Paulus nipangadu nto Yahudi
24
Limambengi kaliuna notuamo Balengga Topanggeni Agama Yahudi to nosanga ka Ananias bo bara sakuya mbaꞌa topanggeniaka to Yahudi mpaka ri ngata Kaisarea. Nikeni ira woꞌu sambaꞌa topojarita to nosanga ka i Tertulus. Ira nantingayo i Gubernur Feliks, pade nitesa iramo tesa pepangadu ira ewa kasala i Paulus.
2 Paulus nipokio mantingayo i Feliks pade nompamulamo i Tertulus nompangadu i Paulus iweꞌi: “Gubernur to nibilaku, kami todea riara poparenta komi natuwu ante nasana-sana. Pade nggari kanoto komi moparenta, nadeamo to nipakabelo ri ngata kami.
3 Pura-pura panggawia komi to nompakabelo ngata kami eꞌi nitarima kami ante nadamba rara. Pade daꞌa mabasa-basa kami manguli tarima kasi.
4 Jadi ala neꞌe komi masae mopea, kami merapi ala komi mamala mangepe sampalai tesa pepangadu kami to nambukuna eꞌi.
5 Tau eꞌi nirata kami topegado to neliu kajaꞌana. Ri umba-umba ri dunia iꞌa nowia kakanano ri tatongo ntau to Yahudi. Pade iꞌa woꞌu sambaꞌa topanggeniaka ntau to nantuki Pepatuduki Yesus nggari ngata Nazaret.
6 Iꞌa woꞌu nompembai mompakaruto Sapo Mpepue, tapi iꞌa nisoko kami. Patuju kami mombatangara iꞌa nantuki Atura-atura agama kami mboto.
7 Aga balengga tantara i Lisias nangago iꞌa nggari jaꞌi kami,
8 pade niparentana ala pura-pura topangadu kana mantingayo komi. Jadi Gubernur to nibilaku, ane komi momparesa tau eꞌi, kana ranjani komi mboto nggari jaꞌina etu nakono nuapa to nipangadu kami ka iꞌa.”
9 Pade pura-pura tau to Yahudi to naria ri setu woꞌu nompangadu i Paulus pade nantakono nuapa to niuli i Tertulus etu.
Paulus nombabali tesa ntau nompangadu iꞌa ri ngayo Feliks
10 Naopu etu Gubernur nowiataka palena ka i Paulus ala iꞌa motesa. Pade nangulimo i Paulus, “Gubernur to nibilaku, ninjaniku komi nompae-mpaemo najadi topotangara ri ngata eꞌi. Etumo sabana nadamba mpuꞌu raraku mamala mombabali tesa ntau nompangadu aku ri ngayo komi.
11 Mamala komi mboto mompakatantu daꞌapa nelabi nggari sampulu rombengi kaliuna aku nantende mpaka ri ngata Yerusalem nalau mepue ri Sapo Mpepue.
12 Daꞌa ria sanggani tau to Yahudi etu nombarata aku nosinggarau, bara nompowia kakanano, nabeloka riara Sapo Mpepue, nabeloka ri sapo-sapo mpodade, nabeloka riara ngata.
13 Daꞌa woꞌu namala ira mompopokita ka komi tesa pepangadu ira etu nakono.
14 Tapi aku kana mompangaku ri ngayo komi, aku eꞌi nantuki pepatuduki Yesus nombasomba Alatala to nipesomba totuꞌa kami nggaolu. Pepatuduki etu nireke ira to Yahudi eꞌi nasala. Tapi aku batena nomparasaya pura-pura to nitulisi riara buku-buku i Musa pade buku-buku nabi-nabi ntanina.
15 Nasimbayu ante to Yahudi eꞌi aku woꞌu manjarumaka ka Alatala pura-pura tau kana matuwu bali nggari kamatena, nabeloka tau-tau nanoa rarana, nabeloka tau-tau nadenggo rarana.
16 Etumo sabana aku mompasimbuku mpakabelo-belo matuwu ante raraku malusu bo magasa ri ngayo nu Alatala pade ri ngayo manusia woꞌu.
17 Naria bara sakuya mpae aku nompalasi ngata Yerusalem. Pade lako bara sakuya mbengi naliu eꞌi aku nanjili bali nanggeni doi nantulungi sampesuwuku to Yahudi, pade woꞌu ala mombawai pesombaku ka Alatala.
18 Tempo aku danaria ri Sapo Mpepue, naria bara sakuya mbaꞌa tau to Yahudi nggari Propinsi Asia nomposirata aku naopu aku nowia ada nompakagasa koroku. Daꞌa ria nadea tau nosanggani-nggani ante aku, pade daꞌa woꞌu naria kakanano tempo etu.
19 Kakonona kana maria woꞌu ira ri seꞌi mompangadu aku ri ngayo komi ane maria tesa pepangadu ira ka aku.
20 Atau agina tau-tau to nompangadu aku eꞌi motesa nuapa kajaꞌana to nirata ira ri jaꞌiku tempo aku naria ri ngayo Polibu Bete Agama.
21 Daꞌa ria sala ntanina nirata ira, aga sambela tesa eꞌi to nitesaku ri ngayo ira, ‘Aku nitangara eo eꞌi sabana aku nomparasaya tau-tau namate kana matuwu bali.’”
22 Gubernur Feliks nangginjani ante nabelo pepatuduki to niuli Pepatuduki Yesus. Jadi iꞌa nompopenonto polibu etu pade nanguli, “Aku mompakaopu parakara eꞌi ane mariamo balengga tantara i Lisias ri seꞌi.”
23 Naopu etu niparentana sambaꞌa balengga tantara manggatono i Paulus. Tapi naupa iꞌa nikatono, iꞌa niwai loga molumako sakedi pade roana nipaloga marata mantulungi iꞌa.
Paulus ri ngayo Feliks bo Drusila
24 Bara sakuya mbengi kaliuna, naratamo i Gubernur Feliks nosanggani-nggani ante rongona to nosanga ka i Drusila. Drusila etu sambaꞌa tau to Yahudi. Feliks nompakau tau lau mangala i Paulus rakeni ri jaꞌina. Sangga naratapa i Paulus nipetalinga i Feliksmo tesana ewa pomparasayana ka Yesus Kristus.
25 Nangulimo i Paulus ka ira, “Pokaingguta kana manoa, pade kita kana mantaꞌamaka dota rarata to najaꞌana, sabana kita kana ratangara Alatala banepia.”
Tempo i Feliks nangepe tesa i Paulus etu naeka mpuꞌumo iꞌa. Iꞌa nanguli, “Naganamo weꞌi-weꞌi! Kalau ntanimo ruru iko. Ane maria loga damo rapokio motesa woꞌumo.”
26 Kakonona i Feliks nanjarumaka i Paulus mombawai doi ka iꞌa ala iꞌa rakabasaka. Etu sampe mpanggani-ngganimo i Paulus nipokio Feliks motesa-tesa ante iꞌa.
27 Rompae kaliuna, i Feliks etu nisambei, pade i Perkius Festus najadi Gubernur ri bagia etu. Tempo i Feliks nalai, nipalambanamo i Paulus riara tarunggu sabana iꞌa madota mangala rara tau-tau to Yahudi.