Pokainggu Paulus tempo nompatolele Tesa nu Alatala
4
Bago to nitui kami eꞌi niparasaya Alatala ka kami nggari asi matana mboto. Jadi etu sampe kami daꞌa naopu rara mantui bago eꞌi.
2 Kami nanggabasaka pura-pura pokainggu narumau to nompakaeya. Kami daꞌa nombabagiu tau bo kami daꞌa nompakadenggo Tesa nu Alatala ante mombagalo pepatuduki ntanina to nasalana. Tapi kami nompatolele Tesa nu Alatala to nakonona ante nanoto. Ante iwetu kami mompopokita ka pura-pura tau kami mpuꞌu-mpuꞌu tau to nanoa riara mpanggita Alatala.
3 Ane Kareba Belo to nipatolele kami nireke nagawu, etu nagawu ka tau-tau to rasuku sampe ri kasae-saena banepia sabana daꞌa nomparasaya.
4 Magau nu Seta to nombabagiu manusia ri dunia eꞌi nompakaburo pekiri tau-tau daꞌa nomparasaya ala ira neꞌe manggita reme nu Kareba Belo. Kareba Belo etu nompakanoto kuasa bo kagaya nu Kristus to nasimbayu ntoto ante Alatala.
5 Kareba to nipatolele kami etu daꞌa kareba to nantesa koro kami mboto. Tapi kareba etu nompakanoto ka komi Yesus Kristusmo Pue pade kami eꞌi najadi batua komi nantuki dota i Pue Yesus.
6 Tempo Alatala nompajadi langi bo dunia Iꞌa nanguli, “Nggari karumauna kana meumba reme.” a Pade Iꞌa woꞌu nompakareme rara ntaꞌita ala pekirita majadi manoto. Ante iwetu kita mamala mangginjani kuasa bo kagaya nu Alatala to natikita ri lenje Kristus.
Kuasa bo kagaya nu Alatala nipopokita riara koro manusia biasa
7 Tapi kuasa bo kagaya etu niboli Alatala riara koro kami manusia biasa to nasimbayu ewa kura tana. Ante iwetu nanotomo kuasa to neliu-liuna etu nggari jaꞌi Alatala daꞌa nggari jaꞌi kami mboto.
8 Kami bate-batena nitiku ntau ri umba-umba tapi kami daꞌa nidagi. Kami naoso naingu tapi kami daꞌa naopu rara.
9 Kami bate-batena nipandasa ntau tapi kami daꞌa sanggani nipalasi Alatala. Kami naoso niboba sampe nadungga tapi kami daꞌa namate.
10 Koro kami bate-batena nombarasai kasusa bo kapari ewa to nirasai i Pue Yesus tempo Iꞌa nipatesi. Etu najadi ala kuasa nggari katuwu Yesus manoto rakita riara nggatuwu kami.
11 Sabana kami to natuwu bate-batena nantingayo kamatea sabana nomparasaya i Pue Yesus, ala kuasa nggari katuwu Yesus manoto rakita riara nggatuwu kami to mamala mamate.
12 Jadi ante iwetu kami bate-batena mantingayo kamatea tapi etu manggeni komi mombarata katuwua mabelo sampe ri kasae-saena.
13 Riara Buku Nagasa naria nitulisi iweꞌi: “Aku nomparasaya, pade etu sampe aku notesa.” b Nasimbayu ewa etu kami woꞌu nomparasaya sampe kami notesa.
14 Niparasaya kami Alatala to nompakatuwu bali i Pue Yesus nggari kamatena kana mompakatuwu bali kami woꞌu nasimbayu ewa Iꞌa. Pade niparasaya kami Iꞌa kana manggeni kami nosanggani-nggani ante komi mpaka ri jaꞌina mboto.
15 Pura-pura to nirasai kami etu najadi ala manggeni belo ka komi ala mantambai kadea ntau to mombarasai towe belo nu Alatala. Ante iwetu mantambai kadea ntau to mosukuru ka Alatala, sampe Iꞌa mpuꞌu-mpuꞌu ratoiya bo rabila.
16 Jadi etu sampe kami daꞌa naopu rara. Naupa koro kami mantambai eona mantambai malente, rara ntaꞌi kami mantambai eona mantambai maroso.
17 Kasusa to nangaꞌa to nirasai kami sampalai kana manggeni kami mantarima rasi bo belo sampe ri kasae-saena to neliu nggabete nggari kasusa etu.
18 Jadi kami daꞌa nompekiri kasusa bo kapari to namala nikita ri dunia eꞌi, tapi kami nompekiri kabelona to daꞌapa namala nikita to nipakasadia ka kami. Sabana to namala nikita ri dunia eꞌi aga sampalai, tapi kabelona to daꞌapa namala nikita etu maroo sampe ri kasae-saena.