Paulus ri ngata Korintus
18
Naopu etu i Paulus nompalasi ngata Atena pade nalaumo iꞌa mpaka ri ngata Korintus.
2 Ri setu iꞌa nosintomu ante sambaꞌa tau to Yahudi nggari Propinsi Pontus to nosanga ka Akwila. Akwila ante rongona i Priskila lako narata ri ngata Korintus nggari Propinsi Italia. Ira nolinja mpaka ri Korintus sabana i Klaudius, Magau Roma, nomparenta pura-pura tau to Yahudi kana mompalasi ngata Roma ri Propinsi Italia etu. Jadi nalaumo i Paulus nantunggai ira rombaꞌa,
3 pade iꞌa netoꞌo ri jaꞌi ira, sabana mata mpopaelo i Paulus nasimbayu ante mata mpopaelo ira, etumo nowia tenda. Ira tolumbaꞌa nokarajaa mpasanggani-nggani.
4 Pade ri Eo-eo Mpenonto i Paulus nalau ri sapo mpodade nto Yahudi notesa nosinjula pekiri ante tau-tau nasiromu ri setu, nabeloka tau to Yahudi, nabeloka tau to Yunani. Iꞌa nompasimbuku manggeni ira momparasaya i Pue Yesus.
5 Sangga naratapa i Silas bo i Timotius nggari Propinsi Makedonia, nikabasaka i Paulusmo panggawiana nowia tenda etu, pade eo-eo iꞌa nompatolele Tesa nu Alatala ka tau to Yahudi. Nipatudukina ka ira, “Yesusmo Magau to Mompakasalama to nijanji Alatala.”
6 Tapi tau to Yahudi etu batena nangewa i Paulus pade nanguli sinjaꞌi iꞌa. Jadi i Paulus nombawurenggenaka pakeana ante nanguli, “Salamu muposala mboto! Etu daꞌa salaku! Nompamula weꞌi-weꞌi aku malau mompatolele Tesa nu Alatala ka tau-tau daꞌa to Yahudi!”
7 Naopu etu i Paulus nompalasi ira pade nalau netoꞌo ri sapo ri sinjori nu sapo mpodade etu. Pue njapo etu nosanga ka i Titius Yustus. Iꞌa daꞌa to Yahudi tapi iꞌa nomparasaya Alatala.
8 Topanggeniaka sapo mpodade etu to nosanga ka i Krispus ante pura-pura ira saongu njapo nomparasaya i Pue Yesus. Pade nadea tau to Korintus ntanina nangepe kareba to nikeni i Paulus etu, pade ira woꞌu nomparasaya pade nidiu ewa tandaina ira topomparasaya i Pue Yesus.
9 Naria sambengi i Paulus nanggita saongu panggita. Riara mpanggitana etu i Pue nanguli ka iꞌa, “Neꞌe maeka! Neꞌe menonto mompatolele Tesaku,
10 sabana damadeapa tau ri ngata eꞌi kana momparasaya Aku. Neꞌe maeka, sabana Aku mosanggani-nggani ante iko. Daꞌa ria sambaꞌa tau mamala mowia anu majaꞌa ri jaꞌimu.”
11 Sabana etu i Paulus netoꞌo ri ngata Korintus sampae santongo kasaena pade nompatuduki Tesa nu Alatala ka tau-tau ri setu.
12 Tempo i Galio najadi gubernur ri Propinsi Akhaya etu, tau-tau to Yahudi nosintuwu nangewa i Paulus. Iꞌa nisoko ira pade nikeni ri ngayo Gubernur Galio etu ala ratangara.
13 Ira nompangadu iꞌa iweꞌi: “Tau eꞌi nanggeni tau dea mombasomba Alatala ante pepatuduki nontani nggari Atura-atura agama to nipapola i Musa ka kami!”
14 Iwetu i Paulus madota mesono, nangulimo Gubernur Galio, “E, tau-tau to Yahudi! Ane to nipangadu komi eꞌi saongu peliunaka atura Roma bara saongu kajaꞌana, masipato aku mosabara mangepe tesa pepangadu komi eꞌi.
