6
Jadi sampesuwu-sampesuwu, ewa roa sampokarajaa ante Alatala, kami merapi ka komi ante mpuꞌu-mpuꞌu rara, neꞌe sampe towe belo nu Alatala to nitarima komi daꞌa ria aselena riara nggatuwu komi.
2 Sabana naria Tesa nu Alatala iweꞌi:
“Ri tempo to nipakatantuku Aku nangepe komi.
Pade Aku nantulungi komi ri eo to nipakatantuku mompakasalama manusia.” (Yes. 49:8)
Toramo mpakabelo-belo! Weꞌi-weꞌimo tempona to nipakatantu Alatala etu! Weꞌi-weꞌimo eo to nipakatantuna mompakasalama manusia!
Batua nu Alatala kana mombajagai pokaingguna
3 Kami daꞌa madota ala bago kami ewa topompatolele Kareba Belo rapakasala ntau. Jadi etumo sabana kami nompasimbuku matuwu ante pokainggu to daꞌa nompakajuꞌa rara ntau.
4 Nau nuapa-nuapa majadi kami bate-batena noinggu nabelo ala manoto kami mpuꞌu-mpuꞌu batua nu Alatala. Naupa kami nipandasa, nipakasusa, pade niwala ntiku kasusana kami batena nantaꞌamaka.
5 Kami niboba bo nisuaraka riara tarunggu. Kami nipandasa todea to nagado, kami nokarajaa ntomo, kami nabiasa daꞌa noturu bo kami nabiasa nakura panggoni.
6 Ante pokainggu to nagasa, nanoto, nosabara bo nabelo kami nompopokita ka tau kami mpuꞌu-mpuꞌu batua nu Alatala. Naria pompakule nggari jaꞌi Nosa Nagasa nu Alatala riara nggatuwu kami, pade kami nompotowe tau-tau ntanina ante mpuꞌu-mpuꞌu rara.
7 Nanotomo kami batua nu Alatala sabana kami nompatolele pepatuduki to nakonona, pade kuasa Alatala mboto nosanggani-nggani ante kami. Kami bate-batena noinggu nanoa. Pade pokainggu to nanoa etumo najadi ewa parewa mposibali kami ala meewa bo mebali.
8 Kami nibila ntau, tapi nisalai tau ntanina. Kami nitoiya ntau, tapi niuli sinjaꞌi tau ntanina. Kami nireke topebagiu, tapi kakonona kami aga notesa to nakonona.
9 Kami nireke tau daꞌa ria gunana, tapi kami ninjani ntau pura-puramo. Kami nadea nggani ntora namate, tapi kitamo, kami bate-batena natuwu. Kami naoso nipandasa ntau, tapi kami daꞌa namate.
10 Kami naoso nipakasusa rara, tapi kami daꞌa nenonto nosukuru. Kami nakasiasi, tapi kami bate-batena nompakasugi nadea tau ntanina. Ane rakita ewa daꞌa ria nuapa-nuapa ri jaꞌi kami, tapi kakonona mpengele-ngele naria ri jaꞌi kami.
11 Sampesuwu-sampesuwu ri Korintus, kami notesa nombasuwuraka isi rara ntaꞌi kami pura-pura ka komi. Natebukamo rara kami ri jaꞌi komi.
12 Kami daꞌa nantabuniaka towe kami ka komi, tapi komi nantabuniaka towe komi ka kami.
13 Kutesa ka komi ewa ka ana-anaku mboto, bukamo rara komi ri jaꞌiku nasimbayu ewa aku nombabuka raraku ri jaꞌi komi!
Neꞌe mosiala patuju ante tau daꞌa nomparasaya i Pue Yesus
14 Neꞌe komi mosiala patuju ante tau-tau daꞌa nomparasaya i Pue Yesus. Iwenumo? Masipato tau to nanoana mosiala patuju ante tau to nadenggona? Masipato reme mosigalo ante karumauna?
15 Masipato Kristus mosimporoa ante Magau nu Seta? Masipato topomparasaya masintuwu ante tau daꞌa nomparasaya?
16 Masipato kita mepue ka pue-pue ntanina riara Sapo Mpepue? Natantumo pura-pura etu daꞌa ntoto masipato! Toramo! Kitamo to najadi ewa Sapo Mpepue nu Alatala to natuwuna. Ewa to niuli Alatala mboto iweꞌi:
“Aku kana metoꞌo ri tatongo ira.
Aku kana maroo mosanggani-nggani ante ira.
Aku kana majadi Alatala ira
pade ira majadi todeaku.” (Im. 26:12, Yeh. 37:27)
17 “Sabana etu pesuwumo komi nggari tatongo ira
pade pogaꞌamo komi nggari jaꞌi ira.
Neꞌe manggabe anu to natantoru riara mpanggitaku,
pade Aku kana mantarima komi ri jaꞌiku.” (Yes. 52:11)
18 “Aku kana majadi Umamu
pade komi kana majadi ana-anaku.
Iwetumo panguli i Pue to Neliu Nggakuasa.” (2Sam. 7:14)