21
Ri setu nopasabimo kami ka topanggeniaka-topanggeniaka topomparasaya nggari ngata Efesus etu, pade nipalasi kamimo ira.
Paulus nalau mpaka ri ngata Yerusalem
Kami nesawi sakaya napola mpaka ri Lewuto Kos. Pade to nailena naratamo kami ri Lewuto Rodos. Nggari setu nosumomba woꞌumo kami napola mpaka ri kasampoa sakaya ri ngata Patara.
2 Ri Patara kami nomposintomu sakaya malau mpaka ri Bagia Fenisia. Sakaya etumo nipesawi kami pade nalau nosumomba.
3 Nalaumo kami sampe nanggita Lewuto Siprus. Lewuto etu niliunaka kami ri sabingga njidi pade napolamo kami mpaka ri Bagia Siria. Nasampomo kami ri ngata Tirus sabana ri setumo pangulaya sakaya to nipesawi kami rataꞌuraka.
4 Ri ngata Tirus etu kami nalau nanggita topomparasaya i Pue Yesus pade netoꞌo ri jaꞌi ira santipa kasaena. Ante pekeniaka Nosa Nagasa ira nompopatora ka i Paulus, “Agina neꞌe mantende mpaka ri ngata Yerusalem!”
5 Tapi sangga naganamo santipa kami netoꞌo ri setu nipalasi kamimo ira nalau nompapola polumako kami. Ira pura-pura nosanggani-nggani ante ana bo rongo ira nanggeni kami mpaka ri sawaliku ngata. Ri wiwi talinti setumo kami pura-pura notimbakotu nosambaya.
6 Naopu etu nopasabimo kami nesawi sakaya. Pade nanjilimo ira mpaka ri sapo ira pura-pura.
7 Nggari ngata Tirus etu nosumombamo kami sampe narata ri ngata Ptolemais. Ri setu kami nalau nombawai tabe ka topomparasaya i Pue Yesus. Pade netoꞌomo kami ante ira sambengi kasaena.
8 Naeompadondo nalai woꞌumo kami sampe narata ri ngata Kaisarea. Narata ri setu nalaumo kami netoꞌo ri sapo i Filipus sambaꞌa topanggeni Kareba Belo. Iꞌa sambaꞌa nggari tatongo ira pitumbaꞌa tau to nipelisi bopia mantulungi suro-suro.
9 Naria ana i Filipus patambaꞌa randoo. Ira patambaꞌa etu nabi to niwai Alatala ka noto bo pompakule mompasimbayu tesa nggari jaꞌi Alatala.
10 Naopu bara sakuya mbengi kami netoꞌo ri setu naratamo sambaꞌa nabi nggari Bagia Yudea to nosanga ka Agabus.
11 Iꞌa narata ri jaꞌi kami pade nialana sulepe i Paulus, pade nisoꞌona ka kadana bo palena mboto pade niulina, “Iweꞌimo to niuli Nosa Nagasa nu Alatala: ‘Pue sulepe eꞌi kana rasoꞌo ntau to Yahudi ri ngata Yerusalem iweꞌi, pade rawai ka tau-tau daꞌa to Yahudi.’”
12 Sangga nangepe tesana etu, kami ante pura-pura topomparasaya to netoꞌo ri ngata Kaisarea nerapi ka i Paulus ante mpuꞌu-mpuꞌu, “Neꞌe mapola mpaka ri ngata Yerusalem!”
13 Tapi nesonomo i Paulus, “Nokuya komi nageo nompakagero raraku? Nasadiamo aku eꞌi mpaka ri ngata Yerusalem daꞌa aga rapoꞌu tapi sampe mamate woꞌu sabana aku topomparasaya i Pue Yesus!”
14 Daꞌa madota i Paulus nangepe tesa kami. Jadi nenontomo kami nombatagi iꞌa. Pade nanguli kami, “Palambamo dota i Pue madupa.”
15 Naopu netoꞌo ri setu bara sakuya mbengi kasaena, nompakasadiamo kami mantende mpaka ri ngata Yerusalem.
16 Naria bara sakuya mbaꞌa topomparasaya nggari ngata Kaisarea woꞌu nalau mpasanggani-nggani ante kami. Ira nanggeni kami mpaka ri sapo i Manason ri ngata Yerusalem, apa ri sapona etu rapesai kami maturu. Manason etu sambaꞌa tau nggari Lewuto Siprus to nasaemo najadi topomparasaya i Pue Yesus.
Paulus nantalioda Yakobus
17 Sangga narata ri ngata Yerusalem kami nitarima ntopomparasaya ri setu ante nadamba rara.
18 Tonailena i Paulus nosanggani-nggani ante kami nalau nantalioda Yakobus. Pura-pura topanggeniaka topomparasaya naria woꞌu ri setu.
19 Naopu kami nombatabe ira, i Paulus nombatesa ka ira nuapa pura to nikawia Alatala niposabana iꞌa ka tau-tau daꞌa to Yahudi.
20 Naopu nangepe tesa i Paulus etu Yakobus ante topanggeniaka-topanggeniaka topomparasaya ntanina etu nantoiya Alatala. Pade niuli ira ka i Paulus, “Sampesuwu, kana ranjani komi nonjobu-njobumo to Yahudi nomparasaya i Pue Yesus. Ira pura-pura etu natutu nantuki Atura-atura agama to nipapola i Musa.
21 Tapi niepe ira komi nompatuduki tau-tau to Yahudi to netoꞌo ri tatongo ntau daꞌa to Yahudi ala manggabasaka Atura-atura etu. Niepe ira woꞌu komi nanguli neꞌe mana mombasuna ana ira pade woꞌu mana mantuki ada-ada nto Yahudi.
