Paulus ri Lewuto Malta
28
Sangga nasalama puramo kami nesore ri kabatana ri wiwi talinti etu, ninjani kamimo lewuto etu nosanga ka Lewuto Malta.
2 Pue ngata Malta etu najole mpuꞌu ira ri jaꞌi kami. Ira nantarima kami pura-pura ante nabelo pade niparega ira apu raponeru kami, sabana nompamulamo nauja pade rawana woꞌu nalenimo.
3 Paulus nalau nompasiromu rangga-rangga nu kayu. Sangga nituꞌuna kayu etu ri apu, nesuwumo sambaꞌa ule nggari kayu sabana kapane nu apu etu, pade nantuda palena.
4 Sangga nikita pue ngata ule etu neloe ri pale i Paulus, notesamo ira ka roana sambaꞌa bo sambaꞌa, “Tau eꞌi natantumo iꞌa sambaꞌa topepatesi, sabana naupa nasalamamo iꞌa nggari tasi, Wiata Topotangara daꞌa mompakamba iꞌa matuwu.”
5 Tapi i Paulus aga nantarampea ule etu mpaka riara nu apu, pade daꞌa ntoto nirasaina juꞌana.
6 Pue ngata etu nompekiri pale i Paulus kana mebangga, bara iꞌa madungga bo mamate. Tapi nasae nipopea ira, daꞌa ria nakuya-kuya iꞌa. Nanggita etu nabalimo pompekiri ira, pade niuli ira i Paulus etu sambaꞌa wiata.
7 Daꞌa nakawao nggari setu naria tana ntopoparenta Lewuto Malta etu, sangana i Publius. Iꞌa nantarima kami ante kadamba nu rarana pade tolumbengi kasaena kami nitoratana riara njapona.
8 Tempona etu uma i Publius etu nakambole naturu sabana najuꞌa kokora bo natero. Paulus nesua ri jaꞌina pade ante nosambaya bo nombadika palena ri koro ntau najuꞌa etu nipakabelona juꞌana etu.
9 Sangga nangepe kajadia etu naratamo pura-pura tau ntanina to najuꞌa nggari lewuto etu ri jaꞌi Paulus, pade ira woꞌu nipakabelona.
10 Ira mpuꞌu-mpuꞌu nombabila kami, pade tempo nasadiamo kami manggaliwo, nikeni ira ka sakaya nipesawi kami pura-pura nuapa to niparaluu kami riara posumomba kami etu.
Paulus narata ri ngata Roma
11 Naopu tolumbula kasaena kami netoꞌo ri Lewuto Malta etu, nosumomba woꞌumo kami ante saongu sakaya nggari ngata Aleksandria to nosanga ka “Wiata Mporapi Kastor bo Poluks”. Sakaya etu nesai nasampo ri Lewuto Malta etu sampe naopu tempo leni.
12 Nosumombamo kami sampe narata ri ngata Sirakusa, pade tolumbengi kasaena kami naturu ri setu.
13 Nggari setu nosumomba kami nosale talinti sampe narata ri ngata Regium. To nailena nompamulamo poiri neburu nggari puluna sampe riara rombengipa naratamo kami ri kasampoa Putioli ri Propinsi Italia.
14 Ri setu kami nosintomu ante bara sakuya mbaꞌa topomparasaya i Pue Yesus, pade kami nipakeni metoꞌo ante ira pitumbengi kasaena. Pade naopu etu nolumakomo kami mapola mpaka ri ngata Roma.
15 Tempo topomparasaya-topomparasaya i Pue Yesus ri ngata Roma etu nangepe kareba kami mamosu maratamo, naratamo ira mombatomunaka kami ri Potomu Apius pade ri ngata Pasanggaraha Tiga. Sangga nosintomupa kami ante ira nosukurumo i Paulus ka Pue Alatala, pade naroomo rarana.
Paulus notesa ka tau-tau to Yahudi ri ngata Roma
16 Sangga naratapa kami ri ngata Roma i Paulus mana nitarunggu. Iꞌa nipaloga metoꞌo ri umba-umba nipodotana. Tapi naria sambaꞌa tantara nanggatono iꞌa ri setu.
17 Nagana tolumbengi nggari setu, i Paulus nompokio totuꞌa-totuꞌa nto Yahudi nggari ngata Roma etu. Sangga nasiromupa ira nangulimo i Paulus ka ira etu, “Sampesuwu-sampesuwuku, aku daꞌa nasala nuapa-nuapa ka sampesuwu-sampesuwuta to Yahudi bara nombaliunaka ada-ada to nitarimata nggari jaꞌi totuꞌa-totuꞌata nggaolu. Tapi naupa iwetu aku nisoko ri ngata Yerusalem pade niwai riara mpale tau-tau to Roma.
