Paulus nosumomba mpaka ri ngata Roma
27
Naopu etu Gubernur Festus nompakatantu kami kana mosumomba mpaka ri ngata Roma ri Propinsi Italia. Jadi i Paulus ante bara sakuya mbaꞌa tau ntanina nitarunggu niparasaya ka Yulius, sambaꞌa tadulako nu tantara Roma to nosanga ka “Pasukan Magau Roma.”
2 Kami nesawi saongu sakaya bete nopuꞌu nggari ngata Adramitium. Pade nanggaliwomo kami nggari ngata Kaisarea ante patuju mosumomba mesai ri kasampoa-kasampoa ri talinti-talinti Propinsi Asia. Naria woꞌu sambaꞌa tau nggari ngata Tesalonika ri Propinsi Makedonia to nosanga ka Aristarkhus nalau nosanggani ante kami.
3 Tonailena sakaya kami nesai nasampo ri ngata Sidon. Yulius nabelo rarana ri jaꞌi Paulus, sampe niwaina loga ka i Paulus nalau nanggita roa-roana ri ngata Sidon etu ala ira mamala mombawai ka iꞌa nuapa to raparaluuna.
4 Nggari setu kami nompapola posumomba kami. Tapi sakaya kami nompotomu poiri sampe kami kana nosale ri wiwi ntalinti Lewuto Siprus to nalendu sakedi nggari poiri etu.
5 Naopu etu nosumombamo kami ri tasi ri ntoto Propinsi Kilikia bo Pamfilia, pade napola sampe narata ri ngata Mira ri Propinsi Likia.
6 Ri ngata Mira etu Yulius nombarata saongu sakaya bete nggari ngata Aleksandria mosumomba mpaka ri Propinsi Italia. Pade kami nipakauna nolinja ri sakaya etu.
7 Bara sakuya mbengimo kasaena sakaya etu nosumomba ante naole. Kaopuna ante kasusana kami namala nompakamosu ngata Knidus. Nggari setu, kami daꞌa nompapola posumomba kami nantuki nia pamulana sabana peburu mpoiri daꞌapa nabelo. Jadi sakaya kami etu nalau nosale ri wiwi ntalinti Lewuto Kreta nombaliunaka uju Salmone ala neꞌe mawela gaga poiri bete etu.
8 Nasusa mpuꞌu kami nosale ri wiwi ntalinti ri sabingga puluna Lewuto Kreta etu. Kaopuna naratamo kami ri kasampoa nggedi to nosanga ka Kasampoa Naramba, namosu ngata Lasea.
9 Tempo etu nasae gagamo kami nosumomba sampe naliumo Eo Bete Nggapuasa nto Yahudi. Mana tempo mabelo mosumomba. Sabana etu nangulimo i Paulus ka ira riara sakaya etu,
10 “Sampesuwu-sampesuwu, nantuki pombarataku ane kita mompapola posumombata eꞌi, kana mandasa mpuꞌu kita ngina. Kana marugi mpuꞌu kita, daꞌa aga pangulaya sakaya eꞌi, tapi kita eꞌi woꞌu mamate!”
11 Tapi Yulius etu daꞌa nantuki tesa i Paulus, sabana nipompangalanapa tesa topompajala sakaya bo kapiteena pade tesa i Paulus.
12 Kasampoa Naramba etu daꞌa nabelo rakasampo kami masae ri tempo nu leni. Sabana etu nadea nggari topesawi sakaya kami etu nanguli, “Agina kita mompalasi kasampoa eꞌi pade mompasimbuku mosumomba mpaka ri ngata Feniks masampo ri setu tempo leni.” Ngata Feniks etu saongu kasampoa Lewuto Kreta to nalendu nggari poiri ri tempo leni sabana nantingayo kasolo nu eo ri puluna pade tasina.
