SURA PAULUS KARONGGANINA KA TOPOMPARASAYA RI NGATA
KORINTUS
Petabe
1
Sura eꞌi nggari jaꞌiku i Paulus to nionggotaka najadi suro Yesus Kristus nantuki dota Alatala, bo nggari jaꞌi sampesuwuta i Timotius, ka todea topomparasaya Alatala ri ngata Korintus pade ka pura-pura topomparasaya ri njumaongu Propinsi Akhaya.
2 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.
Alatala nompakaroso rarata riara kasusa bo kapari
3 Kana ratoiyata Alatala, Uma nu Pueta Yesus Kristus. Iꞌa Umata to naasi matana manggita kita bo Iꞌamo Alatala to nompakaroso rarata riara mpengele-ngele.
4 Iꞌa nompakaroso rara kami riara mpengele-ngele kasusa bo kapari, ala ante karoso rara to nitarima kami nggari jaꞌina kami woꞌu mamala mompakaroso rara tau-tau ntanina to nombarasai kasusa bo kapari.
5 Sabana nasimbayu ewa kami mpuꞌu-mpuꞌu nombarasai kasusa bo kapari ewa to nirasai Kristus, iwetu woꞌu rara kami mpuꞌu-mpuꞌu nipakaroso Kristus.
6 Ane kami mombarasai kasusa bo kapari, etu majadi ala kami mamala mompakaroso rara komi, pade ala komi mamala rapakasalama. Ane rara kami rapakaroso riara kasusa bo kapari, etu majadi ala komi woꞌu mamala rapakaroso rara sampe komi maroo mantaꞌamaka kasusa bo kapari nasimbayu ewa kami.
7 Etu sampe kami mpuꞌu-mpuꞌu nanjarumaka komi. Sabana ninjani kami ane komi mombarasai kasusa bo kapari ewa to nirasai kami, rara komi woꞌu kana rapakaroso nasimbayu ewa kami.
8 Sampesuwu-sampesuwu, to nipodota kami ala komi mangginjani iwenu kasusa bo kapari to nirasai kami ri Propinsi Asia. Pepandasa to nawela kami natomo mpuꞌu, neliu nggari pompakule kami sampe naopumo rara kami matuwu.
9 Nirasai kami ewa kami nisuku mamate. Tapi etu najadi ala kami neꞌe manjarumaka karoso kami mboto tapi manjarumaka Alatala to nakuasa mompakatuwu bali tau namate.
10 Iꞌamo to nompakasalama kami nggari pepandasa to nompakawiora rara etu sampe kami daꞌa namate. Pade Iꞌa bate-batena mompakasalama kami. Iꞌamo to nisarumaka kami mompakasalama kami nggari kasusa bo kapari banepia.
11 Etu kana majadi ante petulungi posambaya komi. Sabana ane madea tau momposambaya kami Alatala kana mantulungi kami. Ante iwetu madea tau kana manguli tarima kasi ka Alatala manggita asele nu posambaya ira etu.
PAULUS ANTE TOPOMPARASAYA RI NGATA KORINTUS (1:12-7:16)
Iwenu sampe nia Paulus malau mantalioda to Korintus nabalimo
12 Naria sangele to nompakadamba rara kami iweꞌi: Pokainggu kami riara dunia eꞌi bate-batena nanoa bo nagasa riara mpanggita Alatala, neliu-liupa tempo kami nosanggani-nggani ante komi. Pokainggu kami daꞌa nantuki noto manusia tapi nantuki towe belo nu Alatala.
13-14 Sabana to nitulisi riara sura kami mamala rabasa komi bo ranjani komi ante nanoto, daꞌa ria patuju ntanina natetabuniaka riarana. Weꞌi-weꞌi komi daꞌapa nangginjani patuju kami ante nabelo. Tapi nisarumakaku kana marata tempona komi mpuꞌu-mpuꞌu mangginjani patuju kami, ala tempo karata i Pue Yesus banepia komi mamala madamba-damba mompekiri kami nasimbayu ewa kami kana madamba-damba mompekiri komi.
15-16 Niparasayaku komi mpuꞌu-mpuꞌu kana madamba mompekiri aku iwetu. Etu sampe nipakatantuku ane malau mpaka ri Propinsi Makedonia aku kana mesai ri jaꞌi komi ronggani ala komi mamala mantarima rasi nggari jaꞌiku ronggani kadeana. Patujuku mesai mantalioda komi ntani ruru pade mapola mpaka ri Propinsi Makedonia. Pade tempo manjili nggari Makedonia patujuku mesai mantalioda komi karongganina ala komi mamala mantulungi aku mompapola polumakoku mpaka ri Bagia Yudea.
17 Tapi niaku etu nabalimo. Bara naria to nompekiri aku norongu rara tempo aku nompakatantu polumakoku etu. Atau ira nompekiri aku aga nompakatantu niaku nantuki dotaku mboto, sanggani nanguli, “Iyo,” sanggani nanguli, “Daꞌa.”
18 Tapi sampesuwu-sampesuwu, nasimbayu ewa Alatala namala raparasaya, janji kami woꞌu namala raparasaya. Tesa kami ka komi natantu, daꞌa sanggani nanguli, “Iyo,” pade sanggani nanguli, “Daꞌa.”
19 Sabana Yesus Kristus, Ana nu Alatala, to nipatolele i Silas, i Timotius bo aku mboto ka komi, daꞌa tau norongu rara. Iꞌa daꞌa sanggani nanguli, “Iyo”, pade sanggani nanguli, “Daꞌa.” Tesana bate-batena namala raparasaya.
20 Pura-pura pojanji Alatala ka kita kana rapakadupa sabana kita nosaongu rara ante Kristus. Etu sampe kita namala manguli, “Nakono mpuꞌu pojanji-pojanji Alatala.” Pade ante iwetu Alatala nibila bo nitoiya.
21 Alatala mbotomo to mompakaroso kita pura-pura, nabeloka kami, nabeloka komi woꞌu, sabana kita mosaongu rara ante Kristus. Alatalamo to nompelisi kita majadi bagiana
22 pade niwaina ka kita Nosana to Nagasa ewa tandaina kita bagiana. Nosana to Nagasa etu najadi panjokota to nompakanoto nuapa to nijanjina ka todeana natantumo kana ratarimata.
23 Sampesuwu-sampesuwu, aku daꞌa nodawa. Alatala mboto sabiku. Iꞌa nangginjani isi rara ntaꞌiku. Ninjanina aku daꞌa nomai mantalioda komi ri ngata Korintus sabana aku daꞌa nadota mompakasusa rara komi.
24 Daꞌa patujuku momparenta ka komi nuapa to masipato raparasaya komi, sabana naroo mamimo pomparasaya komi. Tapi kami aga madota mokarajaa mpasanggani-nggani ante komi ala komi rapakadamba rara.