Barnabas bo Paulus nompatolele Kareba Belo ri Lewuto Siprus
13
Ri tatongo ntopomparasaya ri ngata Antiokhia naria bara sakuya mbaꞌa nabi pade guru to nompasimbayu Tesa nu Alatala, etumo i Barnabas, i Simeon to nidae i Wuri, pade i Lukius nggari ngata Kirene, i Menahem to nipakabete mpasanggani-nggani ante Magau Herodes Antipas, pade i Saulus.
2 Naria sanggani, tempo ira pura-pura nantoiya Alatala pade napuasa, Nosa Nagasa nu Alatala notesa ka ira, “Onggotaka ka Aku i Barnabas bo i Saulus ala ira manjoko panggawia to nipakatantuku ka ira.”
3 Jadi naopu ira pura-pura napuasa pade nosambaya woꞌumo ira nombadika pale ira ri balengga i Barnabas bo i Saulus, pade nisuromo ira rombaꞌa etu nalau mompatolele Kareba Belo.
4 Jadi nalaumo i Barnabas bo i Saulus mpaka ri ngata Seleukia nantuki tesa nggari jaꞌi Nosa Nagasa nu Alatala ka ira. Nggari setu nosumombamo ira mpaka ri Lewuto Siprus.
5 Narata ri ngata Salamis, nipatolele iramo Tesa nu Alatala ri sapo-sapo mpodade to Yahudi. Yohanes Markus woꞌu nantuki nantulungi ira riara mpolumako ira.
6 Naopu Lewuto Siprus etu nipolumako ira, naratamo ira ri ngata Pafos. Ri setu ira nomposirata ka sambaꞌa tau to Yahudi to nosanga ka i Bar-Yesus. Iꞌa sambaꞌa sando to nompangaku korona sambaꞌa nabi Alatala, tapi daꞌa nakono.
7 Iꞌa nowega ka Gubernur ri lewuto etu, to nosanga ka i Sergius Paulus. Gubernur etu sambaꞌa tau to nataꞌuna. Iꞌa nompokio i Barnabas bo i Saulus sabana iꞌa madota mangepe Tesa nu Alatala.
8 Aga sando etu i Bar-Yesus, to nosanga woꞌu Elimas riara Basa Yunani, nangewa i Barnabas bo i Saulus. Iꞌa nompasimbuku ala Gubernur etu neꞌe momparasaya Yesus.
9 Tapi i Saulus, to nidae woꞌu i Paulus, naponu ante Nosa Nagasa nu Alatala. Iꞌa nompenaa mpadodo sando etu,
10 pade niulina, “He iko, topebagiu to najaꞌana, ana Magau nu Seta! Ikomo bali pura-pura anu to nanoana! Nokuya iko daꞌa nenonto mompakadenggo jala i Pue to nabelona?
11 Kita weꞌi! Pue kana mombasuku iko! Iko kana maburo sampe daꞌa mana mamala manggita eo bara sakuya mbengi kasaena!”
Nangepe etu kaliu-liu naburomo mata i Bar-Yesus sampe iꞌa kana nalau nangelo-ngelo tau mombanini iꞌa.
12 Sangga nikita Gubernur nuapa to najadina etu, niparasayanamo i Pue Yesus. Nasumara mpuꞌu iꞌa nangepe pepatuduki ewa i Pue.
Paulus bo Barnabas nalau ri ngata Antiokhia ri Bagia Pisidia
13 Nggari ngata Pafos iPaulus bo roa-roana nesawi sakaya mpaka ri ngata Perga ri Propinsi Pamfilia. Ri setu Yohanes Markus nompalasi ira pade nanjili bali mpaka ri ngata Yerusalem.
14 Nggari ngata Perga i Paulus bo i Barnabas nompapola polumako ira mpaka ri ngata Antiokhia ri Bagia Pisidia. Tempo Eo Mpenonto nalaumo ira nesua ri sapo mpodade to Yahudi pade nekatoko ri setu.
15 Naopu nombabasa tesa nggari buku i Musa bo buku-buku nabi-nabi, topanggeniaka-topanggeniaka sapo mpodade etu nompakau tau mompekutana i Paulus bo roa-roana, “Sampesuwu-sampesuwu, ane maria tesa komi mompakaroso pomparasaya tau-tau eꞌi, kami mombawai loga ka komi mombatesa etu ka ira.”
16 Jadi nekanggoremo i Paulus, pade niwiatakana palena, pade niulina, “Sampesuwu-sampesuwuku to Israel, pade pura-pura sampesuwu-sampesuwuku ntanina ri seꞌi to naeka ri jaꞌi Alatala. Epemo tesaku!
