Paulus nekitangara ri ngayo Magau Roma
25
Naliu katolumbengina i Festus narata ri propinsi etu, nantendemo iꞌa nggari ngata Kaisarea mpaka ri ngata Yerusalem.
2 Sangga naratapa iꞌa ri setu naratamo balengga-balengga topanggeni agama bo topanggeniaka-topanggeniaka nto Yahudi ri jaꞌina. Pade notesamo ira pepangadu ira ewa i Paulus. Ira mpuꞌu-mpuꞌu nerapi ka i Festus
3 ala ane mabelo rarana ka ira, iꞌa kana mompakau tau manggeni i Paulus mpaka ri ngata Yerusalem. Etu niperapi ira apa nasintuwumo ira mantingawu mompatesi iꞌa ri tatongo jala.
4 Tapi nesonomo i Festus ka ira, “Paulus danitarunggu ri ngata Kaisarea, pade aku mboto mana masaeka manjili gusaꞌa.
5 Jadi agina bara sakuya mbaꞌa topanggeniaka komi nggari seꞌi motua mpasanggani-nggani ante aku mpaka ri ngata Kaisarea. Pade ane maria salana, ri setu pade ratesa komi tesa pepangadu etu.”
6 Naliu i Festus netoꞌo ri ngata Yerusalem walu atau sampulu mbengi kasaena, nanjilimo iꞌa mpaka ri ngata Kaisarea. Narata ri setu, naeo tonailena nesuamo iꞌa ri sapo mpotangara pade nipakauna tau manggeni i Paulus mantingayo iꞌa.
7 Sangga naratapa i Paulus nekanggoremo tau-tau to Yahudi to notua nggari ngata Yerusalem etu nantatiku iꞌa, pade nipamula iramo nombatesa tesa pepangadu ira to natomo-tomona ka iꞌa. Tapi daꞌa ntoto namala ira mompopokita salana to nipangadu ka iꞌa.
8 Naopu ira nompangadu iꞌa iwetu, i Paulus nebali. Niulina, “Aku eꞌi daꞌa nanggawia to najaꞌana. Aku daꞌa nombaliunaka Atura-atura agama to nipapola i Musa, bo daꞌa woꞌu nompakaruto Sapo Mpepue. Pade aku daꞌa nombasapuaka parenta Magau Roma.”
9 Tapi i Festus madota mangala rara to Yahudi, jadi iꞌa nompekutana i Paulus, “Madota iko malau mpaka ri ngata Yerusalem ala iko ratangara ri ngayoku ri setu ewa nuapa to nipangadu ira etu?”
10 Nesonomo i Paulus, “Aku daꞌa madota, sabana aku danenggore ri ngayo polibu mpotangara to nipakatantu Magau Roma mboto eꞌi, pade ri seꞌimo aku masipato ratangara. Ninjani komi mbotomo, Tua, aku eꞌi daꞌa ria salaku ri jaꞌi ntau to Yahudi.
11 Ane aku eꞌi nombaliunaka atura-atura atau nanggawia sangaya sampe aku masipato rasuku mamate, nasadiamo aku mamate. Tapi ane tesa pepangadu ira etu daꞌa nakono, daꞌa ria sambaꞌa mamala mombawai aku ka ira etu. Aku mekitangara ri jaꞌi Magau Roma.”
12 Sangga naopu i Festus notesa-tesa ante topolibu ri setu, nangulimo iꞌa ka i Paulus, “Iko nekitangara ri jaꞌi Magau Roma. Jadi iko kana malau mantingayo Magau etu.”
Paulus ri ngayo Magau Agripa bo Bernike
13 Daꞌa nasae kaliuna naratamo Magau Agripa ante i Bernike ri ngata Kaisarea ala mombabila i Festus sabana iꞌa lako nionggotaka najadi Gubernur.
14 Naopu bara sakuya mbengi ira ri setu, i Festus nombatesa parakara i Paulus ka Magau Agripa. Niuli i Festus, “Ri seꞌi naria sambaꞌa tau nipalamba i Feliks riara tarunggu to nosanga ka i Paulus.