15 Tapi eꞌi aga posisala pombarata ewa tesa-tesa pade sanga-sanga pade atura-atura agama komi mboto! Etu kana rapasiayu komi mboto. Aku eꞌi daꞌa madota mombatangara parakara ewa eꞌi!”
16 Naopu etu Gubernur Galio nompopalai ira nggari petoꞌo mpotangara etu.
17 Naopu nesuwu nggari setu todea etu nanjoko topanggeniaka sapo mpodade nto Yahudi to nosanga ka i Sostenes, pade iꞌa niboba ira ri ngayo petoꞌo mpotangara. Tapi Gubernur Galio daꞌa ntoto nipariara ntaꞌina powia ira etu.
Paulus nanjili mpaka ri ngata Antiokhia
18 Naopu etu danasaepa i Paulus netoꞌo ri ngata Korintus. Naopu etu nopasabimo iꞌa ka topomparasaya-topomparasaya ri setu pade nosumombamo iꞌa mpaka ri Propinsi Siria nosanggani-nggani ante i Priskila bo Akwila. Daꞌapa ira nosumomba, ri ngata Kengkrea i Paulus nombagari woꞌona to nipalambana najadi nandoe nantuki ada nto Yahudi, sabana naria pojanjina ri ngayo Alatala.
19 Riara posumomba ira etu ira nesai ri ngata Efesus. Ri setu i Paulus nompalasi i Priskila bo Akwila, pade nalaumo iꞌa njambaꞌana nesua ri sapo mpodade notesa nosinjula pekiri ante tau-tau to Yahudi ri setu.
20 Ira to Yahudi nerapi ala iꞌa metoꞌo masae ante ira, tapi iꞌa daꞌa madota.
21 Nopasabimo iꞌa ka ira pade nanguli, “Ane rapodota Alatala, aku kana manjili woꞌu wemai.” Naopu notesa iwetu nosumombamo i Paulus nggari ngata Efesus sampe narata ri ngata Kaisarea.
22 Sangga naratapa ri ngata Kaisarea, nantendemo iꞌa mpaka ri ngata Yerusalem ala mombawai tabe ka topomparasaya ri setu. Naopu etu pade notuamo iꞌa mpaka ri ngata Antiokhia.
23 Naopu iꞌa netoꞌo bara sakuya kasaena ri setu, nalau woꞌumo iꞌa mpaka ri Bagia Galatia bo Frigia ala mompakaroso pomparasaya topomparasaya i Pue Yesus ri setu.
Apolos ri ngata Efesus pade ngata Korintus
24 Tempo i Priskila bo Akwila naria ri ngata Efesus naratamo sambaꞌa tau to Yahudi ri setu nggari ngata Aleksandria ri tana Masir, sangana Apolos. Iꞌa sambaꞌa tau napande notesa, pade iꞌa mpuꞌu-mpuꞌu nangginjani isi Buku Nagasa.
25 Iꞌa nipatuduki ntau tesa i Pue Yesus. Jadi tempo iꞌa narata ri ngata Efesus notesamo iꞌa ante rarana newoya-woya. Nipatudukina tesa Yesus etu ante nanoto, naupa to ninjanina nggari tesa etu aga pepatuduki Yohanes Topediu.
26 Ante kabiana Apolos nompamula notesa ri sapo mpodade nto Yahudi. Tempo i Priskila bo Akwila nangepe iꞌa, ira nompakeni iꞌa mpaka ri sapo ira. Pade ri setu ira notarangga mpakanoto ka iꞌa tesa Alatala anu daꞌapa ninjanina.
27 Naopu nggari setu Apolos nompakatantu malau mpaka ri Propinsi Akhaya. Jadi topomparasaya i Pue Yesus ri ngata Efesus etu nantulungi iꞌa ante nantulisi sura ka topomparasaya-topomparasaya ri Akhaya ala ira madota mantarima Apolos ri setu. Jadi tempo Apolos narata ri Propinsi Akhaya etu, pepatudukina mpuꞌu-mpuꞌu nantulungi tau-tau to najadi topomparasaya i Pue Yesus nggari towe belo nu Alatala.
28 Ante tesana to nakuasa Apolos nombadagi pura-pura tesa to Yahudi ri ngayo todea. Nipakanotona ka ira nggari Buku Nagasa, Yesusmo Magau to Mompakasalama to nijanji Alatala.