Poiri bete rarantasi
13 Tempona etu nompamulamo poiri neburu naole-ole nggari sabingga puluna. Etu sampe nipekiri ira pura-pura patuju ira mapola mpaka ri kasampoa Feniks namala majadi. Sabana etu nionggotaka iramo balango sakaya etu, pade nosumombamo kami nosale ri wiwi ntalinti Lewuto Kreta etu.
14 Tapi daꞌa nasae nggari setu naratamo poiri bete nggari Lewuto Kreta etu to niuli ntau “Poiri Bete nggari sabingga tasina pebulu nu eo.”
15 Sakaya kami etu nirumpa nu poiri bete pade mana mamala mantingayo poiri. Jadi nipalamba kamimo sakaya etu nalome nikeni nu poiri.
16 Tempo kami nalome nikeni nu poiri etu naratamo kami ri sabingga puluna saongu lewuto nggedi nosanga Kauda. Ri tempo etu kami nompasimbuku ante nasusa mpuꞌu nombataja mangore sakaya nggedi to nosanga ka sekoci riara nu sakaya bete etu.
17 Sangga sekoci namala nionggotaka pade niboli ri bunggu nu sakayamo, sakaya bete etu nipakaroso anabua-anabua sakaya ante nipoꞌu nu kaloro nantalili koro nu sakaya etu. Naopu etu nipopanaꞌu iramo somba nu sakaya, sabana naeka ira sakaya etu mombarumpa bone to nasore to namosu talinti tana Libia. Jadi iwetumo sakaya etu nipalamba ira nalome nikeni nu poiri.
18 Daꞌa nenonto poiri naramboso etu nantawui sakaya kami, sampe naeompadondo nitajiaka ira sagaꞌa pangulaya sakaya riara ntasi ala mangaꞌa sakedi sakaya etu.
19 Pade to nailena nitajiaka ira woꞌumo parewa-parewa nu sakaya etu ante pale ira mboto mpaka riara ntasi.
20 Naopu etu bara sakuya mbengimo kasaena kami mana nanggita eo bo betuꞌe, pade poiri woꞌu daꞌa ntoto nenonto karambosona. Kaopuna mana ria panjarumaka kami namala masalama.
21 Bara sakuya mbengi kasaena tau-tau riara sakaya etu daꞌa mana manggoni. Sabana etu nekanggoremo i Paulus ri tatongo ira pade nanguli, “Sampesuwu-sampesuwu, ane komi nantuki tesaku bopia nanguli neꞌe mompalasi Lewuto Kreta, kita eꞌi daꞌa mandasa ante marugi ewa eꞌi!
22 Tapi weꞌi-weꞌi kuperapi ka komi pura-pura, pakaroo rara komi! Daꞌa ria sambaꞌa nggari tatongota eꞌi mamate, tapi sakaya eꞌi kana marugi.
23 Ninjaniku etu sabana iwengi naria sambaꞌa malaeka nggari jaꞌi Alatala to nipesombaku, etumo Alatala to nombajagai aku, narata ri jaꞌiku pade nanguli,
24 ‘Neꞌe maeka, Paulus! Iko kana mapola mantingayo Magau Roma. Pade nggari kabelo nu rara Alatala ri jaꞌimu, pura-pura tau nosanggani-nggani ante iko ri sakaya eꞌi kana masalama.’
25 Sabana etu, sampesuwu-sampesuwu, pakaroomo rara komi, sabana niparasayaku nuapa to niuli Alatala ka aku etu natantumo kana majadi!
26 Tapi sakaya kita eꞌi ngina kana mombarumpa bone nabua namosu wiwi talinti nu saongu lewuto.”
27 Tempo nagana kasampulu patambengina sakaya kami nolanto-lanto ri tasi Adria, kira-kira natongo wengina, anabua sakaya etu nombarasai sakaya ira etu mana nakawao nggari kabatana.
