Polibu topomparasaya ri ngata Yerusalem
15
Tempo i Paulus bo i Barnabas naria ri ngata Antiokhia naratamo bara sakuya mbaꞌa tau to Yahudi nggari Bagia Yudea. Ira nompamula nompatuduki ka topomparasaya-topomparasaya i Pue Yesus ri setu iweꞌi: “Ane komi daꞌa rasuna nantuki ada-ada to nipatuduki i Musa, daꞌa mamala komi rapakasalama.”
2 Tapi i Paulus bo i Barnabas mpuꞌu-mpuꞌu nangewa bo nombabali pepatuduki tau-tau etu. Jadi kaopuna nipakatantumo ala i Paulus bo i Barnabas ante bara sakuya mbaꞌa topomparasaya ntanina nggari ngata Antiokhia malau mpaka ri ngata Yerusalem ala molibu mombatesa ewa pepatuduki etu ante suro-suro pade topanggeniaka-topanggeniaka topomparasaya ntanina ri setu.
3 Paulus ante roa-roana nikeni topomparasaya ri ngata Antiokhia sampe ri sawaliku ngata. Nggari setu ira nalau nombaliunaka Bagia Fenisia bo Bagia Samaria. Ri setu ira nombatesa ka topomparasaya-topomparasaya i Pue Yesus iwenu tau-tau daꞌa to Yahudi nompalasi pomparasaya ira nokolu ala mantuki Alatala. Kareba etu mpuꞌu-mpuꞌu nompakadamba rara topomparasaya-topomparasaya i Pue Yesus ri setu.
4 Sangga i Paulus ante roa-roana narata ri ngata Yerusalem ira nitomunaka topomparasaya i Pue Yesus, suro-suro bo topanggeniaka-topanggeniaka ntanina ante kadamba nu rara. Pade nitesa i Paulus bo roa-roana ka tau-tau etu pura-pura nuapa to nikawia nu Alatala niposabana ira ka tau-tau daꞌa to Yahudi.
5 Tapi naria bara sakuya mbaꞌa tau to Parisi to nomparasaya i Pue Yesus nekanggore pade notesa, “Tau-tau daꞌa to Yahudi to nomparasaya etu kana rasuna, pade ira kana rapakau mantuki Atura-atura agama to nipapola i Musa ka kita.”
6 Nangepe tesa etu suro-suro pade topanggeniaka-topanggeniaka ntanina etu nolibu ala etu pura-pura namala ratesa.
7 Nasae mpuꞌu ira nosinjula pekiri. Kaopuna nekanggoremo i Petrus pade niulina ka ira, “Sampesuwu-sampesuwu, ninjani komi mbotomo bara sakuya tempo naliu Alatala nompelisi aku nggari tatongo komi mompatolele Kareba Belo ka tau-tau daꞌa to Yahudi ala ira mangepe kareba etu pade momparasaya.
8 Pade Alatala, to nangginjani isi rara ntaꞌi manusia, nantarima ira tau daꞌa to Yahudi. Ninjani kami etu sabana Iꞌa nombawai Nosa Nagasana ka ira nasimbayu ewa niwaina ka kita woꞌu.
9 Alatala daꞌa nompoposisala kita tau-tau to Yahudi ante ira tau-tau daꞌa to Yahudi. Iꞌa nompakagasa rara ira woꞌu sabana ira nomparasaya.
10 Ane iwetu, nokuya komi daꞌa madota mantarima nuapa to nikawia Alatala weꞌi-weꞌi? Nokuya komi madota mompasuꞌu ira mantuki atura-atura to nakaja ratuki? Totuꞌa-totuꞌata nggaolu pade kita mboto daꞌa nompakule nantuki atura-atura etu.
11 Tapi niparasayata kita nipakasalama aga ante towe belo i Pue Yesus. Iwetu woꞌu ira.”
12 Naopu i Petrus notesa iwetu pura-pura tau nasiromu ri setu nekalino sanggani. Pade ira nompetalinga i Barnabas bo i Paulus nombatesa kabaraka-kabaraka ante tandai-tandai to nipogumaa to nipowia Alatala niposabana ira ka tau-tau daꞌa to Yahudi.
