Paulus daꞌa nasimbayu ante guru-guru topodawa
11
Sampesuwu-sampesuwu, kuperapi ala komi mosabara ante aku. Palogamo aku motesa madoyo sakedi weꞌi-weꞌi! Tapi nosabara mamimo komi ante aku!
2 Nasusa mpuꞌumo raraku mompekiri komi nasimbayu ewa kasusa rara Alatala mboto. Sabana komi nasimbayu ewa sambaꞌa randoo to nagasa pokaingguna to nipopotingeaku ante Kristus.
3 Tapi nakini mpuꞌumo raraku, neꞌe-neꞌe komi raakala ntau sampe komi mana mompotowe Kristus ante mpuꞌu-mpuꞌu raramu nasimbayu ewa i Hawa niakala ule tempo nggaolu.
4 Sabana nikitaku ewa komi nasadia mantarima ante nasana rara tau-tau to narata ri jaꞌimu mompatolele kareba ka komi to nantesa Yesus ntanina, daꞌa Kareba i Pue Yesus to nipatolele kami ka komi. Komi nasadia mantarima kuasa ntanina nggari to nitarima komi nggari jaꞌi Nosa Nagasa nu Alatala. Pade komi nasadia mantarima kareba ntanina nggari Kareba Belo to nitarima komi nggari jaꞌi kami bopia.
5 Posabaramo komi ante aku eꞌi, sabana nantuki pombarataku aku eꞌi daꞌa ntoto nakura nggari tau-tau to nireke komi suro to neliu ntoto kataꞌuna.
6 Naupa aku daꞌa nataꞌu notesa, pangginjaniku daꞌa ria kakurana. Etu bate-batena nipopokita kami ka komi riara mpengele-ngele bopia.
Kabiasa Paulus tempo mompatolele Kareba Belo
7 Tempo aku naria ri tatongo komi aku nompatolele Kareba Belo ka komi ante daꞌa ntoto nerapi gaji nggari jaꞌi komi. Aku nompakaede koroku nokarajaa ante paleku mboto ala manggeni belo ka komi pura-pura. Tapi nokuya komi nompekiri powiaku etu nasala?
8 Tempo aku nomai nantulungi komi aku nitanggu todea topomparasaya nggari ngata ntanina. Namala rauli aku nompakarugi ira ala mamala mantulungi komi.
9 Pade tempo aku ri tatongo komi ane naria to niparaluuku aku daꞌa nompakatomo komi. Sabana to niparaluuku etu nipakagana sampesuwu-sampesuwu topomparasaya to narata nggari Propinsi Makedonia. Aku bate-batena nompasimbuku ala neꞌe mompakatomo komi mompekiri katuwuku. Pade aku bate-batena mompasimbuku iwetu.
10 Daꞌa ria sambaꞌa ri Propinsi Akhaya to mamala mombatagi aku motesa mombatoiya pokaingguku etu! Tesaku eꞌi nakono sabana pepatuduki to nakonona nggari jaꞌi Kristus naria riara ntaꞌiku!
11 Nuapa sabana aku notesa iwetu? Bara nipekiri komi aku daꞌa nompotowe komi? Etu daꞌa nakono! Ninjani Alatala mbotomo aku nompotowe komi!
12 Tapi aku bate-batena mantuki kabiasaku etu. Aku daꞌa merapi gaji nggari jaꞌi komi ala mompakalipo tesa tau ntanina to nangoa nanguli ira nokarajaa nasimbayu ante kami.
13 Tau-tau ewa etu aga suro-suro topodawa! Ira topokarajaa to nadenggona, aga tumoni-moni najadi suro-suro Kristus!
14 Kakonona pokainggu ira etu daꞌa nompakagumaa kami, sabana Magau nu Seta mboto namala mombabali korona majadi ewa malaeka to naremena.
15 Jadi daꞌa sangele to rapogumaa ane batua-batuana woꞌu tumoni-moni majadi ewa suro-suro to nantuki dota Alatala. Tapi kaopuna ira kana rabalasi ante pesuku to masipato ante powia ira.