17 Alatala to nipesombata to Israel nompelisi totuꞌa-totuꞌata nggaolu majadi todeana. Pade Iꞌa nompakadea muli ira tempo ira danetoꞌo ri tana Masir. Naopu etu ante kabaraka nabete Alatala nanggeni ira nesuwu nggari tana Masir.
18 Pade patampulu mpae kasaena Alatala nosabara nanggita pokainggu ira riara karawa baina.
19 Pade naopu Iꞌa nompakaropu pitumbaꞌa magau ante todea-todea ira ri tana Kanaan, tana etu nibagi-bagina ka to Yahudi majadi tana ira.
20 Etu pura-pura nikawia Alatala riara patatu limampulu mpae kasaena.
Naopu tana Kanaan etu nibagi-bagina ka to Yahudi, Alatala nompakatantu ka ira topotangara-topotangara nanggeniaka ira. Topotangara kaopuna etumo i nabi Samuel.
21 Naopu etu ira nerapi sambaꞌa magau raonggotaka ka ira to mamala manggeniaka ira. Jadi Alatala nompakatantu ka ira i Saul, ana i Kish nggari muli i Benyamin najadi magau ira. Pade iꞌa nanggeniaka ira patampulu mpae kasaena.
22 Pade naopu i Saul nileso Alatala, nipelisina woꞌu i Daud najadi magau ira. Iweꞌimo to niuli Alatala ewa i Daud: ‘Nikitaku i Daud ana Isai sambaꞌa tau to nompakadamba raraku. Iꞌa kana manggawia nuapa pura to kupodota.’ a
23 Pade nggari muli i Daud etu nionggotaka Alatala ka to Israel sambaꞌa Magau to Mompakasalama to nijanjina, etumo Yesus.
24 Daꞌapa Yesus nompamula panggawiana, Yohanes Topediu nompatuduki ka to Israel ira pura-pura kana majea nggari silaka pade ira kana radiu.
25 Pade tempo mana masaeka maopu panggawiana nangulimo Yohanes ka tau dea, ‘Aku eꞌi daꞌa Magau to nipopea komi! Tapi toramo! Iꞌa kana marata maliu aku eꞌi, pade Iꞌapa neliu nggabete pade aku. Nau aga mombawole lui sapatuna aku daꞌa masipato.’
26 Sampesuwu-sampesuwu pura-pura, nabeloka komi muli Abraham, nabeloka komi pura-pura to naeka ri jaꞌi Alatala. Kitamo to nipakatu Alatala ka Kareba Belo etu to nompakanoto iwenu kita mamala rapakasalama.
27 Tau-tau to netoꞌo ri ngata Yerusalem bo topanggeniaka-topanggeniaka ira daꞌa nangginjani Yesus etumo Magau to Mompakasalama. Daꞌa woꞌu ninjani ira pepatuduki nu nabi-nabi to nibasa ri Eo-eo Mpenonto. Tapi tesa nabi-nabi etu nipakadupa ira tempo ira nombasuku Yesus.
28 Naupa daꞌa nirata ira nau aga sangele sala nggari jaꞌina to masipato rasuku mamate, niperapi ira ka Gubernur Pilatus ala Yesus rapatesi.
29 Sangga naopupa ira nompowia pura-pura to nitulisi riara Buku Nagasa ewa Iꞌa, watabakuna nitaꞌuraka nggari kayu parika pade niboli riara dayo.
30 Tapi Alatala nompakatuwu bali Iꞌa nggari kamatena.
31 Pade naopu etu riara bara sakuya mbengi nadea nggani Iꞌa nompopokita korona ka tau to nantuki Iꞌa nggari tana Galilea mpaka ri ngata Yerusalem. Ira etumo to najadi sabi-sabina ka tau to Yahudi.
