TAU-TAU TO ISRAEL ANTE KAREBA BELO (Pasal 9-11)
Nasusa rara Paulus sabana nakura to Israel nomparasaya i Pue Yesus
9
Nuapa to kuuli eꞌi mpuꞌu-mpuꞌu nakono. Aku daꞌa nodawa, sabana aku nosaongu rara ante Kristus. Pade Nosa Nagasa nu Alatala to naria riara pekiri rara ntaꞌiku woꞌu nantakono tesaku eꞌi.
2-3 Nalebuku bo nasusa mpuꞌu raraku nompekiri sampesuwuku to Israel sabana nakura ira to nomparasaya i Pue Yesus. Kakonona aku nasadia rajanjiaka Alatala bo rapopogaꞌa nggari jaꞌi Kristus manjambei ira to nosangata ante aku.
4 Ira to Israel todea nu Alatala to nionggotakana najadi ana-anana mboto. Ira to nipopokita ka kuasa bo kagayana. Ira to niwai ka pojanji-pojanjina, pade ira to niwai ka Atura-atura agama. Ira to nipatuduki ka ada-ada mepue ka Alatala, pade ira to nantarima nadea mpuꞌu pojanji Alatala ntanina.
5 Ira muli Abraham, Ishak bo Yakub, totuꞌa nggaolu to Israel. Pade tempo Kristus netimbali najadi manusia Iꞌa najadi tau to Israel. Iꞌamo to neliu nggalanga nggari ntanina, Iꞌamo Alatala to masipato ratoiyata sampe ri kasae-saena. Amin!
Daꞌa pura-pura muli Abraham nipelisi Alatala majadi bagiana
6 Naupa nadea to Israel daꞌa nomparasaya i Pue Yesus etu daꞌa batuana Alatala daꞌa nompakadupa pojanjina. Sabana daꞌa pura-pura muli Israel to nipelisi Alatala majadi todeana.
7 Pade daꞌa woꞌu pura-pura muli Abraham to nireke mulina to masipato mantarima nuapa to nijanji Alatala. Sabana Alatala nanguli ka Abraham iweꞌi: “Aga mulimu nggari Ishak to rareke mulimu.” a
8 Etu batuana daꞌa pura-pura tau to nipomuli Abraham nireke ana-ana nu Alatala, aga ira to nomparasaya pojanji Alatala nasimbayu ewa Abraham.
9 Sabana iweꞌimo pojanji Alatala to niparasaya Abraham: “Mpae marata Aku kana manjili manggita komi, pade daꞌapa Aku marata rongomu i Sara kana moana sambaꞌa ngana langgai.” b
Alatala mboto to nompakatantu isema rapelisi mantarima rasina
10 Pade daꞌa aga etu, ri tesa ewa i Ribka, rongo ntotuꞌata nggaolu Ishak, neliu ngganoto ka kita Alatala nompelisi tau nantuki dotana mboto. Ribka natiana ka ana Ishak.
11-12 Tapi daꞌapa iꞌa nangote rombaꞌa ngana norapi, Alatala nanguli ka iꞌa iweꞌi: “Anamu ulumbua kana rapobatua nu tuaꞌina.” c Tempo Alatala notesa etu rombaꞌa ngana etu daꞌapa nesuwu, ira daꞌapa nompowia nuapa-nuapa to nabelo atau to najaꞌa. Tapi Alatala nompakatantu nokolu ngana umbana to nipelisina mantarima rasi nggari jaꞌina. Nipowiana iwetu ala mompakanoto Iꞌa daꞌa nompelisi tau nantuki powia ira, tapi Iꞌa nompelisi tau nantuki dotana mboto.
13 Etumo patuju nu tesa riara Buku Nagasa to nanguli iweꞌi: “Yakub nipotoweku, tapi Esau niporau raraku.” d
14 Jadi ane iwetu, neꞌe kita manguli powia Alatala etu daꞌa nanoa. Etu daꞌa ntoto nakono!
15 Sabana Iꞌa nanguli ka nabi i Musa nggaolu iweꞌi: “Aku kana maasi mata ka isema to kupoasi mata bo mompotowe ka isema to kupotowe.” e
16 Jadi etu majadi daꞌa nggari dota manusia atau nggari powia manusia, tapi nggari asi mata Alatala mboto.
17 Riara Buku Nagasa naria Tesa Alatala ka Firaun, Magau tana Masir nggaolu iweꞌi: “Aku nangonggotaka iko najadi magau ante sangele lau patuju, etumo ala nggari powiaku riara nggatuwumu Aku mompopokita kuasaku bo sangaku ratoiya bo rapakabete ri njumaongu dunia.” f
18 Jadi nanotomo ka kita Alatala naasi matana ri jaꞌi isema-sema to nipodotana bo Iꞌa nompakakoꞌo rara isema-sema to nipodotana.
