Naroso rara Paulus riara kasusa sabana iꞌa kana mombarata koro to nabou ri suruga
5
Sampesuwu-sampesuwu, ninjanita ane mageromo “tenda” to nipetoꞌota ri dunia eꞌi, etumo koro batata, Alatala kana mombawai ka kita saongu “sapo” ri suruga, etumo koro nabou to daꞌa nipowia manusia to maroo sampe ri kasae-saena.
2 Tapi tempo kita danatuwu ri dunia eꞌi kita nekakai ante nalentora rara ala mombarata koro nabou nggari suruga etu.
3 Sabana ante iwetu kita batena maria koro.
4 Tempo kita danatuwu ri dunia eꞌi nasusa rarata sabana natomo katuwuta. Daꞌa patujuta mamate bo mombawonju korota eꞌi, tapi kita madota rawai ka koro nabou nggari suruga etu ala korota to mamala mamate rasambei ante koro to matuwu sampe ri kasae-saena.
5 Alatala mbotomo to nompakasadia kita ala mantarima etu pura-pura, pade niwaina ka kita Nosana to Nagasa ewa panjokota to nompakatantu nuapa to nijanjina etu kana majadi.
6 Jadi etu sampe kami bate-batena naroso rara. Ninjani kami ane kami danatuwu ri dunia eꞌi kami daꞌapa nosanggani-nggani ante Pue ri suruga.
7 Pade kami natuwu ri dunia eꞌi ante nomparasaya Kristus, daꞌa sabana nanggita Iꞌa.
8 Jadi ewa niuliku ri baꞌana narosomo rara kami. Kakonona to nipokono kami ala mompalasi koro kami eꞌi pade malau metoꞌo mpasanggani-nggani ante i Pue.
9 Jadi etu sampe kami tunggai mompasimbuku mompakadamba rarana, nabeloka ane kami danatuwu ri dunia eꞌi, nabeloka ane kami mompalasi dunia eꞌi.
10 Sabana kita pura-pura kana mantingayo Kristus banepia ala ratangarana. Pade maopu ratangarana sambaꞌa bo sambaꞌa, kita kana mombarata tambo to masipato ante powiata tempo kita natuwu ri dunia eꞌi, bara powia nabelo atau powia najaꞌa.
Kita wakele Kristus mompoposinggabelo manusia ante Alatala
11 Ninjani kami nuapa batuana maeka ri jaꞌi Pue. Jadi etumo sabana kami tunggai mompasimbuku manggeni tau momparasaya i Pue Yesus. Nanotomo ka Alatala pokainggu kami nanoa. Pade nisarumakaku etu nanoto woꞌu ka komi pura-pura.
12 Ante tesa eꞌi kami daꞌa mompasimbuku mombatoiya woꞌumo koro kami mboto ka komi. Tapi kami aga mompakanoto ka komi sangele pokainggu kami to nabelo, ala komi mamala mombatoiya kami ri ngayo tau-tau to nangewa kami ri setu. Sabana ira aga nombatoiya tau nantuki to namala nikita, daꞌa nantuki inggu rara ntaꞌina.
13 Ane kami noinggu nagila ewa to niuli ntau, toramo, kami noinggu iwetu ala Alatala rabila bo ratoiya. Pade ane kami noinggu nanoto, etu ala manggeni belo ka komi.
14 Kami noinggu iwetu sabana towe Kristus nombakuasai kami. Niparasaya kami iweꞌi: Ane sambaꞌa tau namate nanjaliku kita, etu batuana kita pura-pura ewa namate.
15 Pade Kristus mpuꞌu-mpuꞌu namate nanjaliku kita pura-pura. Patuju nu kamatena etu ala kita to danatuwu ri dunia eꞌi mana matuwu mantuki dotata mboto tapi ala kita matuwu mantuki dota Kristus to namate nanjaliku kita pade to nipakatuwu bali.
16 Jadi etumo sabana nompamula weꞌi-weꞌi kami mana mompekiri tau nantuki panggita manusia. Naupa bopia kami nompekiri Kristus nantuki panggita manusia, weꞌi-weꞌi kami mana mompekiri iwetu.
17 Jadi tau to nosaongu rara ante Kristus najadi manusia nabou. Katuwuna nokolu naliumo pade pura-pura katuwuna najadi nabou.
18 Etu pura-pura nggari jaꞌi Alatala. Iꞌa nompakau Kristus marata ri dunia ala mompoposinggabelo bali kita ante Iꞌa. Pade niparasayana ka kami bago mompatolele ka tau-tau ntanina ira woꞌu mamala mosinggabelo bali ante Iꞌa.
19 To nipatuju kami iweꞌi: Nggari kamate Kristus Alatala nompoposinggabelo bali manusia ante Iꞌa. Mana nirekena silaka-silaka ira. Pade niparasayana ka kami bago mompatolele Tesana to nompakanoto iwenu manusia mamala mosinggabelo bali ante Iꞌa.
20 Jadi kami eꞌi tau-tau to nisuro Kristus. Ewa kami niposumba Alatala merapi ala komi mosinggabelo bali ante Iꞌa. Jadi riara sanga Kristus kami merapi ka komi, waimo koro komi rapoposinggabelo bali ante Alatala.
21 Kristus daꞌa ntoto nasilaka. Tapi Iꞌa nipajadi Alatala posompo silaka manjaliku kita ala kita mamala majadi manoa riara mpanggita Alatala ante mosaongu rara ante Kristus.