Titus bo roana kana mantulungi mompakasadia doi petulungi
9
Kakonona daꞌa paraluu aku mantulisi ka komi ewa doi petulungi ka topomparasaya to nakasiasi ri Bagia Yudea.
2 Sabana ninjaniku nabete mpuꞌumo rara komi mantulungi ira. Aku nantoiya komi ri jaꞌi to Makedonia. Niuliku ka ira, “Nasadiamo topomparasaya ri Propinsi Akhaya a mombawai petulungi, nompamula nggari mpae naliu.” Nangepe tesa ewa kabete rara komi madota mantulungi iwetu sabagia bete nggari jaꞌi ira woꞌu naria dota rara mantulungi.
3 Tapi naupa iwetu nipekiriku nabelopa ane aku mompakau i Titus ante roana etu ka komi mantulungi mompakasadia doi petulungi komi. Ante iwetu mpuꞌu-mpuꞌu masadia petulungi komi tempo aku marata ewa to nitesaku ka tau-tau to Makedonia. Neꞌe-neꞌe tesa-tesaku nombatoiya komi etu aga tesa bayangi!
4 Sabana ane petulungi komi daꞌapa nasadia tempo aku marata mpasanggani-nggani ante to Makedonia, natantumo maeya mpuꞌu mataku, neꞌepa rauli komi. Sabana niuliku ka ira komi mpuꞌu-mpuꞌu nasadia mantulungi.
5 Jadi etu sampe nipekiriku paraluu aku merapi ka roa-roa etu ala mokolu ka aku mpaka ri jaꞌi komi mantulungi mompakasadia petulungi to nijanji komi bopia. Nipowiaku iwetu ala petulungi komi etu masadia tempo kami marata. Ante iwetu kana manoto petulungi komi etu niwai ante najoi rara daꞌa sabana nipasuꞌu.
Asele mombawai ante najoi rara
6 Pariara ntaꞌimo tesaku eꞌi: Tau to nombatuja sakedi, sakedi woꞌu aselena. Pade tau to nombatuja nadea kana madea woꞌu aselena.
7 Butu mbaꞌa tau kana mombawai nantuki to nipakatantu riara ntaꞌina mboto. Neꞌe iꞌa mombawai ante nakaja rara atau ante nipasuꞌu, sabana Alatala nompotowe tau to nombawai ante nadamba rarana.
8 Pade Alatala nakuasa mantambai rasi ka komi to nadea-deana sampe komi bate-batena rapakagana riara mpengele-ngele. Ante iwetu komi mamala mompowia mpengele-ngele powia to nabelona mantulungi tau-tau ntanina.
9 Riara Buku Nagasa naria nitulisi iweꞌi:
“Iꞌa nompalele rasi ka tau-tau nakasiasi.
Kanoa nu rarana naroo sampe ri kasae-saena.” (Mzm. 112:9)
10 Alatala nombawai sawua ka toposawu, pade niwaina panggoni rakonita. Pade iwetu woꞌu Iꞌa mombawai bo mompakadea rasi ka komi sampe komi mantambai mombawai ka tau ntanina.
11 Komi kana rapakasugi riara mpengele-ngele sampe komi bate-batena mamala mombawai ante najoi rara. Pade tempo kami mombawai pewai komi etu ka tau-tau nakasiasi ri Bagia Yudea, madea tau kana manguli tarima kasi ka Alatala.
12 Sabana petulungi to niwai komi etu daꞌa aga mantulungi mompakagana nuapa to niparaluu todea topomparasaya, tapi manggeni madea tau woꞌu manguli tarima kasi ka Alatala.
13 Ira kana mantoiya bo mombabila Alatala, sabana ante mombawai petulungi etu komi mompakanoto komi mpuꞌu-mpuꞌu natundu riara Kareba Belo Kristus to nipangaku komi. Pade ira kana mantoiya Alatala sabana komi mombawai petulungi ka ira bo tau-tau ntanina ante najoi rara.
14 Pade ira kana momposambaya komi ante nalentora rara sabana manggita asele nu towe belo nu Alatala to neliu-liuna riara nggatuwu komi.
15 Masipato mpuꞌu kita mosukuru ri jaꞌi Alatala sabana pewaina to daꞌa namala rasowadakata kabelona!