Topomparasaya i Pue Yesus nipandasa woꞌumo
12
Kira-kira tempona etu woꞌu nompamulamo Magau Herodes Agripa nompandasa bara sakuya mbaꞌa topomparasaya.
2 Iꞌa nompakau tau nombatimbe Yakobus sampesuwu i Yohanes.
3 Sangga nikita i Herodes powiana etu nompakadamba rara ntau to Yahudi, nikawiana woꞌumo powia ewa etu. Niparentana tau manjoko i Petrus woꞌu. Anu etu najadi tempo Eo Bete Posusa Roti Daꞌa Nidika Ragi. a
4 Naopu i Petrus nisoko, iꞌa nisuaraka riara tarunggu, pade i Herodes nompakau sampulu onombaꞌa tantara manggatono iꞌa, patambaꞌa sanggani. Patuju i Herodes ala i Petrus ratangara ri ngayo ntau dea maopu Eo Bete Paska etu.
5 Jadi i Petrus nitaꞌamaka riara tarunggu. Tapi topomparasaya-topomparasaya i Pue Yesus etu bate-batena nosambaya ka i Petrus ante mpuꞌu-mpuꞌu ri jaꞌi Alatala.
Petrus nikabasaka nggariara tarunggu
6 Tempo damo sambengi Magau Herodes nopatuju mombatangara i Petrus ri ngayo todea, i Petrus naturu ri olo rombaꞌa tantara riara tarunggu etu, nipoꞌu ante rongu rante. Naria woꞌu rombaꞌa tantara ntanina nanggatono pewobo tombi tarunggu etu.
7 Sampegoli naratamo malaeka i Pue nekanggore ri setu, pade reme newanta riara tombi tarunggu etu. Malaeka etu nantapee-pee palena ri koro i Petrus mombalike iꞌa. Nangulimo malaeka etu, “Pembangumo masalisa!” Tempo etu woꞌu nakabasaka mbotomo rante ase nggari pale i Petrus etu.
8 Naopu etu nanguli malaeka, “Pasuamo pakeamu, pade pasua woꞌumo sapatumu.” Nangepe etu i Petrus nantuki parenta nu malaeka etu. Naopu etu nanguli woꞌumo malaeka, “Pakemo buyamu pade kamai tukimo aku!”
9 Pade nalaumo i Petrus nantuki malaeka etu. Tapi tempo etu daꞌapa nanoto rara i Petrus nuapa to nipowia malaeka etu mpuꞌu-mpuꞌu najadi. Nipekirina etu aga saongu panggitana.
10 Ira nolumako nombaliunaka petoꞌo topojaga pewobo pamulana, pade pewobo karonguna, pade naratamo ira ri bobaa ase mpaka riara ngata. Bobaa ase etu natebea mboto, pade nesuwumo ira nantuki sampenga jala. Narata ri setu sampegoli nalipomo malaeka etu nompalasi i Petrus.
11 Naopu etu nanotomo rara i Petrus pade iꞌa nanguli, “Weꞌi-weꞌi mpuꞌu-mpuꞌu ninjanikumo i Pue nompakau malaekana mombakabasaka aku nggari kuasa Magau Herodes pade nggari mpengaya-ngaya nuapa rapowia tau-tau to Yahudi ri jaꞌiku.”
12 Naopu nompekiri kajadia etu, nalaumo i Petrus mpaka ri sapo i Maria, indo Yohanes Markus. Ri sapo etu nadea tau nasiromu nosambaya.
13 Petrus nantenggedeu pewobo ri sawalikuna, pade naratamo sambaꞌa batua besi nosanga ka i Rode mombabea pewobo.
14 Tempo iꞌa nangepe suara i Petrus, nadamba mpuꞌumo iꞌa. Pade kaliu-liu nesua balimo iꞌa riara njapo etu, daꞌa nibeana pewobo etu. Pade niulina ka tau-tau ri setu, “Petrus naria ri sawalikuna etu!”
15 Tapi nangulimo ira ka ngana besi etu, “Nagilamo iko!”
Tapi i Rode bate-batena nanguli, “Mpuꞌu-mpuꞌu iꞌa etu i Petrus!”
Nangepe etu ira nanguli, “Etu aga malaekana!”
16 Tempo ira notesa-tesa, i Petrus daꞌa nenonto-nonto nantenggedeu pewobo ri sawalikuna. Kaopuna nalaumo ira nombabea pewobo. Tempo nikita ira i Petrus mpuꞌu etu, nogumaa mpuꞌumo ira.
17 Petrus nombawiataka palena ala ira pura-pura malino, pade nitesana iwenu i Pue nanggeni iꞌa nesuwu nggariara tarunggu etu. Pade niulina woꞌu, “Popanjani ka Yakobus pade sampesuwu-sampesuwuta ntanina nuapa to najadi eꞌi.” Naopu etu nalaimo i Petrus mpaka ri petoꞌo ntanina.
18 Naeompadondona naingu ante naeka mpuꞌumo tantara-tantara to nanggatono tarunggu etu. Nosimpekutanamo ira, “Ri umbamo i Petrus?”
19 Magau Herodes nompakau tau mangelo i Petrus, tapi ira daꞌa nombarata iꞌa. Etu sampe Magau Herodes nomparenta ala tantara-tantara sampulu onombaꞌa to nanggatono i Petrus etu raparesa pade rakeni rapatesi. Naopu etu notuamo Magau Herodes nggari Bagia Yudea mpaka ri ngata Kaisarea, pade netoꞌomo iꞌa ri setu bara sakuya kasaena.
Tesa kamate Magau Herodes
20 Magau Herodes narau mpuꞌu rarana ka pue ngata Tirus bo Sidon. Sabana etu ira nosanggani-nggani narata merapi mosinggabelo ante i Herodes, apa ngata ira etu aga nanjarumaka panggoni nggari bagia to niparenta i Herodes. Pamulana ira nombabuju sambaꞌa batua to nombaurusi sapo Magau Herodes to nosanga ka i Blastus, ala iꞌa mosabingga ka ira. Naopu etu nalaumo ira nantingayo Magau Herodes merapi mosinggabelo.
21 Jadi ri eo to nipakatantu, Magau Herodes nompasua pakea kamagauna pade nalau nekatoko ri pekatoko magau motesa ka todea.
22 Nanggita etu nongare-ngaremo todea etu nantoiya i Herodes. Niuli ira, “Eꞌimo suara nu wiata, daꞌa suara nu manusia!”
23 Ri tempo etu woꞌu malaeka i Pue nompakajuꞌa Magau Herodes sabana iꞌa daꞌa nombabila Alatala, iꞌa daꞌa nombabali tesa todea etu. Jadi tempona iꞌa danatuwu nakaulemo iꞌa, nikoni ndoro sampe namate.
24 Naopu etu nantambai eona nantambai natolele Tesa nu Alatala, pade nantambai kadea ntau nomparasaya i Pue Yesus.
25 Sangga naopu i Barnabas bo i Saulus nanggeni petulungi to Antiokhia ka topanggeniaka topomparasaya ri ngata Yerusalem, nanjilimo ira mpaka ri ngata Antiokhia. Ira nanggeni Yohanes Markus woꞌu mpasanggani-nggani ante ira.