22
“Uma-uma bo sampesuwu-sampesuwu pura-pura, epemo tesaku mompakanoto ka komi isema aku eꞌi!”
2 Tempo tau dea etu nangepe i Paulus notesa ante Basa Ibrani ira nekalino sanggani, pade i Paulus nompapola tesana.
3 Niulina, “Aku eꞌi sambaꞌa tau to Yahudi nipoanaka ri ngata Tarsus ri Propinsi Kilikia. Tapi aku nipakabete ri seꞌi ri ngata Yerusalem, pade nipaguru Guru Bete nosanga ka i Gamaliel. Aku nipatudukina mpakabelo-belo mantuki Atura-atura agama to nipapola i Musa ka totuꞌata nggaolu. Nasimbayu ewa komi ri seꞌi, aku woꞌu mpuꞌu-mpuꞌu natundu ri jaꞌi Alatala.
4 Etu sampe aku nompandasa topantuki-topantuki Pepatuduki Yesus. Naria to nipatesiku, naria to nisokoku pade nisuarakaku riara tarunggu, nabeloka langgai, nabeloka besi.
5 Balengga Topanggeni Agama mboto ante Topolibu Bete Agama mamala mantakono tesaku eꞌi. Sabana ira mbotomo nombawai ka aku sura rakeni ka tau-tau to Yahudi ri ngata Damsyik. Ante sura etu aku mamala mombasoko topomparasaya Pepatuduki Yesus ri setu pade manggeni ira ri ngata Yerusalem ala rasuku.”
Paulus nombatesa iwenu iꞌa najadi topomparasaya i Pue Yesus
6 “Riara mpolumakoku tempo namosumo aku ri ngata Damsyik, ntora natongo eo, sampegoli naria reme nggari langi to nareme mpuꞌu nantatiku aku.
7 Nadunggamo aku pade naria suara niepeku nanguli, ‘Saulus, Saulus! Nokuya iko nompakasusa Aku?’
8 Nekutanamo aku, ‘Isema Komi, Pue?’
Nesonomo suara etu, ‘Aku eꞌimo Yesus nggari Nazaret to nipakasusamu.’
9 Pura-pura tau nantuki aku nanggita reme etu, tapi daꞌa niepe ira suara notesa ka aku.
10 Pade nekutana woꞌumo aku, ‘Nuapa masipato kupowia, Pue?’
Nesonomo Pue, ‘Pembangumo! Kalaumo mesua ri ngata Damsyik. Ri setu pade rauli ka iko nuapa to nipakatantu Alatala mupowia.’
11 Tempo etu naburomo mataku sabana niwanta reme etu. Jadi aku damo ninini roaku nolumako nalau nesua riara ngata Damsyik.
12 Ri setu naria sambaꞌa tau nosanga ka Ananias. Iꞌa sambaꞌa tau nanoa rarana to natutu nantuki Atura-atura agama to nipapola i Musa. Iꞌa mpuꞌu-mpuꞌu nibila pura-pura tau to Yahudi to netoꞌo ri ngata Damsyik.
13 Naratamo iꞌa nanggita aku. Nenggoremo iꞌa ri sinjoriku pade nanguli, ‘Sampesuwuku, Saulus, boaraka matamu. Iko kana mekita bali.’ Kaliu-liu nabelomo mataku pade aku nanggita Ananias.
14 Naopu etu nangulimo iꞌa ka aku, ‘Alatala to nipesomba totuꞌata nggaolu nompelisi iko ala munjani nuapa dotana. Iꞌa nompelisi iko manggita Yesus, Batuana to nanoa, pade mangepe tesa nggari jaꞌina mboto.
15 Iko kana majadi sabina mompatolele nuapa to nikitamu bo nuapa to niepemu ka pura-pura tau.
16 Weꞌi-weꞌi neꞌe mana mompopea masae. Pembangumo, waimo koromu radiu ewa tandaina komi topomparasaya i Pue Yesus. Pekakaimo iko ka i Pue Yesus ala silakamu raampungi.’
