Tesa Paulus ri ngayo Magau Agripa
26
Pade nangulimo Magau Agripa ka i Paulus, “Iko rawai loga motesa mombabali tesa ntau to nompangadu iko.”
Jadi i Paulus nangonggotaka palena, pade nompamulamo iꞌa notesa iweꞌi:
2 “Magau Agripa to nibilaku, aku nombarasai nauntu mpuꞌu sabana eo eꞌi aku namala motesa ri ngayo komi mombabali pura-pura tesa to nipangadu nto Yahudi ka aku.
3 Kaiyampuuna sabana komi mpuꞌu-mpuꞌu nangginjani pura-pura ada bo pepatuduki to nipoposisala to Yahudi. Sabana etu aku merapi ante mpuꞌu-mpuꞌu ala komi mosabara mangepe tesaku eꞌi.
4 Ninjani ntau to Yahudi puramo jala nggatuwuku nggari kakediku, sabana aku natuwu ri tatongo ira nompamula ri ngataku mboto pade ri ngata Yerusalem woꞌu.
5 Nasaemo ira nosinjani aku eꞌi, pade ane ira madota, mamala ira mantakono tesaku eꞌi. Nompamula nggari tempo aku danakabilasa aku nantuki pepatuduki to Parisi, etumo pepatuduki to mpuꞌu-mpuꞌu nantuki pura-pura Atura agamata to Yahudi.
6 Pade weꞌi-weꞌi aku nenggore ratangara ri ngayo komi ri seꞌi aga sabana aku nomparasaya Alatala kana mompakadupa pojanjina ka totuꞌata nggaolu.
7 Pojanji etumo to nisarumakata nto Yahudi, muli nggari sampulu rombaꞌa ana i Israel. Etumo sampe kita daꞌa nabasa-basa mepue ka Alatala eo wengi. O Magau to nibilaku, aku nipangadu tau-tau to Yahudi sabana aku nanjarumaka pojanji etu!
8 Iwenumo sampesuwu-sampesuwuku to Yahudi? Nokuya komi nompekiri Alatala daꞌa mamala mompakatuwu bali tau namate?
9 Nokolu aku mboto eꞌi woꞌu nompekiri aku kana mompowia mpengele-ngele nuapa to mamala mangewa Yesus to Nazaret etu.
10 Pade etu mpuꞌu-mpuꞌu to nipowiaku ri ngata Yerusalem. Ante sura kuasa nggari jaꞌi balengga-balengga topanggeni agama nadea topomparasaya i Pue Yesus nisuarakaku riara tarunggu. Pade tempo ira nisuku mamate, aku woꞌu nasituju.
11 Nadea ngganimo aku nompandasa ira riara sapo mpodade ala mompasuꞌu ira mombasapu pomparasaya ira ka Yesus. Narau mpuꞌu raraku ri jaꞌi ira sampe aku nalau mompandasa ira sampe ri ngata-ngata ntanina nakawao.”
Paulus nombatesa iwenu iꞌa najadi topomparasaya i Pue Yesus
12 “Ante patuju etu aku nanggeni sura kuasa nggari jaꞌi balengga-balengga topanggeni agama nalau mpaka ri ngata Damsyik.
13 Magau to nibilaku, tempo aku da ri tatongo jala kira-kira tongo eo, aku nanggita reme nggari langi nelabi mpuꞌu karemena nggari reme nu eo. Reme etu nombawanta aku ante roa-roaku sanjala.
14 Kami pura-pura nadungga, pade niepeku suara nanguli ka aku ante Basa Ibrani, ‘Saulus, Saulus, nokuya iko nompandasa Aku? Iko aga mompakasusa koromu mboto ane iko mangewa pekeniakaku!’
15 Pade nekutanamo aku, ‘Isema Komi, Pue?’
Nesono woꞌumo suara etu, ‘Aku eꞌimo Yesus to nipandasamu!
16 Tapi weꞌi-weꞌi pembangumo iko, pade pekanggoremo! Aku nompopokita koroku ka iko ala mangonggotaka iko majadi batuaku bo sabiku. Iko kana mompatolele ka tau-tau ntanina ewa nuapa to nikitamu eo eꞌi pade ewa nuapa kupopokita ka iko ri tempo marata.
