Polumako Paulus nggari Makedonia mpaka ri Troas
20
Sangga nalinomo kakanano ri ngata Efesus etu, i Paulus nompasiromu todea topomparasaya pade notesamo iꞌa nompakaroso rara ira. Naopu etu nopasabimo iꞌa pade nalau nolumako mapola mpaka ri Propinsi Makedonia.
2 Riara mpolumakona etu iꞌa nompesayo ngata-ngata ri Makedonia etu pade nompatuduki mompakaroso rara topomparasaya-topomparasaya ri setu. Naopu etu napolamo iꞌa mpaka ri Propinsi Akhaya, tana nto Yunani.
3 Tolumbula kasaena iꞌa netoꞌo ri setu. Naopu etu iꞌa nopatuju mesawi sakaya mpaka ri ngata Yerusalem ri Propinsi Siria. Tapi daꞌapa iꞌa nalai, naria kareba niepena to nanguli tau-tau to Yahudi ri setu nosintuwu mompatesi iꞌa. Jadi nipakatantuna manjili mantuki jala kabatana mombaliunaka Propinsi Makedonia.
4 Naria bara sakuya mbaꞌa roa i Paulus to nosanggani-nggani ante iꞌa. Ira etumo, i Sopater ana i Pirus nggari ngata Berea, Aristarkhus bo i Sekundus tau to Tesalonika, pade i Gayus nggari ngata Derbe. Naria woꞌu i Timotius, i Tikhikus bo i Trofimus, pura-pura tau nggari Propinsi Asia. a
5 Ira pura-pura nokolu ka kami pade nompopea kami ri ngata Troas.
6 Naopu etu kami nantuki jala kabatana sampe ri ngata Filipi. Sangga naliupa Posusa Eo Bete Roti Daꞌa Nidika Ragi, nesawi sakayamo kami nggari ngata Filipi etu. Pade limambengi nggari setu kami nosintomu woꞌu ante roa-roa kami etu ri ngata Troas. Pade netoꞌomo kami ri setu santipa kasaena.
Eutikhus nanawu nggari tilalaba
7 Wengi eo Aka kami nasiromu nanggoni mpasanggani ante topomparasaya-topomparasaya ri ngata Troas. Paulus nompatuduki pade notesa sampe natongo wengina, sabana patujuna naile mpadondo manggaliwo ngata etu.
8 Tombi nikasiromu kami etu ri tombi katolunjunjuna. Nadea poindo nitunju ri setu.
9 Naria sambaꞌa kabilasa nosanga ka Eutikhus nekatoko ri tilalaba. Tempo i Paulus notesa-tesa nasae, nangantu mpuꞌumo kabilasa etu sampe napisimo iꞌa ri tilalaba etu. Pade nanawumo iꞌa nggari tilalaba tombi katolunjunjuna etu mpaka ri tana. Tempo tau nanaꞌu mangonggotaka iꞌa, namatemo iꞌa.
10 Tapi i Paulus nanaꞌu mpaka ri tambena pade niobona kabilasa etu, pade nikalipuina. Pade niuli i Paulus ka tau-tau nantaguni tomate etu, “Neꞌe masusa rara komi, natuwu balimo iꞌa.”
11 Naopu etu nepone bali i Paulus ri tombi kalangana ri kasiromu ira etu, pade nibagi-bagina roti pade nanggoni mpasanggani-nggani ante ira. Naopu nanggoni notesa woꞌumo iꞌa ka topomparasaya-topomparasaya ri setu sampe naeo. Naopu etu nanggaliwomo iꞌa.
12 Kabilasa to namate nanawu etu natuwu balimo. Iꞌa nikeni nu roana mpanjili, pade nadamba mpuꞌumo rara ira pura-pura.
Posumomba nggari Troas mpaka ri Miletus
13 Naopu etu nalaumo kami mpaka ri sakaya bete pade nosumomba nokolu mpaka ri ngata Asos mantomunaka i Paulus ri setu. Iwetu to nipakatantu i Paulus sabana iꞌa madota molumako mpaka gusaꞌa mantuki jala kabatana.
14 Sangga nosintomupa kami ante i Paulus ri Asos, nesawi sakayamo iꞌa pade nosumomba kami pura-pura mpaka ri ngata Mitilene.
15 Nggari setu nosumomba woꞌumo kami, pade eo to nailena naratamo kami ri ntoto Lewuto Khios. Pade to nailena woꞌumo naratamo kami ri Lewuto Samos. Pade sambengipa naratamo kami ri ngata Miletus, kasampoa nu ngata Efesus.
16 Nggari pamula nu posumomba kami i Paulus nompakatantu mana mesai ri ngata Efesus ala neꞌe malera ri Propinsi Asia. Iꞌa nompari-mpari malau ala ane mamala, iꞌa kana maria ri ngata Yerusalem mantuki Posusa Eo Bete Pentakosta ri setu.
Tesa Paulus ka topanggeniaka topomparasaya nggari Efesus
17 Nggari ngata Miletus i Paulus nompakatu kareba mpaka ri ngata Efesus nompokio topanggeniaka-topanggeniaka topomparasaya ri setu marata mosintomu ante iꞌa ri ngata Miletus.
