Alatala nombatangara tau ante nanoa, Iꞌa daꞌa nanggita lenje
2
Jadi sampesuwu-sampesuwu, ane komi nompakasala roamu daꞌa mamala komi manguli, “Aku eꞌi daꞌa ria salaku.” Sabana komi mboto woꞌu nompowia pokainggu to nasimbayu ewa pokainggu roa to nipakasalamu. Jadi ante nompakasala roamu iwetu komi woꞌu nompakasala koromu mboto!
2 Ninjanita mbotomo ane Alatala mombasuku tau to noinggu iwetu kabotu mpotangarana nanoa.
3 Tapi sampesuwu-sampesuwu, komi mboto woꞌu nanggawia pokainggu to nipakasalamu ka roamu. Jadi iwenu? Bara nipekiri komi naupa nowia iwetu komi mamala makabasaka nggari pesuku nu Alatala?
4 Alatala nabelo mpuꞌu rarana, Iꞌa mpuꞌu-mpuꞌu nosabara ri jaꞌi komi, pade Iꞌa daꞌa nasalisa mombasuku silaka-silaka komi. Tapi neꞌe komi manjapuaka kabelo nu Alatala etu! Toramo! Patuju kabelo nu rara Alatala etumo ala manggeni komi majea nggari silakamu!
5 Tapi komi nakoꞌo rara, daꞌa madota majea. Sabana etu komi mbotomo mantambai katomo nu pesuku to rapawela ka komi ri kaopu nu dunia tempo Alatala mompopokita rau rarana bo mombabutusi potangara ante manoa.
6 Sabana Alatala kana mombabalasi butu mbaꞌa tau nantuki powiana.
7 Iꞌa kana mombawai katuwua mabelo sampe ri kasae-saena ka ira to natutu nompowia to nabelona ala ira ratoiya bo rabila bo mombarata katuwua to daꞌa ria kaopu-opuna.
8 Tapi Iꞌa kana manggarau bo mombasuku butu mbaꞌa tau aga nompekiri korona mboto pade daꞌa nantuki pepatuduki to nakonona tapi aga nantuki to najaꞌana.
9 Butu mbaꞌa tau nompowia kajaꞌana kana mandasa bo mombarasai kasusa, pamula-mulana tau-tau to Yahudi pade tau-tau daꞌa to Yahudi woꞌu.
10 Tapi pura-pura tau to nompowia kabelona kana ratoiya bo rabila bo mombarata katuwua mabelo, pamula-mulana tau-tau to Yahudi pade tau-tau daꞌa to Yahudi woꞌu,
11 sabana Alatala daꞌa nanggita lenje.
Pura-pura manusia kana ratangara Alatala
12 Ane tau-tau to daꞌa nangginjani Atura-atura agama Yahudi nompowia silaka, ira kana mamate bo rapopogaꞌa nggari jaꞌi Alatala sampe ri kasae-saena. Tapi pesuku etu daꞌa nibutusi nantuki Atura-atura agama Yahudi. Tapi tau-tau to nangginjani Atura-atura agama Yahudi kana rasuku nantuki Atura-atura agama etu ane ira mowia silaka.
13 Sabana daꞌa tau-tau to nangepe Atura-atura agama to majadi manoa riara mpanggita Alatala, tapi tau-tau to nantuki Atura-atura etu.
14 Tau-tau daꞌa to Yahudi daꞌa nangginjani Atura-atura agama Yahudi. Tapi ane nggari dota ira mboto ira mantuki parenta-parenta to naria riara Atura-atura etu, batuana pekiri rara ntaꞌi ira mbotomo nanggeniaka katuwu ira nasimbayu ewa ira nangginjani Atura-atura agama Yahudi, naupa ira daꞌapa nangginjani Atura-atura etu.
15 Pokainggu ira mboto nompakanoto nuapa to niparenta riara Atura-atura agama ewa natetulisi riara ntaꞌi ira. Etu nipakanoto pekiri rara ntaꞌi ira mboto, sabana naria pompekiri ira nompakasala ira bo naria woꞌu pompekiri ira to nantakono ira.
