23
Narata ri setu i Paulus nompenoto ira Topolibu Bete etu pade nanguli, “Sampesuwu-sampesuwuku, sampe ri eo eꞌi aku natuwu ante raraku nagasa ri ngayo Alatala.”
2 Tempo i Paulus notesa iwetu, Balengga Topanggeni Agama to nosanga ka Ananias nompakau tau to nenggore ri sinjori i Paulus etu mombasapa sumba i Paulus.
3 Pade nangulimo i Paulus ka Ananias, “Komi tau nadenggo, aga tumoni-moni nanoa rara. Komi nekatoko ri setu mombatangara aku nantuki Atura-atura agama to nipapola i Musa, tano komi mboto nombaliunaka Atura-atura etu ante nompakau tau mombasapa aku. Komi mboto kana rasuku Alatala!”
4 Tau-tau ri sinjori i Paulus nanguli ka iꞌa, “Iko nombasalaraka Balengga Topanggeni Agama to nipakatantu Alatala!”
5 Nesonomo i Paulus, “O, sampesuwu pura-pura, daꞌa ninjaniku iꞌa etu Balengga Topanggeni Agama. Ane etu ninjaniku aku daꞌa manguli tesa etu paneꞌa, sabana riara Buku Nagasa naria nitulisi iweꞌi: ‘Neꞌe iko mombasalaraka topanggeniaka todeamu.’” a
6 Nikita i Paulus naria sanu tau riara Mpolibu Bete Agama etu tau to Saduki, pade naria woꞌu sanu tau to Parisi. Sabana etu nitesana ka ira pura-pura, “Sampesuwu-sampesuwu pura-pura, aku eꞌi woꞌu tau to Parisi, muli nto Parisi! Aku nitangara ri seꞌi sabana aku nomparasaya tau namate kana matuwu bali!”
7 Nangepe etu nompamulamo tau-tau to Parisi pade tau-tau to Saduki etu nosinggarau mbotomo sampe Polibu etu natebagi rongu.
8 Etu najadi sabana nantuki pombarata tau-tau to Saduki tau namate daꞌa mana matuwu, malaeka i Pue daꞌa naria, pade malaeka manusia woꞌu daꞌa naria. Aga tau-tau to Parisi nomparasaya etu pura-pura.
9 Jadi neumbamo kakanano najaꞌa mpuꞌu. Nekanggoremo bara sakuya mbaꞌa tau to Parisi to najadi guru agama pade ira mpuꞌu-mpuꞌu nombabali tesa tau-tau to Saduki etu. Niuli ira, “Nantuki pombarata kami, tau eꞌi daꞌa ntoto ria salana, nau aga sakedi. Bara naria anitu atau malaeka i Pue notesa ka iꞌa.”
10 Posinggarau etu mpuꞌu-mpuꞌu najadi nakanano, sampe balengga tantara etu naeka neꞌe-neꞌe i Paulus etu rasemparaka ira. Etu sampe iꞌa nompakau tantarana malau mangala i Paulus nggari tatongo ntau dea etu rakeni ira mpaka ri asrama tantara.
11 Wengi to sambengina naratamo i Pue Yesus nenggore ri sinjori i Paulus pade nanguli, “Pakaroo raramu. Nasimbayu ewa iko nompatolele tesaku ri ngata Yerusalem, iwetu woꞌu iko kana mompatolele tesaku ri ngata Roma.”
Sintuwu nto Yahudi mompatesi Paulus
12-13 Naeompadondo dakabobayana mpuꞌu naria nelabi patampulu mbaꞌa tau to Yahudi nompamula woꞌumo nowia sintuwu. Ira netunda sambaꞌa-sambaꞌa daꞌa manggoni bo manginu ane i Paulus daꞌapa rapatesi ira.
14 Nalaumo ira ri jaꞌi balengga-balengga topanggeni agama ante totuꞌa-totuꞌa to Yahudi pade niuli ira, “Kami eꞌi netunda puramo daꞌapa kami manggoni bo manginu ane i Paulus daꞌapa rapatesi kami!
15 Weꞌi-weꞌi kami merapi ala komi mantulisi sura rapakatu ka balengga tantara Roma merapi iꞌa manggeni i Paulus manjili mantingayo Polibu Bete Agama. Ulimo ka iꞌa danariapa bara sakuya ngaya pompekutana rapekutana komi ka i Paulus. Pade ri tempona etu kami kana masadia mompatesi iꞌa daꞌapa iꞌa marata ri seꞌi.”
16 Tapi naria sambaꞌa kabilasa pinuana i Paulus nangepe nia ira etu. Jadi nalaumo iꞌa mpaka ri asrama tantara pade nitesana nia tau-tau etu ka i Paulus.