19 Natantumo kana maria tau to manguli iweꞌi: “Ane iwetu, nokuya Alatala danompakasala manusia, sabana kita daꞌa namala mangewa dotana?”
20 Tapi sampesuwu-sampesuwu, neꞌe manjapuaka Alatala! Namala kura manguli ka topowiana, “Nokuya iko nompowia aku iweꞌi?” Natantu daꞌa ntoto namala!
21 Topomandu kura nakuasa nombamandu tana lei nantuki dotana mboto. Nggari salemo tana lei iꞌa nombamandu rongu kura, saongu to nagayana pade saongu kura biasa.
22 Iwetu woꞌu ante Alatala. Iꞌa nakuasa nompowia nuapa-nuapa to nipodotana ri jaꞌita. Kakonona Alatala nonia mompopokita rau rarana ka tau-tau najaꞌa bo mompopokita kuasana sabana ira masipato rasuku sampe ri kasae-saena. Tapi naupa iwetu Iꞌa danosabara ri jaꞌi ira to masipato mawela rau rarana.
23 Iꞌa nosabara iwetu ala mompopokita kabete nu towena bo asi matana ka tau-tau to nipakatantuna nggari lamba pamulana mantarima bagia nggari kabelona.
24 Pade kita eꞌimo tau-tau to nipokiona mantarima rasi etu, daꞌa aga tau-tau to Yahudi, tapi tau-tau daꞌa to Yahudi woꞌu.
Tesa riara Buku Nagasa nombaboto tempo Alatala mompelisi tau-tau daꞌa to Yahudi majadi todeana
25 Naria tesa Alatala riara buku nabi Hosea to nanguli iweꞌi:
“Tau-tau daꞌa todeaku kana kuuli todeaku.
Ira to daꞌa nipotoweku kana kuuli to nipotoweku.” (Hos. 2:22)
26 “Pade ri umba petoꞌo pue ngata niuli daꞌa todeaku,
ri setumo ira kana rauli ana nu Alatala to Natuwuna.” (Hos. 1:10)
27 Naria woꞌu tesa to niboto nabi Yesaya nantesa to Israel iweꞌi:
“Naupa muli Israel nadea mpuꞌu, ewa kadea nu bone ri wiwi ntalinti,
aga sabagia nggedi nggari tatongo ira to rapakasalama,
28 sabana Pue kana masalisa mombasuku pura-pura manusia ri dunia.
Iꞌa daꞌa mombasoro-soro tempo etu.” (Yes. 10:22-23)
29 Naria tesa nabi Yesaya ntanina to nanguli iweꞌi:
“Ane rapana Alatala to Neliu Nggakuasa daꞌa nombaboli mulita,
tantu mpuꞌu-mpuꞌu kita maropu
nasimbayu ewa pue ngata Sodom bo Gomora nggaolu.” (Yes. 1:9)
To Israel aga nanjarumaka pokainggu ira mboto ala majadi manoa riara mpanggita Alatala
30 Jadi iweꞌimo to nipatujuku: Tau-tau daꞌa to Yahudi daꞌa nompasimbuku majadi manoa riara mpanggita Alatala. Tapi sabana ira nomparasaya, ira nireke Alatala nanoa.
31 Tapi tau-tau to Israel nasaemo nompasimbuku majadi manoa riara mpanggita Alatala ante mantuki Atura-atura agama. Tapi etu daꞌa najadi.
32 Nuapa sabana? Sabana ira aga nanjarumaka pokainggu ira mboto to nabelo, ira daꞌa nanjarumaka pomparasaya ira ka Alatala ala majadi manoa. Ira ewa tau natepasunu ri watu, sabana nakaja rara ira momparasaya kamate i Pue Yesus ri kayu parika.
33 Etu niboto riara Buku Nagasa iweꞌi:
“Kita weꞌi! Aku nomboli sambaꞌa tau ri Bulu Sion g to nirapaka ewa saongu watu bete.
Nadea tau kana matepasunu ri watu etu pade madungga.
Tapi isema-sema momparasaya Iꞌa
daꞌa rapakaeya.” (Yes. 28:16)