Paulus ri ngata Efesus
19
Tempo Apolos danaria ri ngata Korintus, i Paulus nompesayo ngata-ngata ri buluna ri Bagia Galatia bo Frigia, pade naopu etu naratamo iꞌa ri ngata Efesus. Ri setu iꞌa nosintomu ante bara sakuya mbaꞌa topomparasaya i Pue Yesus,
2 pade nekutanamo iꞌa ka ira, “Tempo komi nomparasaya i Pue Yesus komi nipesua Nosa Nagasa nu Alatala?”
Nesonomo ira, “Daꞌapa. Daꞌapa niepe kami nariamo Nosa Nagasa nu Alatala etu.”
3 Pade nekutana woꞌumo i Paulus, “Ane iwetu, pepatuduki isema to nituki komi tempo komi nidiu?”
Nesono ira, “Pepatuduki to nipatolele Yohanes.”
4 Pade nangulimo i Paulus, “Yohanes etu nombadiu tau ewa tandaina najeamo ira nggari silaka-silaka ira. Pade iꞌa woꞌu nompatuduki ka tau-tau to Yahudi ira kana momparasaya sambaꞌa tau to marata ri purina, etumo Yesus.”
5 Tempona ira nangepe tesa i Paulus etu, ira to Efesus nidiu woꞌu ante sanga i Pue Yesus.
6 Paulus nombadika palena ri balengga ira pade kaliu-liu nanaꞌumo Nosa Nagasa nu Alatala nesua ri jaꞌi ira. Pade nompamulamo ira notesa ante basa-basa to nopuꞌu nggari jaꞌi Nosa Nagasa nu Alatala pade nompasimbayu tesa nggari jaꞌi Alatala.
7 Kadea ntau etu, kira-kira sampulu rombaꞌa.
8 Tempona i Paulus naria ri ngata Efesus, riara tolumbula kasaena iꞌa naoso nalau ri sapo mpodade nto Yahudi. Ri setu ante kabiana iꞌa notesa nosinjula pekiri ante ira ala manggeni ira momparasaya tesa ewa Poparenta nu Alatala.
9 Tapi bara sakuya mbaꞌa tau ri tatongo ira etu nakoꞌo rara pade daꞌa madota momparasaya. Ri ngayo ntau pura-pura to nasiromu ri setu, ira nanjalai pepatuduki i Pue etu. Etumo sabana i Paulus nompalasi ira, pade nipakenina tau-tau to nomparasaya i Pue Yesus nalau mpaka ri sapo mpokulia i Tiranus. Ri setu eo-eo ira nosinjula pekiri ante tau-tau ntanina.
10 Etumo to nipowia i Paulus rompae kasaena, sampe pura-pura tau to netoꞌo ri Propinsi Asia nangepe Tesa nu Pue, nabeloka tau to Yahudi, nabeloka tau daꞌa to Yahudi.
Tesa ana-ana Skewa
11 Alatala nombawai kuasa ka i Paulus nompowia kabaraka-kabaraka to nontani nggari ntanina,
12 sampe nau aga pasapu bara buya to nipakena nikeni ka tau-tau najuꞌa, juꞌa ira etu nabelo, pade seta-seta to nesua riara ntau nesuwu nggari jaꞌi ira.
13-14 Ri tempo etu naria bara sakuya mbaꞌa sando to Yahudi to nalau ri umba-umba nompopalai seta nggari jaꞌi ntau. To nompowia etu iramo pitumbaꞌa langgai, ana nu sambaꞌa balengga topanggeni agama Yahudi to nosanga ka i Skewa. Ira nompembai mompake sanga i Pue Yesus mompopalai seta-seta nggari jaꞌi ntau. Niuli ira, “Ante sanga Yesus to nipatolele i Paulus etu kami mompopalai iko!”
15 Tapi nesonomo seta etu, “Ane Yesus, ninjaniku Iꞌa, pade i Paulus woꞌu ninjanikumo. Tapi iko eꞌi, daꞌa ria batuana!”
16 Pade nekawantumo tau nipesua nu seta etu nombarumpa nombabaga ira pitumbaꞌa sampe ira pura-pura nidagina. Ira nangowa nalai nggari sapo ntau etu ante bela bo nelaya, sabana baju bo poruka ira etu niseri-seri ntau etu nggari koro ira pitumbaꞌa.
17 Pura-pura tau to netoꞌo ri ngata Efesus nangepe kajadia etu, nabeloka tau-tau to Yahudi, nabeloka tau-tau daꞌa to Yahudi. Sangga nangepe etu nogumaa puramo ira, pade sanga i Pue Yesus nantambai nibila pade nitoiya ira.
18 Nadea mbaꞌa nggari tatongo ira to nomparasaya i Pue Yesus etu nompangaku ri ngayo ntodea powia-powia ira to najaꞌana.
19 Pade naria woꞌu to nabiasa nompake pangginjani to najaꞌana nompasiromu buku-buku ira, pade etu nipalabu ira ri ngayo ntodea. Nibila ira oli nu buku etu, kira-kira limampulu njobu mpeka doi salaka kadeana. a
20 Jadi nggari kajadia-kajadia nabaraka ewa etu, nantambai eona nantambai kadea ntau nangepe Tesa i Pue, pade nantambai kadea ntau to nompangala Tesa etu.
Demetrius nompopeumba kakanano ri ngata Efesus
21 Naopu kajadia-kajadia etu, i Paulus nonia malau mpaka ri Propinsi Makedonia ante Propinsi Akhaya, pade naopu etu patujuna mapola mpaka ri ngata Yerusalem. Niulina ka roana, “Maopu aku mpaka ri ngata Yerusalem, aku kana malau mpaka ri ngata Roma woꞌu.”