18 Naopu parakaraku eꞌi niparesa ira, ira nadota mombakabasaka aku, sabana nanotomo daꞌa ria sala nipowiaku masipato aku rasuku mamate.
19 Tapi tempo tau-tau to Yahudi daꞌa nasituju ante patuju etu, daꞌa ria jala ntanina, aku kana nekitangara ri jaꞌi Magau Roma. Naupa iwetu daꞌa ria pepangaduku nuapa-nuapa ri jaꞌi sampesuwu-sampesuwuku tau to Yahudi etu.
20 Jadi etu sampe aku nerapi mosintomu ante komi. Aku madota motesa ka komi ewa parakaraku eꞌi. Kakonona aku eꞌi nibalanggu sabana aku nomparasaya Magau to Mompakasalama to nisarumaka pura-pura to Israel.”
21 Nangepe tesa i Paulus etu nesonomo ira, “Kami eꞌi daꞌa ria nantarima kamba santaꞌu sura nggari Bagia Yudea nosinggawela ewa parakara komi etu. Pade daꞌa woꞌu naria tau nggari setu narata nanggeni kareba nosinggawela ante komi bara motesa anu najaꞌa ewa komi ka kami.
22 Tapi kami eꞌi madota mangepe tesamu, sabana to ninjani kami, ri umba-umba tau nanjalai pepatuduki to nituki komi etu.”
23 Jadi totuꞌa-totuꞌa nto Yahudi etu nompakatantu saeo rakasiromu ira ante i Paulus. Tempo naratamo eo to nipakatantu ira etu, nadeamo tau narata nasiromu ri sapo i Paulus. Pade nggari mpadondo sampe ngguwiana i Paulus nombatarangga ka ira ewa Poparenta nu Alatala. Nipakena isi buku-buku nabi i Musa pade buku-buku nabi-nabi ntanina motarangga ka ira ala manggeni ira momparasaya Yesus Magau to Mompakasalama to nijanji Alatala.
24 Naria to nomparasaya nuapa to niuli i Paulus, tapi naria woꞌu to daꞌa nomparasaya.
25 Kaopuna, nompamula ira nalai nggari setu sabana posisala pombarata ira ewa pepatuduki i Paulus etu. Tapi daꞌapa ira nalai nangulimo i Paulus ka ira, “Nakono ntoto Tesa nggari jaꞌi Nosa Nagasa nu Alatala to nipasimbayu nabi Yesaya ka totuꞌa-totuꞌata nggaolu iweꞌi:
26 ‘Kau uli ka tau-tau to Yahudi iweꞌi:
Komi maoso mangepe, tapi daꞌa ria ranjani komi batuana.
Komi maoso mompariara, tapi daꞌa ria rakita komi nuapa majadi.
27 Etu majadi sabana tau-tau eꞌi netiwatumo,
ira netimbongomo, pade mata ira nipisi iramo.
Ane etu daꞌa nipowia ira,
mamala ira manggita nuapa majadi,
mamala ira mangepe pade mangginjani batuana,
mamala ira mangginjani to nakonona
pade manjili ri jaꞌiku
ala Aku mompakabelo ira.’” (Yes. 6:9-10)
28 Kaopuna niuli i Paulus woꞌumo ka ira, “Sampesuwu-sampesuwuku, kana ranjani komi, Kareba Belo eꞌi to nompakanoto iwenu Alatala mompakasalama manusia, nipatolelemo ka tau-tau daꞌa to Yahudi. Iramo to mompangala Kareba etu!”
[
29 Naopu nangepe tesa i Paulus etu, tau-tau to Yahudi nagaro nompalasi petoꞌo etu ante nosinggarau sambaꞌa bo sambaꞌa.]
30 Rompae kasaena i Paulus netoꞌo ri ngata Roma ri sapo to nisioana mboto. Ri setu nitarimana ante nadamba rarana pura-pura tau to narata ri jaꞌina.
31 Nipatolelena ka ira kareba ewa Poparenta nu Alatala, pade nipatudukina ka ira kareba i Pue Yesus Kristus. Etu pura-pura nipowiana ante daꞌa ria kakinina. Daꞌa ria iꞌa nilawa-lawa ntau.