Tesa Abraham nompakanoto manusia majadi manoa riara mpanggita Alatala nggari pomparasayana
4
Jadi pekirimo jonjo Abraham, totuꞌata nggaolu. Nuapa to najadi riara nggatuwuna?
2 Ane rapana Abraham najadi tau nanoa sabana powiana to nabelo iꞌa namala mantoiya korona mboto. Tapi daꞌa namala iꞌa mantoiya korona iwetu ri ngayo Alatala.
3 Sabana naria tesa ri Buku Nagasa to nanguli iweꞌi: “Abraham nomparasaya Alatala, pade nggari pomparasayana etu iꞌa nireke Alatala tau nanoa.” a
4 Ane tau nokarajaa gajina daꞌa nireke pewai bayangi, tapi etu sangele to masipato ratarimana.
5 Tapi daꞌa iwetu kita ante Alatala. Kita nireke nanoa riara mpanggitana daꞌa nggari powiata to nabelo tapi nggari pomparasayata ka Alatala to nompakanoa tau-tau to nadenggona.
6 Etu nasimbayu ewa tesa Magau Daud nggaolu. Iꞌa notesa ewa kasana nu rara ntau to nireke Alatala nanoa daꞌa nggari powiana to nabelo tapi nggari pomparasayana ka Alatala.
7 Daud nanguli iweꞌi:
“Nasanamo tau to niampungi salana,
to nitampunisi silakana.
8 Nasanamo tau mana nireke Alatala nasilaka.” (Mzm. 32:1-2)
Abraham najadi nanoa riara mpanggita Alatala sabana iꞌa nomparasaya daꞌa sabana iꞌa nisuna
9 Jadi iwenu? Nariamo kasana to nitesa Magau Daud etu aga ka tau to Yahudi to nantuki ada mposuna atau ka tau-tau daꞌa to Yahudi woꞌu to daꞌa nantuki ada mposuna? Natantumo ka ira pura-pura! Sabana ewa niuli kami ri baꞌana, Abraham nireke Alatala nanoa nggari pomparasayana.
10 Ipia Abraham najadi nanoa riara mpanggita Alatala, naopu iꞌa nisuna atau daꞌapa iꞌa nisuna? Natantumo etu najadi daꞌapa iꞌa nisuna.
11 Iꞌa nisuna nggapurina, pade posunana etu najadi tandaina iꞌa nireke Alatala nanoa nggari pomparasayana tempo iꞌa daꞌapa nisuna. Jadi ante iwetu iꞌa najadi “Uma” nu pura-pura tau to nomparasaya tapi daꞌapa nisuna nantuki ada agama Yahudi. Ira woꞌu nireke Alatala nanoa ante nomparasaya nasimbayu ewa Abraham.
12 Pade iꞌa woꞌu najadi “Uma” tau-tau nisuna, etumo ira to daꞌa aga nantuki ada mposuna agama Yahudi tapi to nantuki jonjo pomparasaya Abraham tempo iꞌa daꞌapa nisuna.
Abraham nantarima nuapa to nijanji Alatala sabana iꞌa nomparasaya daꞌa sabana iꞌa nantuki Atura-atura agama
13 Tempo nggaolu Alatala nojanji ka Abraham iweꞌi: “Dunia eꞌi kana majadi bagiamu sampe ri muli-mulimu.” b Alatala nojanji iwetu daꞌa sabana Abraham nantuki Atura-atura agama, tapi sabana iꞌa nanoa riara mpanggita Alatala nggari pomparasayana.
14 Sabana ane aga tau to nanjarumaka Atura-atura agama ala majadi manoa to mantarima nuapa to nijanji Alatala ka ana-anana, batuana pomparasaya ka Alatala daꞌa ntoto ria gunana, pade pojanjina aga pojanji bayangi.
15 Kakonona nggari Atura-atura agama sampe nanotomo rau rara Alatala sabana manusia bate-batena nombaliunaka Atura-atura etu. Ane rapana daꞌa ria Atura-atura agama, daꞌa ria tau rareke nasala.
16 Jadi kita mantarima nuapa to nijanji Alatala ante momparasaya, ala manoto etu nggari towe belo nu Alatala daꞌa nggari powia manusia. Patuju nu Alatala ala nuapa to nijanjina namala ratarima pura-pura muli Abraham, daꞌa aga ira to nompasimbuku mantuki Atura-atura agama, tapi woꞌu ira to nomparasaya Alatala nasimbayu ewa Abraham. Sabana Abraham najadi umata pura-pura.
17 Ewa tesa Alatala to nitulisi riara Buku Nagasa iweꞌi: “Aku nangonggotaka iko majadi uma ntodea ri umba-umba ri dunia.” c Riara mpanggita Alatala Abraham najadi umata pura-pura. Iꞌa nomparasaya ka Alatala to nakuasa nompakatuwu tomate bo to nompakule mompajadi ante tesana anu daꞌa naria najadi naria.
18 Naupa daꞌa masipato iꞌa manjarumaka majadi uma ntodea ri umba-umba ri dunia, iꞌa batena nanjarumaka bo nomparasaya etu nantuki tesa Alatala ka iꞌa to nanguli, “Kadea nu mulimu banepia masimbayu ewa betuꞌe ri langi.” d
19 Tempo Abraham nangepe pojanji etu namosu satumpae umuruna. Tapi daꞌa nalente pomparasayana tempo iꞌa nompekiri korona to natuꞌa mpuꞌumo bo rongona i Sara to nagampa.
20 Iꞌa daꞌa nolengga-lengga nomparasaya nuapa to nijanji Alatala ka iꞌa, tapi pomparasayana nompakaroso rarana sampe iꞌa nantoiya bo nombabila Alatala.
21 Niparasayana mpuꞌu Alatala nompakule nompakadupa pojanjina.
22 Jadi etu sampe iꞌa nireke Alatala nanoa.
23 Tesa-tesa “iꞌa nireke Alatala nanoa” daꞌa aga nipawela ka Abraham,
24 tapi etu woꞌu nipawela ka kita. Sabana kita woꞌu rareke Alatala manoa ane kita momparasaya ka Alatala to nompakatuwu bali Pueta Yesus nggari kamatena.
25 Iꞌa niwai Alatala rapatesi mombasompo silakata, pade naopu etu Iꞌa nipakatuwu bali ala kita mamala majadi manoa riara mpanggita Alatala.