Timotius nantuki Paulus bo Silas
16
Paulus nompapola polumakona mpaka ri ngata Derbe pade ri ngata Listra. Ri setu naria sambaꞌa topomparasaya i Pue Yesus nosanga ka i Timotius. Indona sambaꞌa to Yahudi to nomparasaya ka i Pue Yesus. Aga umana tau to Yunani.
2 Timotius nibila pura-pura topomparasaya ri ngata Listra bo Ikonium.
3 Paulus madota mangala i Timotius mantuki iꞌa. Jadi iꞌa nombasuna i Timotius ala Timotius etu mamala ratarima tau-tau to Yahudi ri bagia etu, sabana ninjani ira pura-pura uma i Timotius sambaꞌa tau to Yunani to daꞌa nombasuna ana ira. a
4 Naopu i Timotius nisuna i Paulus, nalaimo ira rombaꞌa. Ri pura-pura ngata to nikalau ira nipapola ira ka topomparasaya i Pue Yesus kabotu nu polibu suro-suro ante topanggeniaka-topanggeniaka ntanina ri ngata Yerusalem. Nipatuduki ira ka topomparasaya etu ala ira pura-pura kana mantuki atura-atura to nipakatantu etu.
5 Jadi iwetumo pomparasaya topomparasaya i Pue Yesus nipakaroso, pade nantambai eo nantambai kadea ntau nomparasaya.
Panggita Paulus ri ngata Troas
6 Nosa Nagasa nu Alatala daꞌa nompaloga i Paulus ante i Silas mompatolele Tesa nu Alatala ri Propinsi Asia. Jadi ira nompapola polumako ira mpaka ri Bagia Frigia bo Galatia ri Propinsi Galatia.
7 Tempo ira narata ri kabingga Bagia Misia, nipembai ira mapola mesua ri Propinsi Bitinia. Tapi Nosa Nagasa i Pue Yesus nombatagi ira mapola.
8 Jadi ira nolumako nombaliunaka Bagia Misia sampe narata ri ngata Troas ri wiwi ntasi. b
9 Wengina etu ri ngata Troas nikita i Paulus sangaya panggita. Riara panggitana etu nikitana sambaꞌa tau nggari Propinsi Makedonia nenggore ri ngayona pade nerapi mpuꞌu-mpuꞌu ka iꞌa, “Kamaimo mpaka ri Makedonia mantulungi kami ri seꞌi!”
10 Jadi naopu i Paulus nanggita panggita etu, kami nompakasadia malau mpaka ri Propinsi Makedonia etu, sabana nipekiri kami, mpuꞌu-mpuꞌu Alatala nompakau kami mompatolele Kareba Belo etu ka tau-tau ri setu.
Paulus nompatolele Kareba Belo ri ngata Filipi
11 Kami nompalasi ngata Troas pade nesawi sakaya bete napola mpaka ri Lewuto Samotrake. Pade eo to nailena napolamo kami sampe narata ri ngata Neapolis ri Propinsi Makedonia.
12 Nggari setu nantendemo kami mpaka ri ngata Filipi, etumo ngata natolele ri Propinsi Makedonia. Ngata Filipi etu ngata to nipetoꞌo ntau narata nggari ngata Roma. Ri setu kami netoꞌo bara sakuya mbengi kasaena.
13 Ri Eo Mpenonto kami nalau ri wiwi ue bete ri sawaliku nu ngata sabana nipekiri kami ri setu bara maria petoꞌo raposambaya nto Yahudi. Pade nekatoko kami notesa-tesa ante besi-besi to nasiromu ri petoꞌo etu.
14 Ri tatongo ira etu naria sambaꞌa besi nggari ngata Tiatira nosanga ka i Lidia. Iꞌa topobalu buya nakamumu to nasuli mpuꞌu olina, pade iꞌa sambaꞌa tau to nombasomba Alatala. Tempo iꞌa nangepe tesa i Paulus, i Pue nombabuka pekirina sampe iꞌa nantarima pepatuduki etu.
15 Naopu etu i Lidia pade ira sanjapo nidiu ewa tandaina ira topomparasaya i Pue Yesus. Naopu ira nidiu, i Lidia nombagaga kami malau metoꞌo ri sapona. Niulina, “Nikita komi aku eꞌi nomparasayamo i Pue. Jadi weꞌi-weꞌi kamaimo komi ri sapoku.” Iꞌa mpuꞌu-mpuꞌu nerapi sampe kami nalau netoꞌo ri jaꞌina.
Paulus bo Silas nitarunggu ri ngata Filipi
16 Naria saeo, tempo kami nalau ri petoꞌo posambaya etu, niposintomu kami sambaꞌa batua besi. Iꞌa nipesua seta to namala nombaboto kajadia-kajadia to marata. Ante nombaboto rasi ntau besi etu nombarata nadea saro ka madikana.
17 Besi etu nantuki i Paulus bo kami ante nongare, “Tau-tau eꞌi batua nu Alatala to Neliu Ngglanga! Ira narata nompatolele ka komi iwenu komi mamala rapakasalama!”
