Ante kuasa Nosa Nagasa nu Alatala kita mompakule matuwu mompakadamba rara Alatala
8
Jadi weꞌi-weꞌi mana ria pesuku to rapawela ka tau-tau to nosaongu rara ante Yesus Kristus.
2 Sabana kuasa Nosa Nagasa nombawai ka kita katuwua nabou pade nanggabasaka kita nggari kuasa silaka bo kamatea, sabana kita nosaongu rara ante Yesus Kristus.
3 Atura-atura agama daꞌa namala manggabasaka kita nggari kuasa silaka sabana kita daꞌa nompakule mantuki Atura-atura etu. Tapi nuapa to daꞌa namala nipowia Atura-atura agama, etumo to nipowia Alatala. Iꞌa nompakau Anana mboto mpaka ri dunia netimbali najadi manusia ante koro to nasimbayu ewa koro manusia to nasilaka. Pade Iꞌa nombasuku Anana mboto ala mompakaropu kuasa silaka riara ntaꞌi manusia.
4 Etu nipowia Alatala ala kita mamala mompowia pura-pura pokainggu to nanoa to nituntu riara Atura-atura agama. Kita namala mowia etu sabana kita mana natuwu nantuki dota rara to najaꞌa, tapi kita natuwu nantuki dota Nosa Nagasa nu Alatala.
5 Isema-sema to natuwu nantuki dota rarana to najaꞌa bate-batena nompekiri dota rara to najaꞌa. Tapi isema-sema to natuwu nantuki dota Nosa Nagasa nu Alatala bate-batena nompekiri nuapa to nipodota Nosa Nagasa.
6 Ane pekirita nikuasai dota rara to najaꞌa kita kana mamate bo rapopogaꞌa nggari jaꞌi Alatala sampe ri kasae-saena. Tapi ane pekirita nikuasai Nosa Nagasa nu Alatala kita kana matuwu mosinggabelo ante Alatala sampe ri kasae-saena.
7 Ane pekirita nikuasai dota rara to najaꞌa kita majadi bali nu Alatala, sabana kita daꞌa natundu riara Atura-atura Alatala. Daꞌa aga etu, tapi ane pekirita nikuasai dota rara to najaꞌa kita daꞌa nompakule mantuki Atura-atura etu.
8 Tau-tau to nantuki dota rarana to najaꞌa daꞌa namala mompakadamba rara Alatala.
9 Tapi sampesuwu-sampesuwu, komi mana nantuki dota raramu to najaꞌa. Komi nantuki dota Nosa Nagasa nu Alatala sabana nariamo Nosa Nagasa riara ntaꞌi komi. Ane tau daꞌa naria Nosa Nagasa nu Kristus riara ntaꞌina iꞌa daꞌa bagia Kristus.
10 Tapi ane Kristus netoꞌo riara ntaꞌi komi, naupa koro komi kana mamate sabana silaka, wayo komi kana matuwu mabelo sampe ri kasae-saena sabana komi najadi nanoa riara mpanggita Alatala.
11 Nosa Nagasa nu Alatala nompakatuwu bali Yesus nggari kamatena pade Iꞌa woꞌu netoꞌo riara ntaꞌi komi. Jadi naupa koro komi kana mamate, Alatala to nompakatuwu bali Yesus Kristus etu kana mompakatuwu koro komi woꞌu ante kuasa Nosana to Nagasa to naria riara ntaꞌi komi.
12 Jadi sampesuwu-sampesuwu, weꞌi-weꞌi kita masipato matuwu mantuki dota Nosa Nagasa nu Alatala, daꞌa dota rarata to najaꞌa.
13 Sabana ane kita batena matuwu mantuki dota rara to najaꞌa etu, kita kana mamate bo rapopogaꞌa nggari jaꞌi Alatala. Tapi ane kita manggabasaka pokainggu to najaꞌa ante kuasa nggari jaꞌi Nosa Nagasa nu Alatala, kita kana matuwu mabelo sampe ri kasae-saena.
Nggari pokarajaa Nosa Nagasa ninjanitamo kita ana-ana nu Alatala
14 Isema-sema to nikeniaka Nosa Nagasa nu Alatala, iramo ana-ana nu Alatala.
15 Sabana Nosa Nagasa to niwai Alatala ka kita daꞌa nanggeni kita rapobatua silaka sampe kita manjili matuwu ante eka rara. Tapi Nosa Nagasa etu nangonggotaka kita majadi ana-ana nu Alatala. Pade ante pekeniaka Nosa Nagasa etu kita namala manguli ka Alatala, “O, Yuma, Komi Umaku!”
16 Nosa Nagasa nu Alatala mbotomo nantakono nuapa to nanotomo riara ntaꞌita, etumo kita ana-ana nu Alatala!
17 Pade ane kita ana-ana nu Alatala, batuana kita woꞌu tau to masipato mantarima rasi-rasi to nipakasadia Alatala ka ana-anana. Kita woꞌu masipato mantarima pura-pura nuapa to nipakasadia Alatala ka Kristus, sabana kita nombarasai kasusa ewa to nirasaina ala kita woꞌu mombarata bagia riara kuasa bo kagayana to nipogumaa.
Kabelona to ratarimata banepia neliu nggabelo nggari kasusa to nirasaita weꞌi-weꞌi
18 Nantuki pombarataku kasusa bo kapari to nirasaita weꞌi-weꞌi daꞌa ntoto ria batuana ane rapoposisala ante kabelona to rarasaita banepia.
19 Weꞌi-weꞌi pura-pura nuapa to nipajadi Alatala nompopea ante nalentora rarana tempo Alatala mompopokita kuasa bo kagaya nu ana-anana.
