Paulus bo Barnabas ri ngata Ikonium
14
Ri ngata Ikonium najadi woꞌumo nasimbayu ewa nuapa to najadi ri ngata Antiokhia etu. Paulus bo i Barnabas nalau woꞌu ri sapo mpodade to Yahudi, pade ri setu ira notesa-tesa ka tau sampe nadea tau to Yahudi bo tau-tau daꞌa to Yahudi nomparasaya Yesus.
2 Tapi tau-tau to Yahudi to daꞌa madota momparasaya Yesus nompakapane rara tau-tau ntanina daꞌa to Yahudi sampe narau mpuꞌu rara ira ri jaꞌi topomparasaya i Pue Yesus.
3 Sabana etu i Paulus bo i Barnabas nasae netoꞌo ri setu. Ante kabia ira nompatolele kareba i Pue. Pade i Pue mboto nombawai kuasa ka ira nompowia kabaraka-kabaraka ante tandai-tandai to nipogumaa ala mompakakono tesa ira ewa towe belona etu.
4 Tapi tau-tau riara ngata etu nosiewa mbotomo sambaꞌa bo sambaꞌa. Naria to nosinjabingga ka to Yahudi to daꞌa nomparasaya, pade naria woꞌu nosinjabingga ka i Paulus bo i Barnabas.
5 Pade nosintuwumo tau to Yahudi ante topanggeniaka-topanggeniaka ira nosanggani-nggani ante tau-tau ntanina daꞌa to Yahudi mompandasa pade mombarempe i Paulus bo i Barnabas etu ante watu.
6 Tapi ira rombaꞌa nangginjani nia etu sampe ira nalai mpaka ri Bagia Likaonia, etumo ri ngata Listra, ngata Derbe pade ri ngata-ngata ntanina ri bagia etu.
7 Pade ri setu woꞌu ira nompatolele ka tau Kareba Belo.
Kajadia-kajadia ri ngata Listra
8 Ri ngata Listra naria sambaꞌa langgai kadana napunggu mami nggari pesuwuna. Iꞌa daꞌa ntoto namala nolumako sabana nalente mpuꞌu kadana.
9 Tau etu nekatoko ri setu nangepe tesa i Paulus. Tempo i Paulus nanggita tau etu ninjanina tau etu nomparasaya mpuꞌu sampe iꞌa mamala rapakabelo. Jadi i Paulus nanggita iꞌa
10 pade nanguli ante suara namangga, “Pekanggore pakanoa!” Sangga nangepe etu nekanggoremo topunggu etu nasalisa pade nompamula nolumako ri setu.
11 Sangga nikita ntau dea ri setu nuapa to nikawia i Paulus nongaremo ira ante basa ira mboto to niuli Basa Likaonia, “Nanaꞌumo wiata-wiata ri dunia nolenje mpomanusia!”
12 Niuli ira i Barnabas iꞌamo wiata Zeus, pade i Paulus wiata Hermes apa iꞌamo topotesa. a
13 Naopu etu naratamo topanggeniaka baruga wiata Zeus to naria ri sawaliku ngata etu. Iꞌa nanggeni japi-japi pomawa ante wunga-wunga mpaka ri bobaa ngata etu sabana iꞌa ante todea etu madota mombasomba i Paulus bo i Barnabas etu.
14 Sangga niepe i Paulus bo i Barnabas nuapa patuju tau dea etu, niseka iramo pakea ira mboto ante nasusa mpuꞌu rara sabana tau dea etu madota mombasomba ira. Nangowamo ira mpaka ri tatongo ntau dea etu pade nongare nombatagi todea etu iweꞌi:
15 “Sampesuwu-sampesuwu, neꞌe komi mombasomba kami! Kami eꞌi manusia biasa woꞌu ewa komi! Kami narata ri seꞌi mompatolele Kareba Belo ka komi ala komi mompalasi ada komi mepue ka wiata-wiata eꞌi pade marata ri jaꞌi Alatala to natuwuna. Iꞌamo to nompajadi langi bo dunia bo tasi pade pura-pura to naria riarana.
16 Tempo nokolu Alatala nompalamba pura-pura manusia natuwu nantuki dota ira mboto.
17 Naupa iwetu, bate-batena naria powiana to nabelo ewa tandai to nompakanoto ka kita Iꞌamo Alatala. Niwaina ka kita uja nggari langi, pade niwaina isi panggawiata ane narata ntoana. Niwaina woꞌu ka kita panggoni pade niwaina woꞌu kadamba rara.”
18 Naupa suro-suro etu nombatagi iwetu, sakedi-sakedipa daꞌa namala ira mombataꞌamaka tau dea mombasomba ira.
19 Naopu etu naratamo bara sakuya mbaꞌa tau to Yahudi nggari ngata Antiokhia ri Bagia Pisidia bo nggari ngata Ikonium. Ira nantanara tau dea ri Listra etu ala ira woꞌu mangewa i Paulus. Pade ira nombarempe i Paulus ante watu, pade iꞌa niumbunjai ira mpaka ri sawaliku ngata. Niuli ira namatemo iꞌa.
20 Tapi tempo topomparasaya-topomparasaya ri setu nekanggore nantatiku iꞌa, nembangu bali iꞌa pade nesua woꞌumo iꞌa riara ngata. Pade naeo to nailena nalaumo iꞌa mpaka ri ngata Derbe mpasanggani-nggani ante i Barnabas.
Paulus bo Barnabas nanjili mpaka ri ngata Antiokhia ri Bagia Siria
21 Ri ngata Derbe i Paulus bo i Barnabas nompatolele Kareba Belo pade ri setu nadea tau nomparasaya i Pue Yesus. Naopu etu nanjilimo ira rombaꞌa mpaka ri ngata Listra. Pade nggari setu nalaumo ira mpaka ri ngata Ikonium pade mpaka ri ngata Antiokhia ri Bagia Pisidia.
22 Ri ngata-ngata etu ira nompakaroo rara topomparasaya i Pue Yesus. Niuli ira, “Kita kana maroso momparasaya i Pue Yesus. Neꞌe mokanggaura. Kita kana mombarasai madea susa ntanimo ruru pade mamala kita mesua riara Poparenta nu Alatala.”
23 Pade ri ngata-ngata etu i Paulus bo i Barnabas nangonggotaka topanggeniaka-topanggeniaka topomparasaya i Pue Yesus. Ira napuasa bo nosambaya ka topanggeniaka-topanggeniaka etu ala ira raporoa i Pue to niparasaya ira.
24 Naopu etu napolamo i Paulus bo i Barnabas nombaliunaka Bagia Pisidia sampe narata ri Bagia Pamfilia.
25 Pade naopu ira nompatolele Tesa nu Alatala ri ngata Perga, notuamo ira mpaka ri ngata Atalia ri wiwi ntasi.
26 Nggari setu ira nesawi sakaya bete manjili mpaka ri ngata Antiokhia ri Bagia Siria. Ri ngata etumo ira nokolu niposambaya ntopomparasaya i Pue Yesus ala Alatala momporoa ira riara panggawia to lako nipakaopu ira weꞌi-weꞌi.
27 Sangga narata ri ngata Antiokhia nipasiromu ira topomparasaya ri setu. Pade nitesa iramo pura-pura nuapa to nipowia Alatala niposabana ira. Nitesa ira woꞌu iwenu Alatala nombawai loga ka tau-tau daꞌa to Yahudi momparasaya Yesus.
28 Pade nasaemo i Paulus bo i Barnabas netoꞌo ri ngata Antiokhia nosanggani-nggani ante topomparasaya i Pue Yesus ri setu.