17 Sampesuwu-sampesuwu, naopu etu nanjilimo aku mpaka ri ngata Yerusalem, pade tempo aku nosambaya riara Sapo Mpepue nikitaku saongu panggita.
18 Nikitaku i Pue Yesus notesa ka aku iweꞌi: ‘Palasimo ngata Yerusalem masalisa, apa tau-tau ri seꞌi daꞌa madota mantarima posabimu ewa Aku.’
19 Tapi nangulimo aku, ‘Pue, ira kana mantarima etu, sabana ninjani ira powiaku bopia, iwenu aku nesua ri sapo-sapo mpodade manjoko bo mombaboba pade mombasuaraka topomparasaya Komi riara tarunggu.
20 Iwetu woꞌu tempo sabi Komi i Stefanus nipatesi ira. Aku mboto naria ri setu, pade aku nasituju iꞌa rapatesi. Pade aku eꞌimo topanggatono pakea tau-tau to nompatesi iꞌa.’
21 Tapi nanguli woꞌumo i Pue ka aku, ‘Kana kalau, sabana Aku mompakau iko malau ri ngata-ngata to nakawaona ri jaꞌi tau-tau daꞌa to Yahudi.’”
Paulus nikeni ri asrama tantara Roma
22 Tau dea etu nalino nangepe tesa i Paulus. Tapi tempo iꞌa nanguli iꞌa nalau mpaka ri jaꞌi ntau daꞌa to Yahudi, mana madota ira mangepe tesana. Nongaremo ira ante suara namangga mpuꞌu, “Patesimo tau etu! Iꞌa daꞌa mana masipato matuwu!”
23 Tempo nongare-ngare ira woꞌu nombawonto-wonto baju-baju ira pade nanggamburaka sowu ri laerawa sabana ira mpuꞌu-mpuꞌu narau.
24 Nanggita etu balengga tantara Roma nomparenta ala i Paulus rakeni ri asrama tantara. Patujuna ala iꞌa raparesa ri setu pade raporo ala ranjani nuapa sabana tau-tau to Yahudi etu nongare-ngare iwetu ka iꞌa.
25 Tapi tempo i Paulus nisoꞌomo ala raporo, nangulimo iꞌa ka balengga tantara to nenggore ri setu, “Nipaloga todea Magau Roma raporo nau daꞌapa nitangara?”
26 Nangepe tesa i Paulus, nalaumo tantara etu mpaka ri jaꞌi balengga ira pade nanguli, “Agina rapekiri ntanimo ruru nuapa rapowia komi ka tau eꞌi, Tua, sabana iꞌa todea Magau Roma.”
27 Nangepe etu nalaumo balengga tantara etu ri jaꞌi Paulus, pade nipekutanana, “Uli ka aku! Iko todea Magau Roma?”
Nesonomo i Paulus, “Iyo, nakono.”
28 Pade nanguli woꞌumo balengga tantara etu, “Aku eꞌi najadi todea Magau Roma ante nadea mpuꞌu nibayariku!”
Nesono woꞌumo i Paulus, “Tapi aku eꞌi todea Magau Roma nggari pesuwuku.”
29 Nangepe etu kaliu-liu nokanggauramo tantara-tantara to nasadia mombaporo i Paulus etu. Pade balengga tantara etu woꞌu naeka, sabana iꞌa nombasoꞌo i Paulus, tano i Paulus etu todea Magau Roma.
Paulus ri ngayo Polibu Bete Agama
30 Balengga tantara Roma etu mpuꞌu-mpuꞌu madota mangginjani nuapa sabana to nakonona tau-tau to Yahudi nombasalaraka i Paulus. Sabana etu to nailena iꞌa nompakau pura-pura balengga topanggeni agama ante Polibu Bete Agama masiromu. Pade i Paulus nipopesuwu nggariara tarunggu pade nikeni mantingayo ira.