Topomparasaya mana nisoko Atura-atura agama
7
Sampesuwu-sampesuwu, komi pura-pura nangginjani atura-atura. Jadi natantumo ninjani komi ane kita danatuwu kita danisoko atura-atura. Tapi ane kita namatemo, kita mana nisoko atura-atura etu.
2 Jonjona, sambaꞌa besi to niporongo danisoko nu ada-ada mporongo ane rongona langgai danatuwu. Tapi ane rongona namatemo, besi etu nakabasaka nggari ada-ada mporongo to nompakaroso porongo ira njamboko.
3 Jadi ane besi etu mangala langgai ntanina tempo rongona danatuwu, etu niuli nebualo. Tapi ane rongona langgai namatemo besi etu mana nisoko ada-ada mporongo. Jadi ane iꞌa niporongo langgai ntanina etu mana nireke nebualo.
4 Iwetu woꞌu ante komi, sampesuwu-sampesuwuku. Tempo Kristus namate komi woꞌu ewa namate nosanggani-nggani ante Iꞌa sampe komi mana nisoko Atura-atura agama. Ante iwetu weꞌi-weꞌi komi najadi bagia tau ntanina, etumo Kristus to natuwu bali nggari kamatena, ala katuwuta moguna ka Alatala.
5 Bopia daꞌapa kita nomparasaya i Pue Yesus kita danatuwu nantuki dota rara to najaꞌa. Pade tempo etu dota rara to najaꞌa etu nipakapane nu Atura-atura agama to nombatagi kita mompowia kajaꞌana. Etu sampe kita batena nompowia to najaꞌana sampe kita masipato mamate bo rapopogaꞌa nggari jaꞌi Alatala.
6 Tapi weꞌi-weꞌi kita nikabasakamo nggari Atura-atura agama to nompoꞌu kita bopia, sabana kita ewa namate nosanggani-nggani ante Kristus. Jadi kita daꞌa mana nantuki jala nokolu. Kita mana mekou ri jaꞌi Alatala ante mantuki Atura-atura agama to nitulisi. Tapi weꞌi-weꞌi kita nantuki jala to nabou, kita nekou ri jaꞌi Alatala ante petulungi nggari jaꞌi Nosana to Nagasa.
Nggari Atura-atura agama nanotomo nuapa to niuli silaka
7 Jadi ane iwetu bara maria to nompekiri Atura-atura agama etu najaꞌa. Tapi etu daꞌa ntoto nakono, sabana nggari Atura-atura agama nanotomo ka kita nuapa to niuli silaka. Ane rapana daꞌa ria atura agama to nanguli, “Neꞌe maino ka mbara-mbara ntau,” a natantu daꞌa ninjaniku etu silaka.
8 Tapi tempo aku nangepe atura etu silaka nombarata loga mompopeumba dota raraku maino ka mpengele-ngele. Ane daꞌa ria Atura-atura agama nompakanoto nuapa to niuli silaka, daꞌa ntoto ria kuasa silaka riara nggatuwuta.
9 Bopia tempo aku daꞌapa nangginjani Atura-atura agama aku natuwu nasana. Tapi naopu aku nangginjani Atura-atura agama silaka to naria riara ntaꞌiku nompamula nakuasa, pade nanotomo aku masipato mamate bo rapopogaꞌa nggari jaꞌi Alatala sampe ri kasae-saena.
10 Atura-atura agama to nipatuju Alatala manggeni aku matuwu mabelo aga nompakanoto aku masipato mamate.
11 Tempo aku nangepe Atura-atura agama silaka nombarata loga mombabagiu aku. Pade nggari Atura-atura agama silaka namala nompakanawu aku sampe aku masipato mamate.
12 Atura-atura agama nagasa bo parenta-parenta Alatala nagasa, nanoa bo nabelo.
13 Ane iwetu bara maria to manguli iweꞌi: “Atura-atura agama to nabelo etu nompakamate aku sampe aku masipato rapopogaꞌa nggari jaꞌi Alatala!” Tapi etu daꞌa ntoto nakono! Silakamo to nompakamate aku! Atura-atura agama to nabelo nipake silaka nompakanawu aku sampe aku masipato mamate. Nggari Atura-atura agama nantambai nanoto kajaꞌa nu silaka.
Tau natundu riara Atura-atura agama daꞌa nompakule mompowia pokainggu to nabelona
14 Sampesuwu-sampesuwu, ninjanitamo Atura-atura agama nagasa sabana etu nggari jaꞌi Nosa Nagasa nu Alatala. Tapi aku eꞌi aga manusia nasilaka, aku nipobatua nu silaka.
15 Sabana daꞌa ninjaniku pokaingguku mboto. Pokainggu to nabelo to nipodotaku daꞌa nipowiaku. Tapi pokainggu to niporau raraku, etumo to nipowiaku!
16 Ane pokainggu anu daꞌa nipodotaku to nipowiaku, batuana aku nantakono Atura-atura agama. Aku nanguli Atura-atura etu nabelo.
17 Ane iwetu mana aku to nompowia pokainggu to najaꞌa etu tapi silaka to naria riara ntaꞌiku.
18 Sabana ninjanikumo daꞌa ria kamba sangele to nabelona riara ntaꞌiku, etumo riara ingguku ewa manusia. Sabana naupa aku madota mompowia to nabelona, daꞌa kupakule mowia etu.
19 Pokainggu to nabelo to nipodotaku daꞌa nipowiaku, tapi kajaꞌana to daꞌa nipodotaku, etumo to nipowiaku.
20 Jadi ane aku mompowia anu daꞌa nipodotaku iwetu, batuana daꞌa aku to nompowia pokainggu etu tapi silaka to naria riara ntaꞌiku.
21 Jadi iweꞌimo to najadi riara nggatuwuku: Ane aku madota mompowia to nabelona bate-batena to najaꞌana to nipowiaku.
22 Riara pekiri rara ntaꞌiku aku nompokono Atura-atura nu Alatala.
23 Tapi riara koroku naria kuasa ntanina to nosibali ante pekiri rara ntaꞌiku sampe aku nidagina bo nipobatua nu silaka to nombakuasai koroku etu.
24-25 Jadi iweꞌimo katuwuku. Riara pekiri rara ntaꞌiku aku madota matundu riara Atura-atura Alatala, tapi riara koroku aku bate-batena natundu riara silaka to nombakuasai aku. Nandasa mpuꞌumo aku eꞌi! Isema to mamala manggabasaka aku nggari kuasa silaka eꞌi to nanggeni aku mamate? Aku nosukuru ri jaꞌi Alatala sabana Pueta Yesus Kristus to nanggabasaka aku!