Tesa Petrus ka topomparasaya i Pue Yesus ri Yerusalem
11
Suro-suro i Pue Yesus pade topomparasaya ri njumaongu ngata ri Bagia Yudea nangepe lele to nanguli tau-tau daꞌa to Yahudi woꞌu nomparasaya Tesa nu Alatala.
2 Jadi tempo i Petrus nalau mpaka ri ngata Yerusalem, tau-tau to Yahudi to nomparasaya i Pue Yesus nanjalaraka iꞌa.
3 Ira nanguli, “Nokuya komi nalau ri sapo ntau daꞌa to Yahudi, ira tau daꞌa nisuna? Nokuya komi nanggoni mpasanggani-nggani ante ira?”
4 Nangepe tesa etu, notesamo i Petrus ka ira pura-pura anu najadi nompamula nggari pamulana. Niulina,
5 “Tempo aku nosambaya ri ngata Yope, aku nanggita saongu panggita. Riara panggitaku etu nikitaku sangaya ewa sabala kae tarapaal nabini niulunjaka nggari langi natiloe ri siduna patanjidu nituꞌu ri ngayoku.
6 Riara nu kae tarapaal etu nikitaku mpengele binata nokada patanggada, pade binata-binata naila, binata-binata nenjoyo, pade tonji-tonji naila.
7 Pade niepeku suara nanguli ka aku, ‘Anumo, pekanggoremo, Petrus! Sambalemo binata eꞌi pade konimo!’
8 Tapi nesonomo aku, ‘Daꞌa, Pue! Daꞌapa ria sanggani aku nanggoni to nakapali pade natantoru ewa etu!’
9 Tapi notesa woꞌumo suara nggari langi etu karongganina, ‘Nuapa to niuli Alatala namala rakoni, neꞌe muuli nakapali!’
10 Tolunggani etu najadi, pade kae etu neore bali mpaka ri langi.
11 Ewa nisuka tempona etu woꞌu, tolumbaꞌa tau nggari ngata Kaisarea to nipakau i Kornelius ri jaꞌiku narata ri sapo petoꞌoku etu.
12 Pade Nosa Nagasa nu Alatala nompakau aku malau mpasanggani-nggani ante ira ante daꞌa ria kakini-kini raraku. Jadi nalaumo aku, pade onombaꞌa topomparasaya nggari Yope eꞌi nantuki aku mpaka ri Kaisarea, pade kami pura-pura nesua ri sapo i Kornelius.
13 Naopu etu i Kornelius nantesa ka kami iwenu iꞌa nanggita sambaꞌa malaeka nekanggore riara njapona pade nanguli, ‘Pakaumo tau mpaka ri ngata Yope mompokio sambaꞌa tau nosanga ka i Simon Petrus.
14 Iꞌa kana manguli ka iko kareba to mompakanoto iwenu komi saongu njapo mamala rapakasalama.’”
15 Pade i Petrus nompapola tesana, “Tempo aku danotesa ka ira, nanaꞌumo Nosa Nagasa nesua ri jaꞌi ira nasimbayu ewa najadi ante kita ri pamulana bopia.
16 Ri setu nitora nu raraku tesa i Pue Yesus to nanguli, ‘Yohanes nombadiu tau ante ue, tapi komi kana radiu ante Nosa Nagasa nu Alatala.’
17 Sampesuwu-sampesuwuku, nanotomo Alatala nombawai Nosa Nagasana ka ira tau daꞌa to Yahudi nasimbayu ewa niwaina ka kita tempo kita nomparasaya i Pue Yesus Kristus. Sabana etu daꞌa namala aku mombatondo patuju nu Alatala!”
18 Tempo ira to nasiromu ri setu nangepe tesa i Petrus, mana ira nebali. Ira aga nosanggani-nggani nantoiya Alatala. Niuli ira, “Ane iwetu, tau-tau daꞌa to Yahudi woꞌu nipaloga Alatala majea nggari silaka-silaka ira pade mantarima katuwua mabelo sampe ri kasae-saena!”
Topomparasaya i Pue Yesus ri ngata Antiokhia
19 Naopu i Stefanus namate niparunju watu, nadea topomparasaya i Pue Yesus nalai niraga nosimpogaꞌa-gaꞌa mpaka ri umba-umba ngata. Naria to nalai sampe ri Bagia Fenisia, pade naria woꞌu nalai mpaka ri Lewuto Siprus bo ngata Antiokhia. Ira nompatolele Kareba Belo nggari jaꞌi Alatala ri ngata-ngata nikalau ira, tapi aga ka tau-tau to Yahudi.
20 Tapi nggari topomparasaya i Pue Yesus etu naria ira nggari Lewuto Siprus pade ngata Kirene to nalau mpaka ri ngata Antiokhia pade nompatolele Kareba Belo i Pue Yesus ka tau-tau daꞌa to Yahudi woꞌu.
21 Kuasa i Pue naria nomporoa ira sampe nadea to Antiokhia nomparasaya pade nombajuju katuwu ira ka i Pue Yesus.
22 Kareba ewa nuapa to najadi ri ngata Antiokhia etu natolele woꞌu mpaka ri jaꞌi ntopomparasaya i Pue Yesus ri ngata Yerusalem. Nangepe kareba etu, ira nompakau i Barnabas mpaka ri ngata Antiokhia.
23 Sangga narata i Barnabas ri setu pade nikitana iwenu Alatala nombawai rasi ka ira etu, nadamba mpuꞌu rarana. Jadi niulina ka ira, “Komi kana maroo mantuki i Pue Yesus ante mpuꞌu-mpuꞌu rara!”
24 Barnabas eꞌi, iꞌa sambaꞌa tau to nabelo rarana, pade to naponu ante Nosa Nagasa nu Alatala, pade iꞌa sambaꞌa tau mpuꞌu-mpuꞌu nomparasaya i Pue Yesus. Etu sampe nadea tau ri Antiokhia nomparasaya i Pue Yesus.
25 Naopu etu nalaumo i Barnabas mpaka ri ngata Tarsus nopaelo i Saulus.
26 Sangga nosirata iꞌa ante i Saulus, nikenina iꞌa mpaka ri ngata Antiokhia. Pade ri setu sampae kasaena ira nasiromu mpasanggani-nggani ante topomparasaya pade nompatuduki tau dea. Ri ngata Antiokhia etumo topomparasaya i Pue Yesus pamula-mulana niuli tau to Karistee.
27 Ri tempo etu woꞌu naria bara sakuya mbaꞌa nabi nggari ngata Yerusalem notua mpaka ri ngata Antiokhia.
28 Ri tatongo ira naria sambaꞌa tau nosanga ka Agabus. Iꞌa nekanggore ri tatongo ira pade ante pekeniaka Nosa Nagasa nu Alatala iꞌa nombaboto kana majadi nggapurina ri ntiku-ntiku dunia oromate to neliu-liuna. (Oromate etu mpuꞌu-mpuꞌu najadi tempo Magau Klaudius najadi Magau nto Roma.)
29 Nangepe etu topomparasaya i Pue Yesus ri Antiokhia nompakatantu mombawai petulungi ira ka sampesuwu-sampesuwu ira riara i Pue to netoꞌo ri Bagia Yudea. Ira newai nantuki pompakulena sambaꞌa bo sambaꞌa.
30 Sintuwu ira etu nipajalamo, pade i Barnabas bo i Saulus nipakau ira manggeni pewai ira etu ka topanggeniaka topomparasaya i Pue Yesus ri Bagia Yudea etu.