17 Naopu nangepe tesa pinuanana etu, i Paulus nompokio sambaꞌa tantara pade niulina ka iꞌa, “Keni ngana eꞌi mpaka ri jaꞌi balengga tantara. Naria sangaya madota ratesana ka iꞌa.”
18 Jadi tantara etu nanggeni ngana etu mpaka ri jaꞌi balengga tantara pade nanguli, “Paulus to nitarunggu komi etu, nompokio aku pade nerapi ala aku manggeni ngana eꞌi mpaka ri jaꞌi komi apa naria sangaya madota ratesana ka komi.”
19 Nangepe etu balengga tantara etu nombanini ngana etu nikenina nompatani ri soso asrama pade nipekutanana, “Nuapa ntoto madota mutesa ka aku?”
20 Nesonomo ngana etu, “Tau-tau to Yahudi nasintuwu merapi ka komi ala komi manggeni i Paulus mantingayo Polibu Bete Agama naile. Ira kana manguli danariapa bara sakuya ngaya pompekutana rapekutana ira ka i Paulus.
21 Tapi kuperapi ka komi, neꞌe ntoto ratuki pomperapi ira etu. Apa ira nelabi patampulu mbaꞌana nasadia neopo ri jala mombalawa i Paulus. Ira pura-pura netunda daꞌa manggoni bo manginu ane i Paulus daꞌapa rapatesi ira. Weꞌi-weꞌi nasadiamo ira. Ira damo mompopea pesono komi.”
22 Nangepe etu nangulimo balengga tantara etu, “Neꞌe mutesa ka isema-sema iko notesa pura-pura eꞌi ri jaꞌiku.” Pade nipakauna ngana etu manjili.
Paulus nikeni mpaka ri jaꞌi Gubernur Feliks
23 Naopu etu balengga tantara etu nompokio rombaꞌa tantarana, pade niulina ka ira, “Pakasadia roatu mbaꞌa tantara pade pitumpulu tantara nesawi jara, pade roatu mbaꞌa tantara notawala. Wengina eꞌi tinti sasio komi kana malai nggari seꞌi mpaka ri ngata Kaisarea.
24 Pakasadia woꞌu jara rapesawi i Paulus. Keni iꞌa mpakabelo-belo sampe marata ri jaꞌi Gubernur Feliks.”
25 Naopu etu balengga tantara etu nantulisi sura ka i Feliks to nanguli iweꞌi:
26 “Gubernur Feliks to nibila kami, tabe nggari jaꞌi kami Klaudius Lisias.
27 Tau eꞌi nisoko nto Yahudi sakedi-kedipa rapatesi iramo. Niepeku iꞌa sambaꞌa todea Magau Roma, jadi nikeniku salunu tantara nompakasalama iꞌa.
28 Naopu etu nikeniku iꞌa mpaka ri Polibu Bete Agama ira, sabana aku madota mangginjani nuapa ntoto salana to nipangadu ka iꞌa.
29 Ri setu nikitaku iꞌa nipangadu ira aga nosinggawela ante Atura-atura agama ira mboto. Daꞌa ria salana to masipato rasuku mamate bara ratarunggu.
30 Naopu etu niepeku naria sintuwu to Yahudi mompatesi iꞌa. Jadi kaliu-liu nipakauku ala iꞌa rakeni mpaka ri jaꞌi komi. Pade nipakauku woꞌu ala pura-pura tau to nompangadu iꞌa malau manggeni tesa pepangadu ira ri jaꞌi komi.”
31 Naopu balengga tantara etu nompakasadia sura etu, tantara-tantara to nipakauna etu nalau mantuki parentana. Nalaumo ira nangala i Paulus pade iꞌa nikeni ira nalai nggawengina etu woꞌu sampe narata ri ngata Antipatris.
32 Pade naeompadondona nanjilimo tantara nolumako nggada patatu mbaꞌa etu, pade tantara nojara etu nanggeni i Paulus napola mpaka ri ngata Kaisarea.
33 Tempo ira narata ri setu niwai iramo sura nggari jaꞌi balengga ira ka Gubernur etu, pade i Paulus woꞌu niwai ira ri jaꞌina.
34 Naopu Gubernur nombabasa sura etu iꞌa nompekutana i Paulus, “Nggari umba ntoto petoꞌomu?” Sangga ninjani Gubernur Festus i Paulus nopuꞌu nggari Propinsi Kilikia, etumo bagia to niparentana mboto,
35 niulina, “Jadi iweꞌimo, aku kana momparesa parakaramu ane pura-pura tau to nompangadu iko marata ri seꞌi.” Pade niparentana tau nanggeni i Paulus rakatono ntani ri sapo i Herodes.