Kasusa bo kapari to nirasai Paulus nompakanoto iꞌa mpuꞌu-mpuꞌu suro i Pue Yesus
16 Sangganipa kuperapi, neꞌe rapekiri komi aku eꞌi tau nadoyo. Tapi naupa bara maria to nompekiri iwetu, palogamo aku mombatoiya koroku mboto sakedi ewa sambaꞌa tau nadoyo.
17 Ante mombatoiya koroku mboto eꞌi aku daꞌa notesa nantuki parenta i Pue, tapi ewa sambaꞌa tau nadoyo.
18 Kakonona nadeamo tau ntanina nombatoiya koro ira bo powia to nipowia ante karoso ira mboto. Jadi aku woꞌu kana mombatoiya koroku sakedi.
19 Nantuki komi, komimo tau-tau to nanoto mpuꞌu, tapi komi aga nosabara ante tau-tau nadoyo!
20 Nanotomo etu sabana komi nosabara mpuꞌu ane maria topanggeniaka mompobatua komi, ane ira mompakaopu mbara-mbara komi, ane ira mombaakala komi, ane ira moinggu masombo-sombo ri jaꞌi komi, atau ane ira mombasapa lenje komi!
21 Ante naeya mata aku kana mompangaku ka komi, kami daꞌa nabia moinggu iwetu ri jaꞌi komi!
Tapi ane maria ira to nabia mombatoiya koro ira mboto aku woꞌu nabia! Weꞌi-weꞌi aku notesa ewa tau nadoyo!
22 Iwenumo? Ira tau-tau to Yahudi? Aku woꞌu tau to Yahudi! Ira tau-tau to Israel? Aku woꞌu tau to Israel! Ira muli Abraham? Aku woꞌu muli Abraham!
23 Ira batua Kristus? Pantesaku eꞌi ewa pantesa togila! Aku batua Kristus to neliu nggabelo nggari ira! Aku nokarajaa neliu nggatomo nggari ira! Aku nisuaraka riara tarunggu neliu nggaoso nggari ira! Aku nicambu neliu nggajaꞌa nggari ira, pade nadea ngganimo aku ntora namate!
24 Limangganimo aku niporo ntau to Yahudi, butu nggani tolumpulu sasio mbela.
25 Tolungganimo aku niboba nto Roma ante kayu. Sanggani aku nirempe ntau ante watu. Tolungganimo sakaya bete to nipesawiku natala rara ntasi, pade naria sanggani aku nalome rara ntasi saeo sambengi.
26 Nadea ngganimo aku nolumako nakawao. Riara mpolumakoku etu aku nandasa nombawote ue nanggabuntu, aku nandasa nantingayo parampo, aku nipandasa tau-tau to Yahudi bo tau-tau daꞌa to Yahudi woꞌu. Aku nipandasa riara ngata pade ri karawa baina. Aku nandasa rara ntasi pade aku woꞌu nipandasa tau-tau tumoni-moni nomparasaya i Pue Yesus.
27 Aku bate-batena nokarajaa ntomo sampe nadea ngganimo aku daꞌa nakapo noturu njambengi ntua. Aku naoro taꞌi bo nabai tambolo, pade naoso nantaꞌamaka nanggoni. Aku naoso naleni bo nakura pakea.
28 Pade ntanina nggari etu pura-pura, eo-eo aku nakini raraku nompekiri pura-pura todea topomparasaya.
29 Ane maria nggari tatongo ira to nalente pomparasayana, aku woꞌu mombarasai kalentena etu. Ane maria nggari jaꞌi ira to nanawu riara silaka, aku woꞌu masusa raraku mompekiri ira.
30 Ane aku nipasuꞌu mombatoiya koroku, agina aku mombatoiya nuapa-nuapa to nompakanoto kalenteku.
31 Alatala, Uma nu Pueta Yesus, nangginjani aku daꞌa nodawa! Iꞌamo to ratoiya sampe ri kasae-saena!
32 Tempo aku ri ngata Damsyik Gubernur to nipakakuasa Magau Aretas nompakau tantarana nanggatono bobaa bete ngata etu ala manjoko aku.
33 Tapi aku niulunjaka riara karanji lauro nggari saongu tilalaba ri tembo ngata mpaka ri sawalikuna. Ante iwetu aku nakabasaka nggariara mpale Gubernur etu.