13 Sangga naopupa ira notesa, nangulimo Yakobus, “Sampesuwu-sampesuwu, epe komimo tesaku!
14 Simon Petrus lako-lakopa nombatarangga ka kita iwenu Alatala nggari pamulana nantujuraka patujuna ka tau-tau daꞌa to Yahudi, patujuna mompelisi nggari jaꞌi ira tau-tau majadi topomparasaya Iꞌa.
15 Etu nasimbayu ewa nuapa to niboto nabi-nabi, apa naria nitulisi iweꞌi:
16 ‘Nanguli Alatala: Maopu etu Aku kana marata bali
mompopembangu bali poparenta Magau Daud to nageromo.
Aku kana mompakasiayu to mana nasiayu
pade mompakaroso etu woꞌumo.
17 Kupowia etu ala pura-pura manusia ntanina etu mangelo Aku,
etumo pura-pura tau daꞌa to Yahudi to nipokioku majadi todeaku.
Iwetumo to niuli i Pue to nompakadupa etu pura-pura
18 to nitesana nggaolu.’ (Am. 9:11-12)
19 Jadi sampesuwu-sampesuwu, nantuki pombarataku neꞌe kita mompakasusa tau-tau daꞌa to Yahudi to negoli nomparasaya Alatala.
20 Tapi kita kana mantulisi sura manguli ka ira iweꞌi: ‘Neꞌe rakoni komi panggoni to napalina sabana nipakoni ka pue ntanina, pade neꞌe rakoni komi bau ane daꞌa rasambale, pade neꞌe manggoni lei. Pade neꞌe mosampaturu ante tau daꞌa rongomu mboto.’
21 Aga atura-atura etumo to paraluu ratuki ira ala tau-tau to Yahudi daꞌa majuꞌa rara manggita ira mowia iwetu. Sabana nompamula nggari nggaolu Atura-atura i Musa etu nipatolele ri pura-pura ngata, etu nibasa ri Eo-eo Mpodade ri sapo-sapo mpodade nto Yahudi.”
Sura to nipakatu ka tau daꞌa to Yahudi to nomparasayamo
22 Nangepe tesa Yakobus etu nasitujumo suro-suro bo topanggeniaka-topanggeniaka ntanina bo pura-pura topomparasaya. Jadi ira nompakatantu mompelisi bara sakuya mbaꞌa tau nggari jaꞌi ira rapakau mpaka ri ngata Antiokhia mosanggani-nggani ante i Paulus bo i Barnabas ala ira mompasimbayu asele mpolibu ira ka topomparasaya ri setu. Nipelisi iramo i Silas bo Yudas to nidae woꞌu i Barsabas. Rombaꞌa tau etu tau-tau to nibila ri tatongo topomparasaya i Pue Yesus ri ngata Yerusalem.
23 Pade nitulisi ira sura ka topomparasaya-topomparasaya ri ngata Antiokhia rakeni tau rombaꞌa etu to nanguli iweꞌi:
“Sura eꞌi nggari jaꞌi kami suro-suro bo topanggeniaka-topanggeniaka ntanina to raposampesuwu komi riara i Pue, ka topomparasaya-topomparasaya i Pue Yesus daꞌa to Yahudi to netoꞌo ri ngata Antiokhia pade ri Propinsi Siria bo Kilikia.
24 Niepe kami bara sakuya mbaꞌa tau nggari jaꞌi kami nalau ri jaꞌi komi nompakagero rara pade nompakaingu komi ante pepatuduki-pepatuduki ira. Tapi kakonona ira daꞌa nipakau kami nompowia iwetu.
25 Sabana etu nolibumo kami ri seꞌi, pade kami pura-pura nasintuwu mompelisi bara sakuya mbaꞌa tau, pade mompakau ira malau ri jaꞌi komi. Ira kana malau mpasanggani-nggani ante sampesuwuta i Barnabas bo i Paulus to nipotowe kami.
