Paulus bo Silas ri ngata Tesalonika
17
Paulus bo i Silas nompapola polumako ira noliu ri ngata Amfipolis pade ngata Apolonia sampe narata ri ngata Tesalonika. Ri setu naria sapo mpodade nto Yahudi.
2 Jadi nalaumo i Paulus ri sapo mpodade to Yahudi etu ewa kabiasana nosinjula pekiri ante tau-tau to nasiromu ri setu. Toluntipa nosintuki-ntuki tempo Eo Mpenonto iꞌa notesa ka ira ewa isi Buku Nagasa.
3 Nipakanotona ka ira batuana isi buku etu. Nitaranggana ka ira, “Nantuki Buku Nagasa eꞌi Magau to Mompakasalama to nijanji Alatala paraluu rapandasa sampe mamate, tapi Iꞌa kana matuwu bali nggari kamatena. Yesus to nitesaku ka komi, Iꞌamo Magau to Mompakasalama etu.”
4 Nangepe tesa i Paulus etu naria bara sakuya mbaꞌa tau to Yahudi nomparasaya tesa etu pade nosabingga ka i Paulus bo i Silas. Iwetu woꞌu nadea tau to Yunani to naeka ka Alatala, pade nadea woꞌu besi-besi to noanggana nggari ngata etu.
5 Tapi tempo tau-tau to Yahudi to daꞌa nomparasaya Yesus nanggita etu nasiriatimo ira ri jaꞌi Paulus bo i Silas. Jadi ira nompokio tau-tau topenjayo-njayo ri potomu nowia kanano pade nompakagado riara ngata etu. Naratamo ira ri sapo Yason to nipetoꞌo i Paulus bo i Silas, pade nisuaki ira sapo etu ala manggeni i Paulus bo i Silas mesuwu mantingayo tau dea etu.
6 Tapi daꞌa nirata ira i Paulus bo i Silas ri setu. Jadi niumbunjai iramo Yason bo bara sakuya mbaꞌa tau topomparasaya ntanina ri setu mpaka ri ngayo topoparenta-topoparenta ngata etu. Nongaremo ira, “Paulus bo i Silas etu nompakagado tau ri umba-umba ri dunia! Weꞌi-weꞌi ira narata nompakagado ngatata eꞌi woꞌu!
7 Pade Yason eꞌi nantarima ira etu ri sapona. Ira eꞌi puramo nombaliunaka atura-atura to nipakatantu Magau Kaisar, sabana niuli ira danaria woꞌupa magau ntanina to nosanga ka Yesus.”
8 Sangga nangepe tesa-tesa etu nagado mpuꞌumo rara ntodea bo topoparenta-topoparenta ngata.
9 Kaopuna Yason bo roa-roana topomparasaya etu kana mombawai doi pejami ka topoparenta-topoparenta ngata. Naopu etu pade ira nikabasakamo.
Paulus bo Silas ri ngata Berea
10 Wengina etu nangulimo topomparasaya-topomparasaya ri ngata Tesalonika ka i Paulus bo i Silas, “Aginamo komi malau mpaka ri ngata Berea.” Jadi nalaumo i Paulus bo i Silas. Narata ri setu nalaumo ira nesua ri sapo mpodade nto Yahudi.
11 Tau-tau to Yahudi ri ngata etu nabelo rara ira, daꞌa ewa tau to Yahudi ri ngata Tesalonika, sabana ira ri ngata Berea nantarima Kareba Yesus etu ante mpuꞌu-mpuꞌu rara ira. Pade eo-eo ira nomparesa Buku Nagasa ala manggita kakonona tesa i Paulus etu ka ira.
12 Nadea nggari tatongo ira to nomparasaya Yesus, pade daꞌa aga sakedi tau-tau to Yunani to noanggana nomparasaya woꞌu, nabeloka besi, nabeloka langgai.
13 Tapi tempo tau-tau to Yahudi ri ngata Tesalonika nangepe i Paulus nompatolele Tesa nu Alatala ri ngata Berea, naratamo ira ri ngata Berea pade ri setu woꞌu nompowia gado pade nompakapane rara ntau dea.
14 Jadi topomparasaya-topomparasaya ri ngata Berea etu nasalisa nanggeni i Paulus mesuwu nggari ngata Berea mpaka ri wiwi ntalinti. Tapi i Silas ante i Timotius danetoꞌo ri ngata Berea etu.
15 Tau-tau to nanggeni i Paulus etu nalau mpasanggani-nggani ante iꞌa sampe narata ri ngata Atena. Naopu etu natinggulimo ira mpaka ri ngata Berea ante nanggeni tewai i Paulus ka i Silas bo i Timotius ala ira masalisa mombatuntumaka iꞌa ri ngata Atena.
Paulus ri ngata Atena
16 Tempo i Paulus nompopea i Silas bo i Timotius ri ngata Atena, nasusa mpuꞌu rarana nanggita kadea nu parantau-parantau to nipesomba nto Atena etu.
17 Etumo sabana iꞌa nosinjula pekiri ri sapo mpodade ante tau-tau to Yahudi pade tau-tau ntanina to nombasomba Alatala. Iwetu woꞌu ri potomu, eo-eo iꞌa nosinjula pekiri ante isema-sema to naria ri setu.
