2
Sabana etu nipakatantukumo riara ntaꞌiku iweꞌi: Agina aku mana malau mantalioda komi ane etu aga mompakasusa rara komi ewa to najadi bopia.
2 Sabana ane aku mompakasusa rara komi, isemapa to mamala mompakawoe raraku? Natantu daꞌa ria ntanina, aga komi to nipakasusaku!
3 Pade etumo patujuku nantulisi sura etu ka komi bopia, ala ane aku momai ri jaꞌi komi neꞌe aku rapakasusa komi to masipato mompakadamba raraku. Niparasayaku ane aku madamba komi woꞌu madamba-damba.
4 Tempo aku nantulisi sura etu ka komi aku mpuꞌu-mpuꞌu nasusa bo nagero raraku, pade aku nadea nggani nageo nakanjodu-njodu. Patujuku nantulisi sura etu daꞌa ala mompakasusa rara komi, tapi ala komi mamala mangginjani kabete nu toweku ri jaꞌi komi pura-pura.
Tau nisuku topomparasaya sabana nowia sala kana raampungi ira
5 Tau to nompakasusa rara etu daꞌa nompakasusa raraku, tapi iꞌa nompakasusa rara komi pura-pura. Atau ala neꞌe makoꞌo gaga tesaku agina aku manguli, iꞌa nompakasusa rara sabagia nggari komi.
6 Tapi weꞌi-weꞌi kuuli ka komi, naganamo pesuku to nipawela todea topomparasaya ka tau etu.
7 Weꞌi-weꞌi komi kana mombaampungi iꞌa bo mompakawoe rarana ala neꞌe iꞌa masusa gaga sampe maopu rarana.
8 Jadi kuperapi ka komi, popokita woꞌumo ka iꞌa towe komi.
9 Patujuku nantulisi sura etu ka komi bopia ala mombauji komi. Aku nadota manggita ane komi bate-batena masadia mantuki pura-pura parenta nggari jaꞌiku.
10 Jadi naganamo weꞌi-weꞌi. Ane tau etu naopu niampungi komi pura-pura, iꞌa woꞌu niampungikumo. Pade nuapa to niampungiku--ane mpuꞌu-mpuꞌu naria sala to masipato kuampungi--etu niampungiku riara mpanggita Kristus ala komi pura-pura mamala mosinggabelo bali.
11 Tau etu niampungikumo ala neꞌe sampe kita raakala Magau nu Seta, sabana ninjanita mamimo akalana mombabagiu kita.
Nakini rara Paulus ri ngata Troas
12 Tempo aku narata ri ngata Troas ala mompatolele Kareba Belo Kristus, Pue nombabuka jala ka aku mokarajaa ri setu.
13 Tapi nakini mpuꞌumo raraku sabana aku daꞌa nosirata ka sampesuwuta i Titus ri setu. Sabana etu nopasabimo aku ri jaꞌi tau-tau to Troas, pade napolamo aku mpaka ri Propinsi Makedonia.
Nadamba rara Paulus nantora bagona ewa topanggeni Kareba Belo
14 Tapi nosukuru mpuꞌu ka Alatala! Nggari Iꞌamo kami najadi padagi sabana nosaongu rara ante Kristus. Iꞌa nantulungi kami nompatolele Kareba Belo sampe pura-pura tau mamala mosinjani ante Iꞌa. Kareba etu natolele mpaka ri umba-umba nasimbayu ewa soa nawongi mpuꞌu natienga ri umba-umba.
15 Sabana riara mpanggita Alatala kami nireke nasimbayu ewa soa dupa to nienga ntau pura-pura, nabeloka ira to rapakasalama, nabeloka ira to rasuku sampe ri kasae-saena.
16 Nantuki ira to rasuku sampe ri kasae-saena kami eꞌi nireke ewa soa ntomate, tandaina ira kana rasuku. Tapi nantuki ira to rapakasalama kami nireke ewa soa nawongi mpuꞌu, tandaina ira kana matuwu mabelo. Isema to nompakule mantui bago ewa etu? Natantu nantuki pompakuleta mboto daꞌa ria sambaꞌa!
17 Tapi kami eꞌi daꞌa nasimbayu ewa nadea tau ntanina to nompatolele Tesa nu Alatala ala mangelo untu ka koro ira mboto. Patuju kami nagasa sabana kami tau to nisuro Alatala mompatolele Tesana ante kuasa nggari jaꞌi Kristus. Pade Alatala mboto nanggita powia kami etu.