Topanggeni pojanji Alatala to nabou
3
Bara maria to mompekiri kami nompamula woꞌu mombatoiya koro kami mboto. Atau bara rapekiri ira kami woꞌu nomparaluu sura ka komi bara nggari jaꞌi komi to nombatoiya kami ewa to nikeni tau-tau ntanina etu. Tapi etu daꞌa ntoto niparaluu kami!
2 Sabana komi mbotomo najadi ewa sura to nombatoiya kami to nitulisi riara ntaꞌi kami to namala rabasa bo ranjani pura-pura tau.
3 Nggari pokainggu komi nanotomo ka ira asele mpobago kami nanggeni tesa Kristus ka komi. Namala rauli komi nasimbayu ewa sura to nombatoiya kami to nitulisi Kristus mboto. Sura etu daꞌa nitulisi ante pena bo tinta, pade daꞌa woꞌu nitulisi ri watu mpotulisi. a Tapi sura etu nitulisi Nosa Nagasa nu Alatala to natuwuna riara ntaꞌi manusia.
4 Kami nabia nanguli iwetu riara mpanggita Alatala sabana naria kuasa Kristus riara nggatuwu kami.
5 Daꞌa namala kami manguli pompakule mantui bago etu nggari jaꞌi kami mboto. Tapi pompakule kami nggari jaꞌi Alatala.
6 Iꞌamo to nombawai ka kami pompakule mompatuduki ka tau pojanjina to nabou. Pojanji nabou etu daꞌa nopuꞌu nggari atura-atura to nitulisi, tapi nopuꞌu nggari jaꞌi Nosa Nagasa nu Alatala. Sabana atura-atura to nitulisi aga nompakanoto tau nasilaka kana mamate, tapi Nosa Nagasa nu Alatala mombawai katuwua mabelo.
Pojanji Alatala to nabou neliu nggabelo nggari pojanjina nggasae
7 Tempo pojanji nggasae to nompakanoto tau nasilaka kana mamate nipowia bo nitulisi ri watu mpotulisi, b reme nggari jaꞌi Alatala nombawanta i Musa sampe nareme mpuꞌumo lenjena. c Tau-tau to Israel daꞌa nompakule nompenaa lenje i Musa naupa reme etu nompamula nalipo tempo etu. Jadi ane iwetumo reme bo kagaya nu Alatala to nipopokita tempo pojanji nggasae nipowia,
8 natantumo neliu nggabelo pojanji nabou to nipowia Nosa Nagasa nu Alatala.
9 Ane pojanji nggasae to nompakatantu manusia nasilaka kana rasuku niwai ante tandai-tandai bo reme to nipogumaa, natantumo neliu nggabelo pojanji nabou to nompakatantu iwenu manusia mamala majadi manoa riara mpanggita Alatala.
10 Kakonona namala rauli pojanji nggasae to niwai ante tandai reme bo kagaya to nipogumaa etu mana ria kuasana ane rapoposisala ante pojanji to nabou to neliu nggabelo.
11 Ane pojanji nggasae to daꞌa nasae nalaku etu nireke nakuasa bo nabelo, natantumo neliu nggakuasa bo neliu nggabelo pojanji nabou to nalaku sampe ri kasae-saena.
12 Kami nanjarumaka pojanji Alatala to nabou etu. Jadi etu sampe kami nabia mpuꞌu motesa ka komi ante nanoto.
13 Kami daꞌa nasimbayu ewa i Musa nggaolu to nombasalibumbu lenjena ala tau-tau to Israel daꞌa manggita reme i Pue malipo nggari lenjena.
14 Kakonona pekiri iramo to natitutu, sabana sampe weꞌi-weꞌi tempo ira nombabasa pojanji nggasae etu riara buku-buku i Musa, pompekiri ira ewa nisalibumbu. Sabana pekiri manusia to natitutu iwetu aga namala rabuka ane tau nosaongu rara ante Kristus.
15 Sampe weꞌi-weꞌi butu nggani ira nombabasa buku-buku i Musa, ewa pekiri ira danisalibumbu.
16 Tapi ane sambaꞌa tau majea pade mantuki i Pue, posalibumbu etu kana rabuka.
17 To nipatuju ante Pue ri seꞌi etumo Nosa Nagasa nu Alatala. Pade ane Nosa Nagasa nu Alatala naria ri jaꞌita, kita mpuꞌu-mpuꞌu nakabasaka nggari pura-pura nuapa to nompopogaꞌa kita nggari jaꞌi Pue.
18 Weꞌi-weꞌi lenjeta daꞌa nisalibumbu ewa lenje i Musa nggaolu. Kita mompopokita kuasa bo kareme i Pue riara nggatuwuta. Mantambai eona kita mantambai mabali majadi nasimbayu ewa Pue mboto. Pade kabalina etu majadi nggari kuasa Nosa Nagasa i Pue.