SURA PAULUS KA TOPOMPARASAYA RI NGATA
ROMA
Petabe
1
Sura eꞌi nggari jaꞌiku i Paulus, batua Yesus Kristus, ka komi topomparasaya i Pue Yesus ri ngata Roma to nipotowe Alatala bo nipokiona majadi todeana. Aku nipelisi bo nisuro manggeni Kareba Belo nggari jaꞌi Alatala
2 to nijanjina nggaolu nantuki tesa nggari nabi-nabi to nitulisi riara Buku Nagasa.
3-4 Kareba Belo etu nantesa Ana nu Alatala, etumo Pueta Yesus Kristus. Ewa manusia Iꞌa muli Magau Daud. Tapi Iꞌa woꞌu Ana nu Alatala. Etu nipakanoto Alatala ante kuasa Nosa Nagasana tempo Iꞌa nompakatuwu bali Yesus nggari kamatena.
5 Nggari jaꞌi Yesus woꞌu kami nantarima rasi Alatala, etumo najadi surona, ala kami mamala manggeni tau nggari pura-pura ngata momparasaya bo mekou ri jaꞌi Pue Yesus ala sangana rabila bo ratoiya.
6 Pade komi ri ngata Roma woꞌu nesua todea to nipokio Alatala majadi bagia Yesus Kristus.
7 Perapi Umata Pue Alatala bo i Pue Yesus Kristus mombagane komi bo mombawai katuwua mabelo ka komi.
Paulus madota manggita topomparasaya i Pue Yesus ri ngata Roma
8 Pamula-mulana aku nosukuru ri jaꞌi Pue Alatalaku riara sanga Yesus Kristus sabana katuwu komi pura-pura. Sabana kareba to nantesa pomparasaya komi natolele ri umba-umba ri dunia.
9 Aku tunggai nanggeni komi riara posambayaku. Alatala mboto namala mantakono tesaku eꞌi. Iꞌamo Alatala to nitulungiku ante mpuꞌu-mpuꞌu raraku ante nanggeni Kareba Belo to nantesa Anana.
10 Aku batena merapi ka Alatala ane rapodotana weꞌi-weꞌi aku mamala momai mantalioda komi.
11 Sabana naino mpuꞌu raraku mantalioda komi ala aku mamala mompalele ka komi pompakule nggari jaꞌi Nosa Nagasa nu Alatala sampe pomparasaya komi rapakaroso.
12 To nipatujuku ala kita mpasanggani-nggani mamala mosipakaroso rara nggari pomparasayata sambaꞌa bo sambaꞌa.
13 Sampesuwu-sampesuwu, to nipodotaku ala ranjani komi nadea ngganimo aku nonia momai mantalioda komi tapi sampe weꞌi-weꞌi bate-batena naria to nombalawa aku. Patujuku momai mantalioda komi ala maria asele nu bagoku ri tatongo komi nasimbayu ewa to najadi ri tatongo tau-tau daꞌa to Yahudi ntanina.
14 Sabana aku masipato mantulungi pura-pura tau, nabeloka tau nangginjani ada, nabeloka tau daꞌa nangginjani ada, nabeloka tau nosikola, nabeloka tau daꞌa nosikola.
15 Etu sampe aku mpuꞌu-mpuꞌu madota mompatolele Kareba Belo ka komi woꞌu to netoꞌo ri ngata Roma.
Jala manusia majadi manoa riara mpanggita Alatala
16 Daꞌa naeya mataku mompatolele Kareba Belo, sabana riara kareba etu naria kuasa Alatala to mompakasalama butu mbaꞌa topomparasaya; pamula-mulana tau to Yahudi pade tau-tau daꞌa to Yahudi woꞌu.
17 Sabana riara Kareba Belo nipakanoto iwenu kita majadi manoa riara mpanggita Alatala, etumo ante momparasaya nggari pamulana sampe kaopuna. Etu nasimbayu ewa tesa to nitulisi riara Buku Nagasa iweꞌi: “Tau to najadi nanoa riara mpanggita Alatala ante nomparasaya, iꞌamo to matuwu mabelo sampe ri kasae-saena.” a
PURA-PURA MANUSIA NASALA RIARA MPANGGITA ALATALA (1:18-3:20)
Manusia nasala sabana naupa ira nangginjani naria Alatala ira daꞌa nepue ka Iꞌa
18 Nggari suruga Alatala nompopokita rau rarana ka pura-pura tau to nanjapuaka Iꞌa bo nompowia kajaꞌana. Powia ira to najaꞌa etu nombalawa tau mangginjani pepatuduki to nakonona ewa Alatala.