22 Weꞌi-weꞌi to Yahudi to nomparasaya etu kana mangepe nariamo komi ri seꞌi. Jadi weꞌi-weꞌi,
23 aginapa komi mantuki tesa kami eꞌi. Naria patambaꞌa tau ri seꞌi to nojanji ri ngayo i Pue nantuki adata.
24 Agina komi malau mompowia ada mompegasa koro mpasanggani-nggani ante ira, pade komi mombabayari oli pura-pura anu rapepue ira, ala woꞌo ira mamala ragau nantuki pojanji ira etu. Ante iwetu kana manotomo ka pura-pura tau nuapa to niepe ira ewa komi daꞌa nakono, apa komi mboto nantuki Atura-atura agama to nipapola i Musa.
25 Ane tau-tau daꞌa to Yahudi to nomparasaya i Pue Yesus, nipakatu kami ka suramo mompakatantu atura-atura nuapa paraluu ratuki ira. Etumo, ira daꞌa mamala manggoni panggoni to nipakoni ka pue ntanina, daꞌa mamala manggoni lei bara manggoni bau nggari binata namate pudu, pade daꞌa mamala ira mosampaturu ante tau daꞌa rongo ira mboto.”
26 Nangepe etu nasitujumo i Paulus ante tesa Yakobus bo topanggeniaka-topanggeniaka ntanina etu. Jadi naeompadondona nalaumo iꞌa mompowia ada mompegasa koro nosanggani-nggani ante ira patambaꞌa. Naopu etu nesuamo ira riara Sapo Mpepue notesa ka topanggeni agama ri setu nepitumbengipa ada mompegasa etu maopu pade pesomba ira sambaꞌa bo sambaꞌa rakeni rapesomba ka Alatala.
Paulus nisoko ri Sapo Mpepue
27 Tempo ntora naopu tempo nipakatantu ira mompowia ada mompegasa koro etu, naria bara sakuya mbaꞌa to Yahudi nggari Propinsi Asia nanggita i Paulus riara Sapo Mpepue. Ira nompakagado todea ri setu pade nanjoko i Paulus,
28 ante nongare-ngare, “Tau-tau to Israel, tulungimo kami! Eꞌimo tau to nalau ri umba-umba nompatuduki tau pura-pura nangewa kita to Yahudi! Iꞌa nompatuduki tau mombabali Atura-atura agama to nipapola i Musa pade manjalai Sapo Mpepue eꞌi! Pade weꞌi-weꞌi iꞌa nanggeni tau daꞌa to Yahudi nesua riara Sapo Mpepue nompakaruto petoꞌo to nagasana eꞌi!”
29 Niuli ira iwetu, sabana nikita iramo i Trofimus sambaꞌa tau daꞌa to Yahudi nggari ngata Efesus etu naria nosanggani-nggani ante i Paulus riara ngata, pade nipekiri ira i Paulus nanggeni iꞌa nesua ri Sapo Mpepue.
30 Nangepe etu nagado mpuꞌumo pura-pura tau riara ngata Yerusalem, pade nangowamo ira mpasanggani-nggani mpaka ri Sapo Mpepue nanjoko i Paulus. Iꞌa niumbunjai ira mpaka ri sawalikuna. Tempo etu kaliu-liu pewobo Sapo Mpepue etu nipiku.
31 Tempo topegado etu nompasimbuku mompatesi i Paulus naria tau nalau nopakilu ka balengga tantara Roma, “Nagadomo njumaongu ngata Yerusalem!”
32 Nangepe pakilu etu balengga tantara nasalisa nangala tantara-tantarana pade nalaumo ira mpaka ri petoꞌo to nagadona etu. Tempo tau dea etu nanggita balengga tantara ante roana narata, nenontomo ira nombaboba i Paulus.
33 Nalaumo balengga tantara etu nanjoko i Paulus pade nipakauna tau nombasoꞌo iꞌa ante rongu rante. Naopu etu nipekutanana ka tau dea etu, “Isema tau eꞌi? Nuapa nipowiana?”
34 Sagaꞌa nggari tau dea etu nanguli iweꞌi, pade naria woꞌu sagaꞌa nanguli iwetu. Iwetu kagadona sampe balengga tantara etu daꞌa namala nangginjani nuapa kakonona to najadina. Etu sabana iꞌa nomparenta ala i Paulus etu kana rakeni ri asrama tantara.
35 Tempo tantara to nanggeni iꞌa narata ri tangga asrama etu, topegado-topegado etu nanggarau mpuꞌu sampe i Paulus damo nikowa tantara nesua mpaka riara asrama.
36 Ira topegado etu netuki nggari puri pade nongare-ngare, “Patesimo iꞌa!”
Tesa Paulus ka todea
37 Tempo ira ntora nesua riara asrama tantara, nangulimo i Paulus ka balengga tantara, “Mamala aku motesa ka komi sampalai?”
Nangulimo balengga tantara ka iꞌa, “Hai! Namala tanu iko notesa ante Basa Yunani!
38 Ane iwetu iko daꞌa tau to Masir to nangewa pomarenta pade nanggeni patanjobu mbaꞌa topepatesi nalai ri karawa baina bopia!”
39 Nesonomo i Paulus, “Daꞌa. Aku eꞌi tau to Yahudi nggari ngata natolele, etumo ngata Tarsus ri Propinsi Kilikia. Aku merapi, wai ka aku loga motesa ka tau dea eꞌi.”
40 Naopu etu balengga tantara nompaloga i Paulus motesa. Jadi nenggoremo i Paulus ri tangga ri setu pade niwiatakana palena ala ira malino mangepe tesana. Nalinomo ira sakedi pade nompamulamo i Paulus notesa ka ira ante Basa Ibrani.