32 Jadi sampesuwu-sampesuwu, weꞌi-weꞌi kami narata mompatolele ka komi Kareba Belo etu. Nuapa to nijanji Alatala ka totuꞌa-totuꞌata nggaolu,
33 etu nipakadupanamo ka kita tempo Iꞌa nompakatuwu bali Yesus nggari kamatena. Naria nitulisi riara Mazmur karonguna iweꞌi:
‘Ikomo Anaku,
eo eꞌi Aku najadi Umamu.’ (Mzm. 2:7)
34 Alatala nompakatuwu bali Yesus nggari kamatena, pade daꞌa nompakamba watabakuna mapopo riara dayo. Nanotomo etu sabana niulina iweꞌi:
‘Pojanji to nagasa bo natantu rapakadupa to nijanjiku ka i Daud,
pojanji etu kana kupakadupa ka Iko.’ (Yes. 55:3)
35 Naria woꞌu tesa Mazmur ntanina to nanguli,
‘Pue daꞌa mompakamba Batuana to Nagasana mapopo riara dayo.’ (Mzm. 16:10)
36 Tesa etu daꞌa nosinggawela ante i Daud, sabana naopu iꞌa nompowia nuapa to nipakau Alatala ka iꞌa, namatemo iꞌa. Pade iꞌa nitana namosu dayo ntotuꞌana nggaolu, pade watabakuna naopumo napopo.
37 Tapi Yesus to nipakatuwu Alatala bali nggari kamatena daꞌa ria napopo.
38 Jadi sampesuwu-sampesuwu, kana ranjani komi aga Yesus to namala mombaampungi silaka.
39 Silaka-silakata daꞌa namala raampungi ane kita aga mantuki Atura-atura agama to nipapola i Musa ka kita. Tapi butu mbaꞌa tau to nomparasaya Yesus, silakana kana raampungi.
40 Etumo sabana komi kana mainga ala neꞌe majadi ka komi nuapa to niuli nabi-nabi iweꞌi:
41 ‘Kita weꞌi komi topesalaraka!
Komi kana mawiora pade maropu sanggani,
sabana tempo weꞌi-weꞌi Aku kana mompowia sangele
anu daꞌa ntoto raparasaya komi,
nau damo maria tau motarangga etu ka komi.’” (Hab. 1:5)
42 Naopu notesa iwetu nesuwumo i Paulus bo i Barnabas nggari sapo mpodade etu. Narata ri sawalikuna ira niperapi ntau ala manjili bali ri Eo Mpenonto marata mompapola tesa to nitesa ira etu.
43 Sangga nesuwu puramo tau-tau nggariara sapo mpodade etu, nadea tau-tau to Yahudi bo tau ntanina to nesuamo ri agama Yahudi nantuki i Paulus bo i Barnabas. Suro-suro etu nompatuduki ira ala ira maroo rara metidombo ri towe belo nu Alatala.
44 Eo Mpenonto marata miki pura-pura tau riara ngata etu narata mangepe Tesa nu Alatala.
45 Tempo to Yahudi nanggita tau dea etu, nasiriati mpuꞌu rara ira. Ira nombasalaraka i Paulus, pade pura-pura to nitesana niewa ira.
46 Naupa iwetu, i Paulus bo i Barnabas nelabi kabiana notesa ka ira, “Tesa nu Alatala kana ratesa ka komi to Yahudi ntanimo ruru. Aga komi mombabali tesa etu. Komi nompoara mombarata katuwua mabelo sampe ri kasae-saena. Sabana etu kami mana mompatolele tesa etu ka komi to Yahudi! Weꞌi-weꞌi kami malau ri jaꞌi ntau daꞌa to Yahudi,
47 sabana to niparenta i Pue ka kami iweꞌi: ‘Aku mompakatantu komi majadi reme mombawanta tau-tau daꞌa to Yahudi, ala nggari jaꞌi komi, pura-pura tau ri dunia mangginjani iwenu Alatala mompakasalama manusia.’”
48 Tempo tau-tau daꞌa to Yahudi ri setu nangepe tesa etu, nadamba mpuꞌu rara ira. Pade ira nanguli, “Nabelo mpuꞌu Tesa nu Alatala eꞌi!” Pade tau-tau to nipakatantu Alatala mombarata katuwua mabelo sampe ri kasae-saena, tau-tau etumo nomparasaya i Pue Yesus.
49 Pade Tesa i Pue natolele ri umba-umba ri bagia etu.
50 Tapi tau-tau to Yahudi ri setu nompakapane rara besi-besi to noanggana to naeka ri jaꞌi Alatala ante balengga-balengga riara ngata etu. Ira nompopeumba posiewa ante i Paulus bo i Barnabas pade nompopalai ira rombaꞌa nggari bagia etu.
51 Jadi i Paulus bo i Barnabas etu nombasapunai sowu nggari kada ira ewa tandaina tau-tau etu kana rasuku Alatala. Pade nalaimo ira mpaka ri ngata Ikonium.
52 Topomparasaya-topomparasaya i Pue Yesus ri ngata Antiokhia mpuꞌu-mpuꞌu nadamba rara, pade ira naponu ante Nosa Nagasa nu Alatala.