19 Manusia masipato mawela rau rara nu Alatala sabana nanotomo ka ira nuapa to namala ranjani ira ewa Alatala. Etu nipakanoto Alatala mboto ka ira.
20 Sabana nompamula nggari tempo dunia nipajadi sampe weꞌi-weꞌi, nanotomo ka ira anu daꞌa natekita nggari jaꞌina, etumo kuasana to daꞌa ria kaopu-opuna bo ingguna ewa Alatala. Etu nanotomo ka ira nggari pura-pura nuapa to nipajadina sampe daꞌa ria to namala manguli, “Daꞌa ninjani kami!”
21 Sabana naupa ira nangginjani Alatala, ira daꞌa nombabila Iꞌa ewa Alatala, pade ira daꞌa woꞌu nosukuru ri jaꞌina. Tapi ira aga nompekiri anu daꞌa ria gunana bo rara ntaꞌi ira najadi narumau.
22 Ira nompangaku korona tau nanoto, tapi kakonona ira najadi todoyo.
23 Ira daꞌa nepue ka Alatala to daꞌa ria namate to neliu nggakuasa bo nagaya. Tapi ira aga nepue ka parantau-parantau nolenje mpomanusia, mpotonji, mpobinata to nokada patanggada bo binata to nekanjoyo to namala namate.
24 Sabana etu Alatala nompakamba ira nantuki dota rara ira mboto nowia kajaꞌana, sampe ira nompakatantoru koro ira sambaꞌa bo sambaꞌa.
25 Ira nanjambei pepatuduki ewa Alatala to nakonona ante pepatuduki to nasala. Daꞌa Topolemo to nibila bo nipesomba ira, tapi aga to nipajadina. Kakonona Topolemo etumo to masipato ratoiya sampe ri kasae-saena. Amin!
26 Sabana etu Alatala nompakamba ira nantuki dota rara ira to najaꞌa to nompakaeya. Besi-besi mana nompokono langgai ewa to nabiasa najadi ri jaꞌi manusia, tapi nompokono simbau ira besi.
27 Iwetu woꞌu langgai mana madota mosampaturu ante rongo ira mboto ewa to masipatona, tapi nariapa dota ira mogau sala ka ira simbau langgai. Ira nowia pokainggu to nompakaeya ira simbau langgai sampe kaopuna ira nawela balasi riara koro ira mboto to masipato ante powia ira to nasala.
28 Ira nompekiri daꞌa ria gunana mosinjani ante Alatala. Jadi etu sampe Alatala nompakamba pekiri ira najadi nagero sampe ira nompowia anu daꞌa masipato rapowia.
29 Jonjona, rara ntaꞌi ira naponu ante mpengele-ngele inggu to najaꞌa bo nadenggo. Ira daꞌa nabasa ante nuapa to naria ri jaꞌi ira, nawau rara ira, ira nasiriati, ira nadota mepatesi bo mosinggarau bo mebagiu. Ira nomboli rau, ira tunggai nantesa roa ira nggalino
30 bo nompakajaꞌa sanga tau ntanina. Ira nomporau rara Alatala, ira nalanga rara bo nabiasa nangoa. Ira nataꞌu nangelo akala mowia kajaꞌana bo ira daꞌa nekou ri jaꞌi ntotuꞌana.
31 Ira nadoyo, ira daꞌa namala raparasaya, daꞌa ria towe ira bo daꞌa ria asi mata ira nanggita sanggamanusiana.
32 Ninjani ira mamimo parenta nu Alatala to nanguli tau-tau to noinggu iwetu masipato rasuku sampe mamate. Tapi naupa iwetu kana nikawia ira woꞌu pokainggu etu, pade daꞌa aga etu, ira nasituju woꞌu ane tau ntanina nowia iwetu.