18 Sangga naratapa ira, nangulimo i Paulus ka ira, “Sampesuwu-sampesuwuku, ninjani komi iwenu katuwuku ri tatongo komi nggari karataku pamulana ri Propinsi Asia eꞌi sampe weꞌi-weꞌi.
19 Ante kaede nu raraku aku nobago ka i Pue ri seꞌi. Riara bagoku etu nadea ue mataku natiti pade nadea kapari nirasaiku sabana nia tau-tau to Yahudi madota mompatesi aku.
20 Ninjani komi aku eꞌi daꞌa natonggo raraku mompasimbayu ka komi nuapa to noguna ka komi. Aku batena nompatuduki komi, nabeloka ri ngayo ntodea, nabeloka ri sapo-sapo komi.
21 Aku batena nompopanjani ka komi pura-pura, nabeloka tau-tau to Yahudi, nabeloka tau-tau daꞌa to Yahudi, ala komi majea nggari silaka-silaka komi pade marata ri jaꞌi Alatala ante momparasaya Pueta, i Pue Yesus.
22 Weꞌi-weꞌi aku malau mpaka ri ngata Yerusalem nantuki parenta Nosa Nagasa nu Alatala ka aku. Daꞌapa ninjaniku nuapa pura majadi ri jaꞌiku ri setu.
23 Aga to ninjaniku ri umba-umba ngata nikalauku Nosa Nagasa nompakanoto ka aku, aku kana rasoko rasuaraka riara tarunggu pade mombarasai kasusa bo kapari ri ngata Yerusalem.
24 Tapi mana kupotowe koroku eꞌi, bara mamate bara matuwu, kana kupajala bagoku to niparasaya i Pue Yesus ka aku sampe kaopu nggatuwuku. Bagoku etumo mompatolele Kareba Belo ewa towe belo nu Alatala.
25 Sampesuwu-sampesuwuku, weꞌi-weꞌi ninjaniku komi to nitunggaiku mompatolele tesa ewa Poparenta nu Alatala, mana banepia sanupa komi manggita aku eꞌi.
26 Sabana etu ante mpuꞌu-mpuꞌu raraku aku manguli ka komi eo eꞌi, ane rapana maria nggari jaꞌi komi banepia to mawela pesuku Alatala sampe ri kasae-saena, etu sala komi mboto! Etu daꞌa salaku,
27 sabana aku daꞌa natonggo raraku mompatuduki ka komi pura-pura nia Alatala. Etu pura-pura nipatoleleku ka komi!
28 Komi kana mombajagai koro komi mboto. Pade jagai woꞌu pura-pura anggota gareja to niparasaya Nosa Nagasa nu Alatala ka komi. Nasimbayu ewa topoewu nompiara bimba-bimbana komi kana mompiara todea nu Alatala etu to niolina ante lei nu Anana mboto.
29 Ninjaniku ane malaimo aku mompalasi komi kana marata tau-tau najaꞌa ri tatongo komi mompakasusa todea to nipiara komi nasimbayu ewa asulako marata mombabaga bimba.
30 Pade nggari tatongo komi woꞌu kana meumba tau to mompatuduki to nadenggona. Ira mowia iwetu ala mompakeni topomparasaya i Pue Yesus malai nggari jala to nakonona malau mantuki jala ira to nasalana.
31 Sabana etu komi kana mainga. Toramo, tolumpae kasaena, ante nadea ue mataku natiti, eo wengi aku daꞌa nenonto mompatuduki mompopainga komi sambaꞌa bo sambaꞌa.
32 Jadi weꞌi-weꞌi, sampesuwu-sampesuwuku, kujujumo katuwu komi riara mpale i Pue ala Iꞌamo to mompiara komi. Pade kuuli ka komi, tukimo Tesa nu Alatala to nompakanoto towe belona ka kita. Iꞌamo to namala mompakaroso pomparasaya komi pade mombawai ka komi rasi to nipakasadiana ka tau-tau to nipelisina majadi todeana.
33 Daꞌa ria sanggani aku naino ka doi bara pakea ntau.
34 Ninjani komi mbotomo iwenu ante paleku mboto aku nobago nompakagana to niparaluuku ante roa-roaku sampokarajaa.
35 Ante mpengele-ngele akala niwaiku jonjo ka komi iwenu kita kana mobago ala mantulungi roa-roata to nakasiasi. Kita kana mompariara ntaꞌi tesa i Pue Yesus to nanguli, ‘Neliupa kabelona ane kita mombawai pade kita mantarima.’”
36 Sangga naopupa i Paulus notesa etu pura-pura, notimbakotumo iꞌa mpasanggani-nggani ante ira pura-pura nggari ngata Efesus, pade iꞌa nosambaya.
37 Ira etu notumangi puramo, pade nikalipui ira i Paulus pade nieki ira iꞌa.
38 Mpuꞌu-mpuꞌu nalebuku rara ira sabana i Paulus nanguli ka ira, “Mana banepia sanupa komi manggita aku eꞌi.” Naopu etu ira nanggeni i Paulus sampe ri sakaya.