Naupa nadea pelabina tau to Yahudi, ira batena nasala riara mpanggita Alatala
3
Bara maria to nekutana, “Ane iwetu nuapa pelabina tau to Yahudi? Nuapa gunana mantuki ada mposuna?”
2 Tantu nadea pelabina, naria mami gunana. Pamula-mulana tau to Yahudimo to niparasaya ka tesa-tesa nu Alatala.
3 Tapi iwenu ane maria ri tatongo ira to daꞌa naroo nomparasaya Alatala? Etu batuana Alatala daꞌa namala raparasaya?
4 Natantumo daꞌa ntoto nakono! Sabana nanotomo Alatala batena nanoa naupa pura-pura tau nodawa. Ewa to nitulisi riara Buku Nagasa iweꞌi:
“Pue, nuapa-nuapa mutesa, kana manoto kakono nu tesa etu.
Pade naupa Komi rapakasala, Komi bate-batena nakono.” (Mzm. 51:6)
5 Tapi ane kajaꞌata mompakanoto kanoa rara nu Alatala, neꞌe kita manguli Alatala daꞌa nanoa ane Iꞌa mombabalasi kajaꞌata etu. Etu pompekiri manusia.
6 Tapi etu daꞌa ntoto nakono! Sabana ane Alatala daꞌa nanoa daꞌa masipato Iꞌa mombatangara manusia ri dunia eꞌi.
7 Bara naria tau to nompekiri iweꞌi: “Nokuya kita nipakasala ewa tau nasilaka ane nggari pokaingguta to nadenggona kanoa nu Alatala mantambai manoto sampe Iꞌa ratoiya?”
8 Ane etu nakono agina kita manguli, “Kamaimo kita mowia kajaꞌana ala meumba to nabelona!” Naria mamimo tau nompakajaꞌa sangaku ante nanguli aku mboto notesa iwetu. Tapi etu daꞌa ntoto nakono! Tau-tau to nanguli etu masipato rasuku Alatala!
Daꞌa ria kamba sambaꞌa tau to nanoa riara mpanggita Alatala
9 Jadi iwenu? Kami to Yahudi neliu nggabelopa nggari tau-tau ntanina riara mpanggita Alatala? Natantumo daꞌa! Sabana ewa to niuliku ri baꞌana, pura-pura manusia nasilaka, nabeloka tau to Yahudi, nabeloka tau daꞌa to Yahudi.
10 Ewa to nitulisi riara Buku Nagasa iweꞌi:
“Daꞌa ria sambaꞌa to nanoana,
nau kamba sambaꞌa daꞌa ntoto ria.
11 Daꞌa ria sambaꞌa to nanoto riara mpanggita Alatala,
pade daꞌa woꞌu naria nau aga sambaꞌa to nangelo Alatala.
12 Pura-pura tau nasalanjalamo,
katuwu ira mana ria gunana.
Daꞌa ria to nompowia kabelona,
nau aga sambaꞌa daꞌa ntoto ria. (Mzm. 14:1-3, 53:2-4)
13 Tesa-tesa ira nawau mpuꞌu
nasimbayu ewa dayo ntomate to natebuka.
Tesa bagiu nesuwu nggari jila ira.
Sumba ira nompakajaꞌa nasimbayu ewa bisa nu ule. (Mzm. 5:9, 140:4)
14 Ira bate-batena netunda njilaka. (Mzm. 10:7)
15 Ira nasalisa nalau mompatesi tau.
16 Ri umba-umba nikalau ira,
ira nompakagado bo nompakasusa tau ntanina.
17 Daꞌa nadota ira natuwu mosinggabelo. (Yes. 59:7-8)
18 Pade ira daꞌa ntoto nekou ri jaꞌi Alatala.” (Mzm. 36:2)
19 Ninjanitamo pura-pura to nitulisi riara Atura-atura agama to nipapola i Musa nitulisi ka tau-tau to natundu riara Atura-atura etu. Jadi mana ria kamba sambaꞌa to namala mebali. Njumaongu dunia masipato rasuku Alatala.
20 Daꞌa ria sambaꞌa tau to mamala rareke manoa riara mpanggita Alatala ante mantuki Atura-atura agama. Tapi Atura-atura etumo to nompakanoto ka kita pura-pura manusia nasilaka.
IWENU SAMPE MANUSIA MAMALA MAJADI MANOA RIARA MPANGGITA ALATALA (3:21-5:21)
Kita majadi manoa riara mpanggita Alatala ante momparasaya i Pue Yesus
21 Tapi weꞌi-weꞌi Alatala nompopokita ka kita iwenu sampe manusia mamala majadi manoa riara mpanggitana. Etu daꞌa majadi ante mantuki Atura-atura agama. Riara Buku i Musa bo buku nabi-nabi naria tesa to nombaboto iwenu Alatala mompakanoa kita.
22 Etumo manusia majadi manoa riara mpanggita Alatala ante momparasaya Yesus Kristus. Butu mbaꞌa tau to nomparasaya kana rareke Alatala manoa. Daꞌa ria posisalana,
23 sabana pura-pura manusia nasilaka bo mana mamala mombarasai kabelo nu Alatala to nipogumaa.
24 Tapi kita najadi nanoa riara mpanggitana nggari kamate Yesus Kristus nantolo silakata. Etu niwai Alatala bayangi sabana towe belona mboto.
25 Yesus Kristus nipakatantu Alatala mamate majadi posompo silaka tau-tau to nomparasaya Iꞌa. Etu nikawia Alatala ala mompopokita kanoana. Sabana tempo nggaolu Iꞌa nosabara nanggita manusia nowia silaka sampe ira daꞌa nisukuna.
26 Patujuna ala mompopokita ka tau tempo weꞌi-weꞌi Iꞌa nanoa bo Iꞌa mantarima tau-tau to nomparasaya i Pue Yesus ewa tau nanoa riara mpanggitana.
27 Jadi ane iwetu, natantumo daꞌa namala kita mantoiya korota mboto. Nuapa sabana kita daꞌa namala mantoiya korota mboto? Sabana nanotomo kita daꞌa najadi nanoa riara mpanggita Alatala nggari powiata mboto tapi nggari pomparasayata ka Yesus Kristus.
28 Jadi katantuna iweꞌi: Manusia majadi manoa riara mpanggita Alatala ante momparasaya daꞌa ante mantuki Atura-atura agama.
29 Nanotomo Alatala daꞌa aga Alatala nto Yahudi. Tapi Iꞌa woꞌu Alatala ntau daꞌa to Yahudi.
30 Sabana Alatala aga sambaꞌa lau, pade Iꞌamo to mompakanoa tau-tau to Yahudi ane ira momparasaya i Pue Yesus, pade Iꞌa woꞌu mompakanoa tau-tau daꞌa to Yahudi ane ira momparasaya i Pue Yesus.
31 Jadi iwenu? Ante momparasaya i Pue Yesus batuana kita manjapuaka Atura-atura agama to nipapola i Musa? Natantumo daꞌa! Kakonona, ante momparasaya i Pue Yesus kita mantakono Atura-atura agama.