17 Iko kana kukabasaka nggari kuasa ntau to Yahudi pade nggari kuasa ntau daꞌa to Yahudi to madota mompakasusa iko. Aku mompakau iko malau mpaka ri jaꞌi ira.
18 Pakanoto rara ira ala ira mamala mesuwu nggariara karumauna pade megoli mesua riara karemena, ala ira mamala makabasaka nggari kuasa Magau nu Seta pade mantarima kuasa nggari jaꞌi Alatala. Pade ante momparasaya Aku silaka-silaka ira raampungi pade ira mamala majadi todea nu Alatala.’”
Paulus nantesa panggawiana nanggeni Kareba Belo
19 “Sabana etu, Magau Agripa, aku eꞌi bate-batena natutu nantuki nuapa to nikitaku riara mpanggitaku nggari jaꞌi Alatala etu.
20 Pamula-mulana aku nalau notesa ka tau-tau to Yahudi ri ngata Damsyik, pade ri ngata Yerusalem ante njumaongu Bagia Yudea. Pade nalau woꞌumo aku ri jaꞌi tau-tau daꞌa to Yahudi. Niuliku ka ira pura-pura, ‘Kana majea komi nggari silaka-silaka, pade megoli mombajuju koro komi ka Alatala. Pade popokita ante pokainggu to nabelo, mpuꞌu-mpuꞌu najeamo komi nggari silaka-silaka etu.’
21 Etumo sabana tau-tau to Yahudi nombasoko aku riara Sapo Mpepue pade ira nompasimbuku mompatesi aku.
22 Tapi naupa iwetu, sampe weꞌi-weꞌi aku danikalendu nu Alatala sampe danamalapa aku nekanggore notesa ka pura-pura tau, nabeloka tau nalanga panggana, nabeloka todea biasa. Nuapa to nitesaku etu nasimbayu ewa nuapa to niboto i Musa ante nabi-nabi ntanina nggaolu.
23 Etumo, Magau to Mompakasalama to nijanji Alatala etu, kana masusa sampe mamate. Pade Iꞌamo pamula-mulana tau namate natuwu bali, ala ante iwetu Iꞌa manggeni reme to mompakabelo pura-pura manusia, nabeloka tau to Yahudi, nabeloka tau-tau daꞌa to Yahudi.”
24 Tempo i Paulus danotesa iwetu, nongaremo i Festus, “Nagilamo, iko Paulus! Pangginjanimu to nadea etu nompakagila iko!”
25 Tapi nesonomo i Paulus, “Aku eꞌi daꞌa nagila, Tua. Tesa-tesa to niuliku eꞌi nakono pade nesuwu nggari pekiriku to nanotona.
26 Ninjani Magau Agripa mboto nuapa to nitesaku paneꞌa nakono. Etu sampe aku nabia notesa iwetu ri ngayona, apa kajadia etu pura-pura daꞌa nitabuniaka.
27 Magau Agripa to nibilaku, ninjaniku komi woꞌu nomparasaya nuapa to niuli nabi-nabi nggaolu.”
28 Pade nangulimo Magau Agripa ka i Paulus, “Niulimu aku eꞌi mamala mupajadi to Karistee riara tempo daꞌa masae eꞌi!”
29 Pade nesonomo i Paulus, “Bara masae bara daꞌa masae, aku merapi doa ka Alatala ala komi pade pura-pura tau to nangepe tesaku eo eꞌi, mamala majadi topomparasaya i Pue Yesus nasimbayu ewa aku. Aga neꞌe sampe komi ratarunggu.”
30 Kaopuna nekanggoremo Magau Agripa pade Gubernur bo i Bernike pade pura-pura tau ntanina to nasiromu etu, pade nesuwumo ira nggari polibu etu.
31 Sangga ira naria ri sawalikuna, nangulimo ira sambaꞌa bo sambaꞌa, “Daꞌa ria kamba sangaya to nipowia ntau eꞌi to masipato rasuku mamate bara ratarunggu.”
32 Nangulimo Magau Agripa ka i Festus, “Kakonona tau eꞌi mamalamo rakabasaka ane iꞌa daꞌa nekitangara ri ngayo Magau Roma.”