18 Ri ngata Atena etu naria woꞌu tau-tau napande to nantuki pepatuduki nu Epikuros pade pepatuduki to nosanga ka Stoa. a Bara sakuya mbaꞌa guru rongele pepatuduki etu nosinjono woꞌu ante i Paulus. Ira nanguli, “Nuapa woꞌu ninjani ntau yaꞌa! Pangginjanina aga sakedi lau, tapi nadea woꞌu tesana!” Pade naria ira ntanina to nanguli, “Bara iꞌa madota mompatuduki ka kita ewa wiata-wiata nggari ngata ntanina!” Niuli ira iwetu sabana i Paulus nompatolele ka ira tesa Yesus, pade tesa manusia natuwu bali nggari kamatena.
19 Jadi ira nanggeni i Paulus mpaka ri polibu ri Bulu Areopagus. Narata ri setu nangulimo ira ka iꞌa, “Kami eꞌi madota mangepe pepatuduki nabou to nipatolelemu etu,
20 sabana komi mompatolele pepatuduki nontani nggari ntanina to niepe nu talinga kami mboto. Kami madota mangginjani batuana.”
21 Niuli ira iwetu sabana pura-pura to Atena pade tau-tau ntanina to netoꞌo ri ngata Atena etu, aga madota mantesa atau mangepe nuapa-nuapa to nabouna.
22 Nangepe tesa ira etu nekanggoremo i Paulus ri ngayo topolibu ri Bulu Areopagus etu pade niulina, “Tau-tau to Atena! Nikitaku komi mpuꞌu-mpuꞌu topoagama,
23 sabana tempo aku nenjayo-njayo riara ngata komi eꞌi nikitaku petoꞌo-petoꞌo pesomba komi. Pade nirataku saongu petoꞌo pesomba to naria nitulisi, ‘Petoꞌo Pesomba ka Pue to Daꞌa Ninjanita Sangana.’ Jadi Pue to nipesomba komi naupa sangana daꞌa ninjani komi, Pue etumo to nipatoleleku ka komi ri seꞌi.
24 Pue Alatala nompajadi dunia eꞌi bo pura-pura isina. Iꞌamo Pue langi bo dunia. Pade Iꞌa daꞌa netoꞌo ri sapo mpesomba to nikawia nu manusia.
25 Iꞌa daꞌa woꞌu nomparaluu ratulungi nu manusia, sabana Iꞌamo to nombawai katuwu bo nosa pade mpengaya-ngaya ka pura-pura manusia.
26 Nggari sambaꞌa manusia nipajadina pura-pura manusia ri dunia ala ira momuli metoꞌo ri njumaongu dunia eꞌi. Nipakatantuna nggari pamulana pantaꞌa tana rapetoꞌo butu-butu ngata, pade nipakatantuna kasaena ira matuwu ri tana etu.
27 Nikawia Alatala iwetu ala manusia mopaelo Iꞌa. Jadi rapana ane ira mopaelo Iꞌa, ira kana mosirata ka Iꞌa. Tapi kakonona, daꞌa paraluu mopaelo Iꞌa masae-sae, sabana Iꞌa namosu ante kita sambaꞌa bo sambaꞌa.
28 Ewa niuli ntau, ‘Kita natuwu pade nonggaya pade naria ri dunia eꞌi sabana kuasa Alatala.’ Nasimbayu ante etu woꞌu to niuli bara sakuya mbaꞌa topande mowia dulua nggaolu nggari ngata komi. Ira nanguli, ‘Kita pura-pura eꞌi anana woꞌu.’
29 Jadi sampesuwu-sampesuwu, kita eꞌi ana-ana nu Alatala. Sabana etu daꞌa mamala kita mompakasimbayu Alatala ante parantau-parantau to nipowia nggari bulawa bara salaka bara watu nantuki kapande nu manusia.
30 Alatala daꞌa nombasuku manusia nokolu tempo ira nombasomba parantau-parantau ewa etu sabana daꞌapa ninjani ira etu nasala. Tapi nompamula weꞌi-weꞌi Iꞌa nompakau pura-pura manusia ri umba-umba ri dunia kana majea nggari pokainggu ira etu.
31 Kita kana majea sabana naria saongu tempo banepia to nipakatantunamo pura-pura manusia ri dunia eꞌi kana ratangara ante nanoa rara. Manusia kana ratangara sambaꞌa tau to nipelisi nu Alatala, etumo Yesus. Pade ala mompakanoto Iꞌamo Topotangara to nipelisina etu, Alatala nompakatuwu bali Yesus nggari kamatena.”
32 Tempo tau-tau etu nangepe tesa tomate natuwu bali nggari kamatena, naria nggari tatongo ira nompongiri i Paulus sabana daꞌa niparasaya ira tomate mamala rapakatuwu bali. Tapi naria woꞌu to nanguli, “Kami damadota woꞌu mangepe tesamu etu.”
33 Naopu etu nalaimo i Paulus nompalasi polibu etu.
34 Tapi naria tau nggari tatongo ira etu nosabingga ka i Paulus pade nomparasaya Yesus. Sambaꞌa nggari ira i Dionisius, sambaꞌa nggari topolibu to nasiromu ri Bulu Areopagus etu. Pade naria woꞌu sambaꞌa besi nosanga ka i Damaris, pade bara sakuya mbaꞌa tau ntanina.