PAULUS MOMBABALI TESA TO NANGULI IꞌA DAꞌA SURO I PUE YESUS (10:1-13:10)
Kuasa Paulus mantui bagona ewa suro i Pue Yesus
10
Weꞌi-weꞌi aku, i Paulus eꞌi, madota merapi sangele ka komi. Naria bara sakuya mbaꞌa tau ri setu to nanguli iweꞌi: “Tempo i Paulus naria ri tatongota iꞌa nekou, tapi tempo nosinggakawao pade nabia iꞌa.” Jadi ante naede bo nalusu rara nasimbayu ewa kaede bo kalusu rara Kristus mboto
2 aku merapi ka komi, neꞌe mompasuꞌu aku moinggu makoꞌo ri jaꞌi komi tempo aku momai ri setu. Sabana aku nopatuju moinggu makoꞌo iwetu ri jaꞌi tau-tau ri setu to nanguli pokaingguku nasimbayu ewa tau-tau ri dunia to daꞌa nekou ri jaꞌi Alatala.
3 Toramo! Naupa kami natuwu riara dunia kami daꞌa nosibali mangewa kajaꞌana ante pompakule manusia biasa.
4 Parewa mposibali to nipake kami daꞌa parewa mposibali nggari dunia eꞌi, tapi parewa to nabaraka nggari jaꞌi Alatala. Ante parewa etu kami mompakaropu akala-akala tau-tau to nangewa Alatala.
5 Kami mompakaropu mpengele-ngele pompekiri to nadenggona bo mpengele-ngele pompekiri to nasombona to nombalawa tau mangginjani Alatala. Kami mompakatundu mpengele-ngele pompekiri ri jaꞌi Kristus.
6 Jadi ane komi pura-pura nompakanoto komi mpuꞌu-mpuꞌu natundumo ri jaꞌi kami, nasadiamo kami mombasuku ira to daꞌa natundu.
7 Sampesuwu-sampesuwu, pekirimo to nanoto ranjani komi. Ane maria tau mpuꞌu-mpuꞌu nompekiri iꞌa bagia Kristus, kana ratorana kami woꞌu bagia Kristus nasimbayu ewa iꞌa.
8 Naupa aku mombatoiya kuasa to niwai Kristus ka kami meliu nggari to masipatona, aku daꞌa maeya mata. Sabana kuasa etu niwai Pue ka kami ala mompakaroso pomparasaya komi, daꞌa ala mombagero komi.
9 Daꞌa patujuku mompakaeka komi ante sura-suraku.
10 Sampe niuliku iwetu sabana ninjaniku nariamo tau to nanguli iweꞌi: “Sura-sura i Paulus nataja bo nakoꞌo, tapi ane iꞌa mboto naria ri tatongota, iꞌa aga noinggu nalente-lente, pade pantesana daꞌa ntoto ria batuana.”
11 Tapi kana ranjani tau-tau to nanguli iwetu ane kami momai ri jaꞌi komi, pokainggu kami kana masimbayu pura ante tesa to nitulisi kami riara sura-sura.
Daꞌa masipato guru-guru topodawa nombatoiya koro ira mboto
12 Daꞌa nabia kami manguli koro kami nasimbayu ante ira to nombatoiya koro ira mboto! Daꞌa nabia kami mompakasimbayu koro kami ante ira! Ira nositoiya mboto sambaꞌa bo sambaꞌa. Ira nantoiya koro ira nantuki panggita ira mboto. Natantumo nadoyo mpuꞌumo tau-tau etu!
13 Tapi kami daꞌa ntoto nasimbayu ante ira! Ane kami mombatoiya koro mboto kami daꞌa mombaliunaka to masipatona, sabana kami aga mombatoiya pokarajaa to niparasaya Alatala ka kami. Pade komi pura-pura ri Korintus nesua bagia mpokarajaa to niparasaya ka kami etu.
14 Daꞌa nasala ane kami mombatoiya asele mpokarajaa kami ri tatongo komi, sabana kamimo to nanggeni Kareba Belo Kristus ka komi.
15 Kami daꞌa nombaliunaka to masipatona ante nanguli asele mpokarajaa tau ntanina asele mpokarajaa kami mboto. Tapi kami nanjarumaka pomparasaya komi kana mantambai maroso sampe kaopuna mantambai mabete asele mpokarajaa kami ri tatongo komi.
16 Ante iwetu kami mamala mapola mompatolele Kareba Belo sampe ri bagia-bagia ntanina meliu nggari bagia komi. Kami daꞌa madota mombatoiya koro kami mboto ewa asele mpokarajaa tau-tau ntanina.
17 Ewa to nitulisi riara Buku Nagasa iweꞌi: “Tau to madota mombatoiya sangele, iꞌa kana mombatoiya nuapa to nipowia i Pue.” a
18 Sabana tau to nikonoa Alatala daꞌa tau to nombatoiya korona mboto tapi tau to nitoiya Alatala.