26 Paulus bo i Barnabas eꞌi, iramo tau-tau to mamate matuwu nantuki Pueta Yesus Kristus.
27 Jadi kami nompakau Yudas bo i Silas malau ri jaꞌi komi nosanggani-nggani ante i Paulus bo i Barnabas. Ira kana mompakapola ka komi ante tesa ira mboto isi nu sura eꞌi.
28 Sampesuwu-sampesuwu, iweꞌimo asele mpolibu kami: To nipokono Nosa Nagasa nu Alatala ante kami woꞌu ala komi neꞌe rapasuꞌu mantuki atura-atura to nakajana. Aga atura-atura iweꞌi paraluu ratuki komi:
29 Neꞌe rakoni komi panggoni to nipakoni ka pue ntanina. Neꞌe rakoni komi lei, pade neꞌe rakoni komi bau nggari binata namate pudu. Pade neꞌe komi mosampaturu ante tau daꞌa rongomu mboto. Ane komi mantuki atura-atura eꞌi, etumo powia to nabelona. Sampe ri seꞌimo ruru isi sura kami.”
30 Jadi naopu ira patambaꞌa nopasabi, notuamo ira malau mpaka ri ngata Antiokhia. Naratapa ri saꞌa nipasiromu iramo pura-pura topomparasaya, pade sura etu niwai ka ira.
31 Tempo ira pura-pura nombabasa sura etu, nadamba mpuꞌu rara ira, apa isi sura etu nompakawoe rara ira.
32 Yudas bo i Silas, ira woꞌu nabi to namala mompasimbayu Tesa nu Alatala. Jadi nasae ira notesa ka to Antiokhia to nomparasaya i Pue Yesus ala mompakaroo rara ante mompakaroso pomparasaya ira.
33 Yudas bo i Silas netoꞌo ri setu bara sakuya mbengi kasaena. Naopu etu ira rombaꞌa nipaloga topomparasaya ri setu manjili mpaka ri jaꞌi suro-suro ri ngata Yerusalem to nompakau ira. Nangulimo topomparasaya ri setu ka ira, “Pakabelo ri jala. Pue momporoa komi.” [
34 Tapi kaopuna i Silas daꞌa nalau. Iꞌa nompakatantu kana metoꞌo ri ngata Antiokhia.]
35 Paulus bo i Barnabas woꞌu netoꞌo bara sakuya kasaena ri ngata Antiokhia. Ri setu ira rombaꞌa nosanggani-nggani ante nadea tau ntanina nompatuduki pade nompatolele Tesa i Pue.
Paulus bo Barnabas nosimpogaꞌa
36 Daꞌa nasae kaliuna nangulimo i Paulus ka i Barnabas, “Kamaimo kita manjili mpaka ri ngata-ngata to nikalauta mompatolele Tesa i Pue bopia. Kita kana malau manggita sampesuwu-sampesuwu to nomparasaya i Pue Yesus ri setu, ala rakitata iwenu ira ria.”
37 Nangepe etu nasitujumo i Barnabas. Iꞌa madota manggeni Yohanes Markus woꞌu,
38 aga i Paulus nompekiri daꞌa nabelo manggeni i Markus, sabana iꞌa nompalasi ira bopia ri Bagia Pamfilia pade mana nadota manggawia mpasanggani-nggani ante ira.
39 Jadipa ira i Paulus bo i Barnabas nosinggarau mpuꞌumo sampe kaopuna ira nosimpogaꞌa. Barnabas nangala i Markus pade ira nesawi sakaya pade nalau mpaka ri Lewuto Siprus.
40 Pade i Paulus nompelisi i Silas nomporoa iꞌa. Topomparasaya-topomparasaya ri ngata Antiokhia nosambaya ala i Pue momporoa ira rombaꞌa riara mpolumako ira. Naopu etu nanggaliwomo ira.
41 Nalaumo ira nombagulili pura-pura Propinsi Siria bo Kilikia. Ri setu ira nompakaroso pomparasaya topomparasaya i Pue Yesus.