18 Bara sakuya mbengi kasaena besi etu aga nongare-ngare iwetumo. Kaopuna i Paulus mana namala nosabara mangepe iꞌa, sampe iꞌa neili ntaliku pade nanguli ka seta to naria riara besi etu, “Ante sanga Yesus Kristus, palaimo iko nggari jaꞌi besi etu!” Tempona etu woꞌu nalaimo seta nggari jaꞌi besi etu.
19 Sangga ninjani madika nu besi etu mana ria loga ira mombarata doi, nisoko iramo i Paulus bo i Silas. Pade ira rombaꞌa etu niumbunjai nikeni ira ri jaꞌi topoparenta-topoparenta to naria ri potomu.
20 Tempo ira nantingayo topoparenta-topoparenta ri setu, nangulimo madika nu besi etu, “Tau-tau eꞌi tau to Yahudi to nompakagado ngata eꞌi.
21 Ira nompatuduki tau mompowia ada to nitagi atura-aturata to Roma. Daꞌa mamala ratukita ada etu!”
22 Tau dea ri potomu etu woꞌu nanggarau i Paulus bo i Silas. Pade topoparenta-topoparenta etu nompakau tau nombaseri pakea nggari koro rombaꞌa suro etu pade nombaporo ira.
23 Naopu niporo mpakajuꞌa-juꞌa, ira nisuaraka riara tarunggu. Pade balengga tarunggu nipakau manggatono ira mpakabelo-belo.
24 Jadi iꞌa nombasuaraka ira ri tombi tarunggu riarana mpuꞌu. Pade kada ira nibalanggu ante kayu.
25 Kira-kira natongo wengina i Paulus bo i Silas nosambaya pade nodade nantoiya Alatala. Tau-tau ntanina to nitarunggu ri setu woꞌu nangepe ira nodade.
26 Sampegoli naratamo lingu bete nombagagoya sapo tarunggu etu sampe ri pondasina. Pura-pura pewobo natibea pade pura-pura pompoꞌu ntau riara tarunggu etu nawonju sanggani.
27 Nembangumo balengga tarunggu etu. Sangga nikitana pura-pura pewobo natebea, nibituna gumana ala mompatesi korona, sabana nipekirina tau-tau riara tarunggu etu nalai puramo.
28 Tapi nongaremo i Paulus ante suara namangga, “Neꞌe mompatesi koromu! Kami kana naria pura ri seꞌi!”
29 Nangepe etu niperapi balengga tarunggu etu poindo, pade nangowamo iꞌa nalau mpaka riara tarunggu. Ante nokalalete iꞌa nekadede ri ngayo i Paulus bo i Silas.
30 Pade nikenina ira mpaka ri sawalikuna pade niulina, “Nuapa masipato kupowia ala aku rapakasalama?”
31 Nesonomo i Paulus ante i Silas, “Parasayamo i Pue Yesus, pade komi kana rapakasalama ante pura-pura tau netoꞌo riara njapo komi.”
32 Pade nitarangga i Paulus bo i Silas tesa i Pue ka balengga tarunggu etu, pade ka ira pura-pura saongu njapo.
33 Ri tongo wengi etu woꞌu balengga tarunggu etu nanggeni ira pade nompegasa pura-pura bela ira. Naopu etu iꞌa ante pura-pura tau riara njapona etu kaliu-liu nidiu ewa tandaina ira topomparasaya i Pue Yesus.
34 Naopu etu nikeninamo i Paulus ante i Silas nalau ri sapona, pade ri setu nipakonina ira. Nadamba mpuꞌu rara ira sanjapo sabana ira nomparasayamo ka Alatala. Naopu etu i Paulus bo i Silas nikeni bali riara tarunggu.
35 Naeompadondona topoparenta-topoparenta ngata Filipi etu nompakau polisi malau mpaka ri tarunggu mompapola ka balengga tarunggu parenta iweꞌi: “Kabasakamo tau rombaꞌa to nitarunggu yowi etu.”
36 Nangepe etu nangulimo balengga tarunggu etu ka i Paulus, “Topoparenta-topoparenta ngata nomparenta aku mombakabasaka komi. Weꞌi-weꞌi mamala komi malai. Pakabelo-belo ri jala.”
37 Tapi nangulimo i Paulus ka polisi to narata ri setu, “Kami eꞌi todea Roma! Naupa iwetu daꞌapa nitangara kami niporo ri ngayo ntau dea, pade nisuaraka riara tarunggu! Pade weꞌi-weꞌi topoparenta-topoparenta mompakau kami malau nggalino! Kami daꞌa madota! Ira mboto kana marata mompopesuwu kami!”
38 Polisi-polisi etu nompakilu tesa etu ka topoparenta-topoparenta ngata. Sangga nangepe i Paulus bo i Silas etu todea Roma, naekamo ira.
39 Pade nalaumo ira mboto nerapi ampu ri jaꞌi Paulus bo i Silas. Naopu etu nikeni ira rombaꞌa suro etu ri sawalikuna, pade niperapi ira, “Aginamo komi malai nggari ngata eꞌi.”
40 Jadi nalaimo i Paulus bo i Silas nompalasi tarunggu etu nalau mpaka ri sapo i Lidia. Ri setu ira nosintomu ante topomparasaya-topomparasaya i Pue Yesus pade nompakaroo rara ira. Naopu etu nalaimo ira nggari ngata Filipi etu.