15 Tempo aku naria ri ngata Yerusalem balengga-balengga topanggeni agama ante totuꞌa-totuꞌa to Yahudi nompangadu tau etu. Niperapi ira ala aku mombasuku tau etu.
16 Tapi aku nombasono ira, ‘Nantuki atura kami to Roma, sambaꞌa tau to nipangadu kana mosintingayo ante tau to nompangadu iꞌa, pade rawai loga mombabali tesa ntau to nompangadu iꞌa etu. Ane daꞌapa najadi iwetu daꞌapa mamala iꞌa rawai waꞌamo.’
17 Jadi tempo tau to nompangadu i Paulus etu narata ri seꞌi, daꞌa mana aku nopea nasae-sae. To nailena nipowiakumo polibu mpotangara pade niparentaku ala i Paulus rakeni rapoposintingayo.
18 Tempo tau-tau to nompangadu iꞌa etu nekanggore nompangadu iꞌa, nipekiriku kana maria tesa pepangadu powiana to najaꞌa mpuꞌu. Tapi kakonona daꞌa ria nitesa ira bara sangaya to najaꞌana.
19 Ira aga nosisala pombarata ante iꞌa ewa agama ira mboto, pade woꞌu ewa sambaꞌa tau nosanga ka Yesus. Tau etu namatemo, aga i Paulus etu nanguli Iꞌa natuwu bali.
20 Tempona etu danaingu aku mompekiri bara iwenu aku mamala mompakanoto parakara etu. Jadi nipekutanaku ka i Paulus bara madota iꞌa malau mpaka ri ngata Yerusalem pade ratangara ri setu parakarana.
21 Tapi i Paulus nekitangara ri ngayo Magau Roma. Niperapi i Paulus ala iꞌa rakatono ntani sampe parakarana rabutusi ri ngayo Magau Roma. Etu sampe aku nomparenta ala iꞌa rakatono ntani sampe aku mamala mompakau iꞌa rakeni mpaka ri jaꞌi Magau Roma etu.”
22 Naopu nangepe etu nangulimo Agripa ka i Festus, “Aku woꞌu madota mangepe pantesa ntau etu.”
Nesonomo i Festus, “Naile mamala komi mangepe iꞌa.”
23 To nailena naratamo Magau Agripa ante i Bernike ante tandai kamagauna. Nesuamo ira riara tombi mpolibu mpasanggani-nggani ante balengga-balengga tantara pade madika-madika riara ngata etu. Pade i Festus nomparenta ala i Paulus rakeni mpesuamo.
24 Sangga naratapa i Paulus, nangulimo i Festus, “Magau Agripa, pade pura-pura to naria ri seꞌi. Kita komimo tau eꞌi! Iꞌa nipangadu pura-pura tau to Yahudi ri jaꞌiku, nabeloka to naria ri ngata Yerusalem, nabeloka to naria ri seꞌi. Ira nongare-ngare nerapi ala iꞌa rasuku mamate.
25 Tapi naopu aku nomparesa iꞌa, daꞌa naria kamba sangaya salana nirataku sampe iꞌa masipato rasuku mamate. Kaopuna iꞌa mboto nekitangara ri ngayo Magau Roma. Sabana etu nipakatantukumo iꞌa kana rakeni mpaka ri jaꞌi Magau Roma etu.
26 Aga daꞌapa naria sangaya to nanotona mamala kutulisi ka Magau Roma. Etumo sabana aku nompopotingayo iꞌa etu ka komi pura-pura, to kaiyampuuna ka komi to nibilaku, Magau Agripa. Patujuku ane maopu iꞌa raparesa, kana mariamo to mamala ratulisi ka Magau Roma.
27 Apa nantuki pombarataku daꞌa ntoto masipato sambaꞌa tau rakeni mpaka ri jaꞌi Magau ane daꞌa rapakanoto nuapa ntoto salana to nipangadu ka iꞌa.”