20 Sabana pura-pura to nipajadi Alatala etu daꞌa namala mombarasai nuapa to niponiana. Pura-pura etu nompamula narompo bo namate. Etu daꞌa nggari dotana mboto tapi etumo to nipodota Alatala majadi. Tapi naupa iwetu naria panjarumaka iweꞌi:
21 Kana marata sanggani tempo pura-pura nuapa to nipajadi Alatala woꞌu kana rakabasaka nggari kuasa kamatea pade mombarasai kuasa bo kagayana to rawaina ka ana-anana.
22 Sabana ninjanitamo pura-pura to nipajadi Alatala nandasamo sampe weꞌi-weꞌi nasimbayu ewa sambaꞌa besi nekakai tempona iꞌa moana.
23 Pade daꞌa aga pura-pura to nipajadi Alatala to nekakai, tapi kita topomparasaya i Pue Yesus woꞌu nekakai riara ntaꞌita. Kita nalentora mompopea tempo Alatala manggabasaka kita nggari kuasa kamatea pade mompakanoto kita mpuꞌu-mpuꞌu nionggotaka majadi anana. Ninjanita tempo etu kana marata sabana kita nipesua Nosa Nagasa nu Alatala ewa tandaina pojanjina ka kita kana rapakadupa.
24 Kita nipakasalamamo pade weꞌi-weꞌi kita mompopea sampe mombarasai pura-pura etu. Ane kita mompopea sangele, batuana daꞌapa nikitata nuapa to nipopeata etu, sabana daꞌa ria tau mompopea sangele to nikitanamo.
25 Tapi ane kita mompopea nuapa to daꞌapa nikitata, kita bate-batena mompopea ante mosabara.
26 Nosa Nagasa nu Alatala woꞌu nantulungi kita riara kalenteta. Sabana daꞌa ninjanita iwenu kasipatona kita mosambaya. Tapi Nosa Nagasa mboto nantulungi kita mosambaya ante pekakai to daꞌa namala nisowadaka manusia.
27 Pade Alatala to nanggita isi rara ntaꞌi manusia nangginjani patuju nu Nosa Nagasa etu, sabana Nosa Nagasa nosambaya ka topomparasaya nantuki dota nu Alatala mboto.
Alatala nanggeni belo ka kita riara mpengele-ngele
28 Ninjanitamo Alatala nokarajaa riara mpengele-ngele to najadi ri jaꞌita ala manggeni belo ka kita to nompotowe Iꞌa, etumo kita to nipokiona majadi ana-anana nantuki dotana mboto.
29 Sabana kita to nipelisina nggari lamba pamulana nipakatantuna majadi nasimbayu ewa Anana i Pue Yesus. Patujuna ala Yesus majadi Ana Ulumbua pade kita majadi sampesuwu-sampesuwuna.
30 Pade kita to nipakatantuna nggari lamba pamulana etu nipokiona majadi todeana. Pade kita to nipokiona nirekena tau nanoa riara mpanggitana. Pade kita to nirekena tau nanoa niwaina ka bagia riara kuasa bo kagayana mboto.
Daꞌa ria kamba sangele to namala mombalawa towe Kristus ri jaꞌita
31 Jadi nantora etu pura-pura nuapa masipato raulita? Ane Alatala mosabingga ka kita, isema mabia mangewa kita?
32 Iꞌa daꞌa natowe ka Anana mboto tapi niwaina rapatesi manjaliku silakata. Jadi ane Iꞌa daꞌa natowe nombawai Anana mboto rapatesi, natantumo Iꞌa woꞌu kana mombawai ka kita ante kajoina mpengele-ngele to niparaluuta.
33 Isema to nabia mompangadu kita to nipelisi Alatala? Daꞌa ntoto ria, sabana Alatala mboto nantarima kita ewa tau nanoa riara mpanggitana.
34 Isema to nabia mompakasala kita? Daꞌa ntoto ria, sabana Kristus namate mombasompo salata. Pade daꞌa aga etu, Iꞌa nipakatuwu bali pade nionggotaka ri panggana nu Alatala. Iꞌamo to nanjaliku kita ri ngayo Alatala.
35 Jadi nuapa to namala mombalawa towe Kristus ri jaꞌita? Natantu daꞌa ntoto ria! Nau kita masusa atau mapari atau rapandasa ntau, nau kita maoromate atau daꞌa ntoto ria pakea, nau kita nirumpa baranggau atau rapatesi, kita bate-batena rapotowena.
36 Riara Buku Nagasa naria nitulisi iweꞌi:
“O, Pue, eo wengi naria tau madota mompatesi kami.
Kami nireke ewa bimba to rakeni rasambale.” (Mzm. 44:23)
37 Tapi nau nuapa-nuapa majadi ri jaꞌita kita mpuꞌu-mpuꞌu padagi ante kuasa i Pue Yesus to nompotowe kita.
38 Sabana niparasayaku daꞌa ria kamba sangele to namala mombalawa towe Kristus ri jaꞌita, nabeloka kamatea atau katuwuta eo-eo, nabeloka malaeka atau seta atau mpengele-ngele kuasa ntanina, nabeloka nuapa-nuapa to najadi weꞌi-weꞌi atau nuapa-nuapa to majadi banepia,
39 nabeloka kuasa-kuasa ri langi atau kuasa-kuasa ri dunia, nabeloka nuapa-nuapa ntanina to nipajadi Alatala. Etu pura-pura daꞌa namala mombalawa towe Alatala ri jaꞌita sabana kita nosaongu rara ante Pueta Yesus Kristus.