22 Jadi nipakauna rombaꞌa roana sampokarajaa mokolu ka iꞌa mpaka ri Propinsi Makedonia. Sanga ira rombaꞌa, etumo i Timotius pade Erastus. Tapi i Paulus mboto danetoꞌo bara sakuya mbengipa kasaena ri Propinsi Asia.
23 Kira-kira ri tempona etu woꞌu, neumbamo kakanano to nabetena ri ngata Efesus nggari pepatuduki i Pue Yesus. Iweꞌimo tesana.
24 Ri ngata etu naria sambaꞌa pande nu salaka to nosanga ka i Demetrius. Panggawiana mowia sapo-sapo nggedi nolenje sapo mpepue ka wiata Artemis. b Nggari panggawiana etu nadea mpuꞌu asele to nirata i Demetrius pade roa-roana.
25 Iꞌa nompasiromu pura-pura roana sampokarajaa ante pande-pande salaka ntanina to nowia sapo-sapo nggedi wiata Artemis, pade niulina ka ira, “Sampesuwu-sampesuwu, ninjani komi mboto nggari panggawiata eꞌi pade kita matuwu.
26 Weꞌi-weꞌi nikita komi pade niepe komi mbotomo nuapa to nipowia i Paulus etu! Iꞌa nanguli ka todea parantau-parantau wiata to nipowia nu pale manusia daꞌa nakono wiata. Pade nadeamo tau nomparasaya pepatudukina etu, daꞌa aga ri ngata Efesus eꞌi, tapi ntora pura-pura Propinsi Asia woꞌu!
27 Jadi sampesuwu-sampesuwu, to nipokaekaku panggawiata eꞌi rasalai ntau. Daꞌa aga etu, tapi mamala sampe sapo mpepue wiata Artemis to nabetena etu rareke ntau mana ria gunana. Pade kabetena wiata Artemis mboto etu to nipesomba pura-pura tau ri Asia pade ri njumaongu dunia mana ria!”
28 Sangga nangepe tesa i Demetrius etu, nabilisi mpuꞌumo rara ira pura-pura, sampe ira nongare-ngare, “Matuwu Artemis, wiatata to Efesus!”
29 Pade natolelemo kakanano etu sampe ri njumaongu ngata Efesus. Todea etu nanjoko i Gayus bo Aristarkhus, etumo rombaꞌa roa sampolumako ante i Paulus nggari Propinsi Makedonia, pade ira niumbunjai ntodea nalau nasalisa nesua ri lalowo bete ngata etu.
30 Paulus madota mesua mantingayo todea ri setu, tapi topomparasaya-topomparasaya i Pue Yesus daꞌa nompaloga iꞌa mesua.
31 Waꞌa woꞌu bara sakuya mbaꞌa topoparenta to noanggana nggari Propinsi Asia to nowega ante i Paulus. Ira nompakau tau nalau manguli ka i Paulus, “Neꞌe mpuꞌu mesua mantingayo todea riara kasiromu etu!”
32 Tempo etu nagado mpuꞌumo tau dea to nasiromu ri setu. Naria to nongare iweꞌi, naria woꞌu to nongare iwetu, sabana nadea nggari ira etu daꞌa ninjani nuapa patuju ira nasiromu ri setu.
33 Nantuki pombarata sabagia nggari todea etu, kasiromu ira etu niposabana sambaꞌa to Yahudi nosanga ka Aleksander, sabana iꞌamo to nipopokolu to Yahudi ri ngayo ntodea. Aleksander etu nombawiataka palena, tandaina iꞌa madota motesa manjaliku korona ka todea.
34 Tapi iwetu ira nanggita iꞌa etu sambaꞌa to Yahudi, nongaremo ira mpasanggani-nggani rongu jaa kasaena, “Matuwu Artemis, wiatata to Efesus!”
35 Kaopuna juru tulisi ngata etu namala nompopondodo tau dea etu. Nangulimo iꞌa ka ira, “Tau-tau to Efesus, ninjani ntau pura-pura kita to Efesus eꞌi to nompiara sapo mpepue wiata Artemis bo watu nakarampua to nanawu nggari langi!
36 Daꞌa ria sambaꞌa to nombabali etu! Sabana etu kuperapi ka komi, pekalino puramo! Neꞌepa rapowia komi sangele ante daꞌapa nompekiri asele nu powia etu!
37 Tau-tau eꞌi nikeni komi pura-pura ri seꞌi, naupa ira daꞌa nangangga nuapa-nuapa nggari sapo mpepue wiatata Artemis, pade ira daꞌa woꞌu nompakakedi sanga Artemis etu.
38 Ane i Demetrius ante roana sampokarajaa etu maria tesa pepangadu ira ka sambaꞌa tau, aginapa ira manggeni parakara etu ri ngayo ntopotangara. Potangara natebea ri tempo to natantuna, pade topotangara-topotangara naria nepopea.
39 Pade ane danariapa sangaya ntanina rapekutana komi, etu kana rapakaopu ri ngayo polibu ntodea to nipakatantu nu pomarenta.
40 Sabana nuapa to najadi eo eꞌi mamala mompakandasa kita pura-pura! Kita mamala rasangga nu pomarenta Roma tau topeewa, sabana daꞌa ria kamba saongu alasa to mamala raulita mantakono kakanano eꞌi!”
41 Naopu juru tulisi nanguli etu pura-pura, nipakauna tau dea manjili.