7
Sampesuwu-sampesuwu to nipotoweku, pojanji-pojanji etu nipawela ka kita. Jadi kamaimo kita mompakagasa korota nggari pura-pura nuapa to nompakatantoru koro bo pekiri rara ntaꞌita. Pade kamaimo kita mantambai eona mantambai magasa pokaingguta ante matuwu maeka ri jaꞌi Alatala.
Nadamba rara Paulus sabana to Korintus madota mosinggabelo bali ante iꞌa
2 Sampesuwu-sampesuwu, bukamo rara komi ri jaꞌi kami! Daꞌa ria sanggani kami nompowia sala ri jaꞌi komi nau aga sambaꞌa. Daꞌa ria sanggani kami nompakasalanjala komi. Daꞌa ria sanggani kami nombabagiu komi ala mompakauntu koro kami mboto.
3 Aku daꞌa nanguli iwetu ala mompakasala komi, sabana ewa to niuliku ri baꞌana kami mpuꞌu-mpuꞌu nompotowe komi! Matuwu atau mamate kami tunggai mompotowe komi!
4 Daꞌa nakaja rara kami notesa ka komi ante nanoto iwetu. Nasana mpuꞌumo raraku nantora komi. Naupa aku nombarasai kasusa bo kapari, daꞌa ria kaopu-opuna kadamba nu raraku.
5 Tempo kami narata ri Propinsi Makedonia kasusa kami daꞌa ria kaopu-opuna, tapi kami nipandasa nggari umba-umba. Nggari tau-tau ntanina naria to nombabali kami, pade riara ntaꞌi kami mboto naria eka rara.
6 Tapi Alatala nompakaroso rara tau-tau to naopu rarana, pade Iꞌa nompakaroso rara kami woꞌu ante karata i Titus.
7 Daꞌa aga karata i Titus to nompakaroso rara kami, tapi pantesana woꞌu to nantesa iwenu iꞌa nipakaroso rara tempo iꞌa naria ri tatongo komi. Pade nitesana woꞌu ka kami ewa kalentora rara komi manggita aku pade ewa kasusa rara komi nantora pokainggu komi bopia. Pade niulina komi mpuꞌu-mpuꞌu madota manjaliku aku ri ngayo tau-tau to nangewa aku. Jadi nangepe tesa i Titus etu nantambaimo kadamba nu raraku.
8 Naupa isi suraku bopia nompakasusa rara komi daꞌa nanjoso raraku nantulisi sura etu. Kakonona nanjosomo raraku bopia sabana nikitaku suraku etu nompakasusa rara komi. Tapi kasusa rara komi etu aga sampalai.
9 Weꞌi-weꞌi nadambamo raraku, daꞌa sabana komi nipakasusa rara, tapi sabana kasusa rara komi etu nanggeni komi najea nggari pokainggu komi to nasala. Kasusa nu rara komi etu nipake Alatala manggeni komi majea. Jadi komi daꞌa nipakarugi ante sura kami etu.
10 Sabana kasusa rara nggari jaꞌi Alatala ewa etu nanggeni tau majea nggari silaka sampe ira mamala rapakasalama. Pade daꞌa ria sambaꞌa tau manjoso rarana ane etu majadi. Tapi kasusa rara to nirasai ntau to daꞌa nomparasaya Alatala aga manggeni ira mamate pade rapopogaꞌa nggari jaꞌi Alatala.
11 Kitamo nuapa to najadi ante kasusa rara nggari jaꞌi Alatala to nirasai komi etu. Komi mpuꞌu-mpuꞌu madota mowia to nanoana. Komi mpuꞌu-mpuꞌu nompasimbuku mompakanoto pokainggu komi nakono. Naraumo komi mompekiri silaka to nipowia roa komi etu. Naekamo rara komi. Nalentoramo rara komi manggita aku. Naraji mpuꞌumo komi nompowia to niparentaku etu. Nasadiamo komi nombasuku tau to nasala etu. Riara mpengele-ngele komi nompopokita komi daꞌa nasala riara parakara etu bopia.
12 Jadi naupa aku nantulisi sura to nompakasusa rara komi etu, daꞌa patujuku ala mompakasala tau to nowia sala atau manjaliku tau to nipakajaꞌa tau nasala etu. Patujuku nantulisi sura etu ala riara mpanggita Alatala manoto ka komi iwenu kakonona kabete nu towe komi ri jaꞌi kami.
13 Jadi nangepe asele sura kami etu rara kami nipakaroso.
Pade kami daꞌa aga nipakaroso rara tapi kami woꞌu nipakadamba mpuꞌumo nanggita kadamba nu rara i Titus. Sabana tempo iꞌa nantalioda komi ri ngata Korintus iꞌa mpuꞌu-mpuꞌu nipakasana rara.
14 Daꞌapa iꞌa nalau nantalioda komi aku nombatoiya komi ka iꞌa. Pade pokainggu komi to nikitana daꞌa nompakaeya aku. Nasimbayu ewa pura-pura tesa kami ka komi batena nakono, iwetu woꞌu tesa kami nombatoiya komi ka i Titus etu woꞌu nakono.
15 Pade towe i Titus ri jaꞌi komi nantambai kabetena tempo iꞌa nantora iwenu komi pura-pura natundu ri jaꞌina, pade iwenu komi nantarima iꞌa ante nombabila iꞌa bo nekou ri jaꞌina.
16 Nadamba mpuꞌu raraku sabana komi namala niparasaya riara mpengele-ngele.