28 Sabana etu niukuru ira kandala nu tasi etu ante lui pade watu, rompulu ndopo kandala nu ue etu. Ira namaju sakedi daꞌa nakawaoka nggari setu pade niukuru ira woꞌumo, sampulu alima ndopo kandala nu tasi etu.
29 Naopu etu niulunjaka ira pataongu balango nggari bagia puri nu sakaya etu ala mompopetaꞌa sakaya, sabana ira naeka sakaya kami etu mombarumpa watu gusu. Pade nisarumaka ira ane mamala masalisa-lisa maeo.
30 Tapi bara sakuya mbaꞌa anabua nu sakaya etu nompasimbuku malai nggari sakaya etu. Niulunjaka ira sekoci mpaka ri bunggu nu tasi ewa ira madota mangulunjaka balango ri kolu nu sakaya etu.
31 Nanggita kajadia etu nangulimo i Paulus ka Yulius ante tantara-tantarana etu, “Ane anabua-anabua sakaya etu mompalasi sakaya eꞌi, komi pura-pura daꞌa ntoto masalama!”
32 Nangepe tesa i Paulus tantara-tantara etu nombadapa kaloro nu sekoci pade nipalamba ira nalome.
33 Tempo ntora maeomo, i Paulus nompakau pura-pura tau kana manggoni. Niulina, “Sampulu patambengimo kasaena komi aga nompopea-pea, daꞌa ria komi nanggoni nuapa-nuapa!
34 Sabana etu kuperapi ka komi, kana manggoni komi sakedi weꞌi-weꞌi. Panggoni etu paraluu rakoni komi ala komi maroso bali pade mamala masalama nggari kasusa eꞌi. Komi pura-pura kana masalama. Daꞌa ria mokuya komi ngina, nau aga sambalaa wulu woꞌo komi daꞌa maronto!”
35 Naopu notesa iwetu, i Paulus nangala roti pade niulina tarima kasi ka Pue Alatala ri ngayo ira pura-pura. Nibagi-bagina roti etu, pade nompamulamo iꞌa nanggoni.
36 Naopu etu naroso bali rara ira pura-pura, pade ira woꞌu nanggoni.
37 Kadea kami pura-pura riara sakaya bete etu, roatu pitumpulu bo onombaꞌa.
38 Naopu nanggoni sampe nabosu puramo, ira nantajiaka gando to naria ri sakaya etu riara ntasi ala mangaꞌa sakedi sakaya etu.
Sakaya nombarumpa bone
39 Tempo naeomo topompajala sakaya etu nanggita kabatana tapi daꞌa ninjani ira kabatana ri umba etu. Nikita ira saongu sidu nu tasi ante talintina. Patuju ira ala sakaya etu rapakasampo ira ri talinti etu.
40 Naopu etu nidapa ira kaloro nu balango-balango, pade balango-balango etu nipalasi ira naboli riara ntasi. Pade niwole ira kaloro-kaloro pompoꞌu guli ala sakaya mamala raguli. Pade niore ira somba ri kolu nu sakaya etu ala poiri mantawui sakaya etu malau mpaka ri talinti.
41 Tapi daꞌapa narata ri talinti etu sakaya kami aga nombarumpa bone nabua. Bagia kolu nu sakaya etu nesua riara bone sampe sakaya etu mana namala mapola, pade bagia ri puri nu sakaya etu naropotaka nirumpa nu balumba bete etu.
42 Nanggita kajadia etu, tantara-tantara etu madota mompatesi pura-pura tau nitaha etu ala daꞌa ria sambaꞌa morabu ri kabatana pade malai.
43 Tapi Yulius nantagi ira sabana iꞌa madota mompakasalama i Paulus etu. Pade nipakauna pura-pura tau to namala norabu motingganawu mokolu riara ntasi morabu mpaka ri talinti etu.
44 Pade tau-tau ntanina kana metuntumaka ante manjoko dopi pade kayu bingga-bingga nu sakaya etu. Jadi ante iwetumo kami pura-pura nasalama nesore ri kabatana.