Alatala ante momparasaya. Iweꞌimo tesa etu, “Neꞌe mompekiri riara ntaꞌimu iweꞌi: Isema mamala meore mpaka ri suruga? Isema mamala manaꞌu ri dunia ntomate?” a Daꞌa paraluu kita meore mpaka ri suruga mangelo Kristus, sabana naratamo Iꞌa ri jaꞌita ri dunia. Pade daꞌa paraluu kita manaꞌu mpaka ri dunia ntomate manggeni Kristus nggari setu, sabana natuwu balimo Iꞌa nggari kamatena. Kakonona majadi manoa riara mpanggita Alatala ante momparasaya daꞌa sangele to nakaja.
8 Tapi iweꞌimo to nitesa riara Buku Nagasa:
“Namosumo Tesa i Pue ante komi,
naria ri sumbamu
bo naria woꞌu riara ntaꞌimu.” (Ul. 30:14)
Etumo tesa to nipatolele kami to nanggeni tau momparasaya.
9 Jadi ane komi mompangaku ante sumbamu, “Yesus Iꞌamo Pueku,” pade ane komi momparasaya riara ntaꞌimu Alatala nompakatuwu bali Iꞌa nggari kamatena, komi kana rapakasalama.
10 Sabana kita momparasaya riara ntaꞌita sampe majadi manoa riara mpanggita Alatala, pade kita mompangaku ante sumbata sampe rapakasalama.
11 Riara Buku Nagasa naria nitulisi iweꞌi: “Isema-sema to momparasaya Iꞌa daꞌa rapakaeya.” b
12 Tesa-tesa eꞌi nosinggawela ka pura-pura tau sabana daꞌa ria posisalana ri olo ntau to Yahudi bo tau daꞌa to Yahudi. Aga sambaꞌa lau Pue, pade Iꞌa Pue ntau pura-pura. Iꞌa nombawai rasi to neliu-liuna ka pura-pura tau to nekakai ka Iꞌa.
13 Sabana “Isema-sema to mekakai ka i Pue kana rapakasalama.” c
14 Tapi iwenumo tau mekakai ka i Pue ane ira daꞌapa nomparasaya Iꞌa? Pade iwenu ira momparasaya i Pue ane ira daꞌapa nangepe karebana? Pade iwenu ira mangepe karebana ane daꞌapa ria tau nompatolele kareba etu ka ira?
15 Pade iwenu tau mompatolele Kareba Belo ane daꞌapa ria to nombasuro ira manggeni kareba etu? Ewa to nitulisi riara Buku Nagasa iweꞌi: “Nabelo mpuꞌu karata ntau to nanggeni Kareba Belo.” d
16 Nariamo tau nanggeni Kareba Belo. Tapi daꞌa pura-pura tau nantarima Kareba etu. Naria tesa nabi Yesaya nggaolu ewa etu to nanguli iweꞌi: “Pue, daꞌa nadea tau nomparasaya tesa to nikeni kami!” e
17 Jadi tau namala momparasaya ane ira mangepe Kareba Belo, pade Kareba Belo etumo tesa ewa Kristus.
Tau to Israel nangepe Kareba Belo, tapi nadea ira daꞌa nadota momparasaya
18 Tapi aku nekutana, “Iwenu? Tau to Israel daꞌapa nangepe Kareba Belo?” Natantu niepe iramo, sabana naria nitulisi riara Buku Nagasa iweꞌi:
“Tesa to niuli ira natolele sampe ri njumaongu dunia.
Kareba to nikeni ira natolele sampe ri umba-umba ri dunia.” (Mzm. 19:5)
19 Tapi sangganipa kupekutana, “Tau to Israel daꞌapa nangginjani batuana Kareba etu?” Natantu ninjani iramo. Sabana nokolu naria tesa Alatala ewa to Israel to nipasimbayu i Musa iweꞌi:
“Aku kana mompowia komi majadi masiriati
tempo komi manggita toweku ri jaꞌi tau-tau daꞌa to Yahudi
to nireke komi daꞌa todeaku.
Komi kana majuꞌa rara manggita asi mataku
ri jaꞌi tau-tau to nireke komi tau nabodo
to daꞌa nangginjani Alatala.” (Ul. 32:21)
20 Pade ri purina nabi Yesaya ante nabia nompasimbayu tesa Alatala ewa tau-tau daꞌa to Yahudi iweꞌi:
“Tau-tau to daꞌa nompasimbuku mangelo Aku,
iramo to nosirata ante Aku.
Pade tau-tau to daꞌa nekakai ka Aku,
iramo to nanggita Aku.” (Yes. 65:1)
21 Tapi iweꞌimo tesa Alatala ewa tau-tau to Israel:
“Njineo ntua Aku nangojo paleku madota mantarima ira,
tapi ira daꞌa madota mekou ri jaꞌiku.
Ira aga nompakakoꞌo rara.” (Yes. 65:2)