TEWAI PAULUS EWA DOI PETULUNGI KA TOPOMPARASAYA NAKASIASI RI BAGIA YUDEA (Pasal 8-9)
Jonjo tau-tau to Makedonia nompasiromu doi petulungi
8
Sampesuwu-sampesuwu, kami madota mompakanoto ka komi nuapa to najadi nggari towe belo nu Alatala ri tatongo todea topomparasaya ri Propinsi Makedonia.
2 Ira mpuꞌu-mpuꞌu nipandasa ante pesoba-pesoba to natomo mpuꞌu. Tapi ri tatongo pesoba etu kadamba nu rara ira nantambai kadeana sampe ira nombawai ante najoi mpuꞌu rara ka tau-tau ntanina, naupa ira mboto nakasiasi mpuꞌu.
3 Ira daꞌa aga nombawai nantuki pompakule ira, tapi ira nombawai neliu nggari pompakule ira. Etu nikitaku mboto!
4 Nggari dota ira mboto ira nerapi ante mpuꞌu-mpuꞌu rara ka aku ala ira woꞌu mamala rawai loga masintuwu ante tau-tau ntanina mantulungi topomparasaya-topomparasaya to nakasiasi.
5 To niwai ira neliu mpuꞌu nggari to nisarumaka kami. Pamulana ira nombajuju koro ira mboto ka i Pue pade woꞌu ka kami nantuki dota Alatala.
6 Jadi etu sampe kami nerapi ka i Titus ala iꞌa mompapola bago to nabelona mompasiromu doi petulungi to nipamulana ri tatongo komi bopia.
7 Komimo to neliu nggabelo riara mpengele-ngele. Pomparasaya komi mpuꞌu-mpuꞌu naroso. Komi niwai ka pompakule motesa-tesa bo mompasimbayu pangginjani nggari jaꞌi Pue. Nabete mpuꞌu rara komi mantulungi tau ntanina. Pade nabete mpuꞌu towe komi ri jaꞌi kami. Sabana etu masipato woꞌu komi meliu nggabelo mompajala bago mompasiromu doi petulungi etu.
Mombawai ante najoi rara nantuki jonjo i Pue Yesus mboto
8 Tesaku ka komi etu daꞌa parenta. Tapi patujuku mompopanjani ka komi nuapa to nipowia tau ntanina mantulungi roana ala manggita sampe ri umba towe komi.
9 Sabana ninjani komi mboto kabete nu towe belo Pueta Yesus Kristus. Naupa Iꞌa mpuꞌu-mpuꞌu nakalumana Iꞌa najadi nakasiasi mpuꞌu ala mantulungi komi. Iꞌa nipakakasiasi mpuꞌu ala komi mamala rapakakalumana.
10 Jadi iweꞌimo pombarataku ewa kasiromu doi petulungi etu. Mpae naliu komimo tau-tau pamulana to nadota mompasiromu doi petulungi etu, pade komi woꞌu tau-tau pamulana to nompamula nompasiromu doi etu.
11 Jadi weꞌi-weꞌi papolamo bago etu sampe maopu, ala karaji komi mompakaopu bago etu masimbayu ante kabete nu rara komi nompamula bago etu bopia. Waimo nantuki pompakule komi sambaꞌa bo sambaꞌa.
12 Sabana ane komi mombawai ante kamomi nu rara nantuki nuapa to naria ri jaꞌimu, pewaimu etu kana rakonoa rara Alatala. Iꞌa daꞌa manjarumaka pewai to meliu pompakulemu.
13 Daꞌa ntoto patujuku ala tau-tau ntanina ratulungi pade komi rapakatomo, tapi patujuku ala maria kasimbayuna riara nggatuwu komi.
14 Weꞌi-weꞌi komi nompakule mantulungi ira ante labina to naria ri jaꞌi komi. Pade tempo banepia ira woꞌu mamala mantulungi komi nggari labi to maria ri jaꞌi ira. Ane iwetu maria kasimbayuna.
15 Ewa to nitulisi riara Buku Nagasa iweꞌi:
“Tau to nompasiromu nadea, daꞌa ria pelabina,
pade tau to nompasiromu sakedi daꞌa ria kakurana.” (Kel. 16:18)
Titus ante roana nipakau Paulus mpaka ri ngata Korintus
16 Kami nosukuru ri jaꞌi Pue Alatala sabana Iꞌa nompakabete rara i Titus mompekiri kabelo komi nasimbayu ewa pompekiriku mboto.
17 Nanotomo etu sabana i Titus nompoiyo pomperapi kami mompapola mombaurusi kasiromu doi petulungi etu. Pade daꞌa aga etu, tapi nabete mpuꞌumo rarana mantulungi komi sampe iꞌa mboto nompakatantu kana malau mpaka ri jaꞌi komi.
18 Pade kami nompakau sambaꞌa sampesuwuta ntanina mantuki i Titus riara mpolumakona. Iꞌa tau to mpuꞌu-mpuꞌu nibila pura-pura topomparasaya sabana pokarajaana mompatolele Kareba Belo.
19 Daꞌa aga etu, tapi iꞌa woꞌu nipelisi ntodea topomparasaya momporoa kami riara mpolumako kami manggeni doi petulungi etu. Kami nokarajaa mompasiromu doi petulungi etu ala i Pue rabila bo ratoiya ntau, pade ala mompopokita kabete nu rara kami mantulungi tau nakasiasi.
20 Patuju kami nompakau sampesuwuta etu mpasanggani-nggani ante i Titus ala neꞌe maria tau manjalaraka akala kami mombaurusi pewai to nadea etu.
21 Sabana kami madota mompowia to nanoana, nabeloka riara mpanggita Alatala, nabeloka riara mpanggita manusia.
22 Nosanggani-nggani ante i Titus bo sampesuwuta ntanina etu, nipakau kami woꞌumo sambaꞌapa, etumo sampesuwuta to nadea ngganimo nompopokita ka kami kabete nu rarana mantulungi tau ntanina. Pade weꞌi-weꞌi nantambaimo kabete nu rarana mantulungi mombaurusi kasiromu doi petulungi etu, sabana iꞌa mpuꞌu-mpuꞌu nanjarumaka komi.
23 Ane i Titus, iꞌa roaku sampokarajaa mantulungi komi. Pade rombaꞌa sampesuwuta ntanina to mantuki iꞌa etu, ira tau to nisuro ntodea topomparasaya. Nggari katuwu ira nadea mpuꞌu tau nombabila bo nombatoiya Kristus.
24 Jadi kuperapi ka komi, popokitamo towe komi ka ira ala manoto ka pura-pura topomparasaya komi mpuꞌu-mpuꞌu nompotowe ira, pade ala manoto tesa-tesa kami nombatoiya komi ka ira bopia mpuꞌu-mpuꞌu nakono.