Kita nireke nanoa riara mpanggita Alatala sampe kita natuwu nosinggabelo ante Iꞌa
5
Jadi weꞌi-weꞌi kita nireke nanoa riara mpanggita Alatala sabana nomparasaya. Etu sampe kita natuwu nosinggabelo ante Alatala nggari nuapa to nipowia Pueta Yesus Kristus ka kita.
2 Ante nomparasaya Yesus Kristus kita niwai loga mombarasai towe belo nu Alatala ewa to nirasaita mamimo weꞌi-weꞌi. Pade nadamba mpuꞌu rarata sabana naria panjarumakata mombarata bagia riara kuasa bo kagaya nu Alatala to nipogumaa.
3 Pade daꞌa aga etu, tapi kita woꞌu nadamba-damba riara kasusa bo kapari to nirasaita sabana ninjanitamo nggari kasusa bo kapari etu kita majadi maroo.
4 Pade ane kita maroo kita mamala mantaꞌamaka tempo rapesoba sampe kita rakonoa Alatala. Pade ane ranjanita kita nikonoa Alatala, panjarumakata ri jaꞌina mantambai maroso.
5 Ane maria panjarumakata ewa etu daꞌa malente rarata. Nuapa to nisarumakata kana madupa. Nanotomo etu sabana nariamo towe Alatala riara ntaꞌita to najadi nggari Nosa Nagasa to niwaina ka kita.
6 Iweꞌimo to nompakanoto towe Alatala ka kita. Ewa nisuka tempo kita daꞌa nompakule mompakanoa korota mboto Kristus namate nanjaliku kita tau-tau to daꞌa nantuki dota Alatala.
7 Ri pokainggu manusia nakura niratata tau to nasadia mamate manjaliku roana to nanoana. Ane roana tau mpuꞌu-mpuꞌu nabelo rarana bara maria sambaꞌa rombaꞌa to mabia mamate manjaliku iꞌa, tapi etu nakura najadi.
8 Tapi Alatala nompopokita kabete nu towena ka kita iweꞌi: Tempo kita danasilaka Kristus namate nanjaliku kita.
9 Jadi ane weꞌi-weꞌi kita nireke nanoa riara mpanggita Alatala nggari katiti nu lei Kristus, natantumo kita kana rapakasalama Kristus nggari pesuku Alatala banepia.
10 Bopia tempo kita danobali ante Alatala Iꞌa nompakau Anana marata ri dunia mamate manjaliku kita ala kita rapoposinggabelo bali ante Iꞌa. Weꞌi-weꞌi nosinggabelo balimo kita ante Alatala nggari kamate Anana. Jadi ante iwetu natantumo kita kana rapakasalama nggari pesuku to marata, sabana Anana natuwu balimo nggari kamatena pade batena nosanggani-nggani ante kita.
11 Pade daꞌa aga iwetu, nadamba woꞌu rarata sabana kita nosaongu rara ante Alatala. Etu najadi nggari powia Pueta Yesus Kristus to nompoposinggabelo bali kita ante Alatala.
Asele nu powia Adam bo powia Kristus
12 Naria silaka riara dunia sabana powia sambaꞌa manusia to nombaliunaka parenta Alatala, etumo Adam. Pade nggari silaka Adam etu sampe naria kamatea ri dunia. Pade kaopuna kamatea nendai ka pura-pura manusia sabana pura-pura manusia nowia silaka.
13 Tempo daꞌapa naria Atura-atura agama to nipapola i Musa naria mamimo silaka ri dunia. Tapi silaka-silaka etu daꞌapa nireke Alatala, sabana daꞌapa ria Atura-atura agama to nompakanoto powia nuapa nireke silaka.
14 Tapi naupa iwetu nompamula nggari tempo Adam sampe ri tempo i Musa pura-pura manusia kana nawela kuasa kamatea. Naupa ira daꞌa nombaliunaka parenta Alatala ewa to nipowia Adam, ira batena nawela kuasa kamatea.
Adam naria kasimbayuna ante tau to narata nggapurina, etumo Yesus.
15 Tapi powia Adam bo powia Yesus daꞌa nasimbayu. Pewai bayangi nu Alatala ka kita daꞌa nasimbayu ante silaka Adam. Nggari silaka Adam etu pura-pura manusia nawela kuasa kamatea. Tapi neliu nggabetepa asele towe belo nu Alatala to niwaina ante kajoina ka pura-pura manusia nggari powia Yesus Kristus.
16 Sangganipa kuuli, pewai Alatala ka kita daꞌa nasimbayu ante silaka Adam. Nggari silaka sambaꞌa tau pura-pura manusia nasala riara mpanggita Alatala bo masipato rasuku. Tapi nggari pewai bayangi nu Alatala etu silaka-silakata to nadea nipakalipo pade kita najadi nanoa riara mpanggitana.
17 Nggari silaka sambaꞌa tau etu pura-pura manusia nawela kuasa kamatea. Tapi neliu nggabetepa asele nu powia to sambaꞌana, etumo Yesus Kristus. Isema-sema to nomparasaya Iꞌa kana mantarima towe belo nu Alatala to neliu-liuna sampe majadi tau nanoa riara mpanggitana. Pade ira kana matuwu bo moparenta mosanggani ante Kristus sampe ri kasae-saena.
18 Jadi nggari sangele silaka nu sambaꞌa, pura-pura manusia nasilaka sampe masipato rasuku. Pade nggari sangele powia nanoa to sambaꞌana, pura-pura manusia mamala majadi manoa riara mpanggita Alatala sampe masipato matuwu mabelo sampe ri kasae-saena.
19 Nggari pombaliunaka sambaꞌa pura-pura manusia najadi nasilaka. Pade nggari katundu to sambaꞌana pura-pura manusia mamala majadi manoa riara mpanggita Alatala.
20 Atura-atura agama Yahudi niwai Alatala ala mantambai kadea nu silaka to nipowia manusia. Tapi naupa silaka manusia nantambai kadeana, nantambaipa kadea nu towe belo Alatala.
21 Bopia silaka nombakuasai pura-pura manusia sampe ira nawela kuasa kamatea. Tapi patuju nu Alatala ala towe belonamo to mombakuasai pura-pura manusia. Etu najadi tempo Iꞌa nantarima kita ewa tau nanoa to masipato matuwu mabelo sampe ri kasae-saena sabana kita nosaongu rara ante Pueta Yesus Kristus.