16 Jadi ri Eo Mpotangara banepia Alatala kana mompakau Yesus Kristus mombatangara pura-pura manusia iwetu nantuki pura-pura nuapa to nitabuniaka riara pekiri rara ntaꞌi ira. Etumo to nipakanoto riara Kareba Belo to nipatoleleku.
Naupa to Yahudi nangginjani Atura-atura agama ira batena nasala riara mpanggita Alatala
17 Tapi umba komi to nompangaku koro komi tau to Yahudi. Komi nanjarumaka majadi manoa riara mpanggita Alatala ante mantuki Atura-atura agama. Komi nangoa ante nanguli, “Kamimo todea to nipelisi Alatala!”
18 Komi nangginjani dota nu Alatala pade komi nataꞌu nompakatantu nuapa to nabelona sabana komi nipatuduki nggari Atura-atura agama.
19 Nipekirimu komimo to nataꞌu nompatuduki tau daꞌa nosinjani ante Alatala nasimbayu ewa tau nombanini toburo. Pade nipekirimu komi woꞌu to najadi reme ri tatongo ntau to natuwu riara karumauna.
20 Pade nipekirimu komimo to nataꞌu nompatuduki tau-tau daꞌa ria adana pade nompaguru tau-tau nadoyo. Etu nipekirimu sabana riara Atura-atura agama Yahudi to naria ri jaꞌimu naria mpengele-ngele pangginjani bo pepatuduki to nakonona.
21 Jadi komi nompatuduki tau ntanina, tapi nokuya komi daꞌa nompatuduki koro komi mboto? Komi nompatuduki ka tau ntanina, “Neꞌe mangangga.” Tapi nokuya komi mboto nangangga?
22 Komi nompatuduki ka tau, “Neꞌe mogau sala ante tau daꞌa rongomu mboto.” Tapi nokuya komi mboto nogau sala iwetu? Komi narau rara nanggita banta tapi nokuya komi mboto nangala nuapa-nuapa to naria ri bunggu banta etu?
23 Komi nadamba-damba sabana naria Atura-atura agama Yahudi ri jaꞌimu. Tapi nokuya komi nanjalai Alatala ante daꞌa nantuki Atura-aturana etu?
24 Riara Buku Nagasa naria nitulisi iweꞌi: “Nggari pokainggu komi tau-tau to Yahudi sampe tau-tau daꞌa to Yahudi nombasalaraka Alatala.” a
Naupa tau to Yahudi nisuna ira batena nasala riara mpanggita Alatala
25 Ane komi matundu riara Atura-atura agama ada mposuna komi mpuꞌu-mpuꞌu naria gunana. Tapi ane komi mombaliunaka Atura-atura etu, ada mposuna komi mana ria gunana.
26 Jadi ane tau daꞌa to Yahudi to daꞌa nisuna mompariara parenta-parenta to nipakatantu riara Atura-atura agama, natantumo iꞌa kana ratarima Alatala nasimbayu ewa tau to Yahudi to nisuna.
27 Pade tau-tau to daꞌa nisuna kana mompakasala komi tau to Yahudi. Sabana nariamo buku Atura-atura agama ri jaꞌi komi pade komi nisuna, tapi komi nombaliunaka Atura-atura etu. Ira tau daꞌa nisuna, tapi iramo to natundu riara Atura-atura agama.
28 Jadi to Yahudi to nakonona to nireke todea nu Alatala daꞌa aga sangana to Yahudi. Pade ada mposuna to nakonona to nombatandai isema bagia nu Alatala daꞌa aga to nipowia ri koro manusia.
29 Tapi tau to Yahudi to mpuꞌu-mpuꞌu todea nu Alatala etumo tau to nantuki Alatala nggariara ntaꞌina. Pade powia to nombatandai isema bagia nu Alatala etumo pokarajaa Nosa Nagasa nu Alatala riara ntaꞌi mompakalipo dota rara to najaꞌa, daꞌa ada mposuna to nipowia manusia nantuki Atura-atura agama. Tau noinggu iwetu daꞌa ratoiya manusia, tapi iꞌa kana ratoiya Alatala.