Panggita bo pangginjani to nipopanjani Alatala ka Paulus
12
Aku kana mompapola mombatoiya koroku. Naupa daꞌa ria gunana aku kana mompapola mantesa panggita to nikitaku bo pangginjani to nipopanjani Alatala ka aku.
2 Aku nosinjani ante sambaꞌa topomparasaya Kristus. Sampulu patampae naliu iꞌa nionggotaka sampe ri suruga katolunjunjuna. Daꞌa ninjaniku ane korona mpuꞌu-mpuꞌu nateonggotaka atau etu aga panggitana, tapi Alatala nangginjani.
3-4 Kusili sangganipa, tau etu nionggotaka sampe nesua ri suruga. Daꞌa ninjaniku ane korona mpuꞌu-mpuꞌu nionggotaka atau etu aga sangele panggitana, tapi Alatala nangginjani. Pade ri setu iꞌa nangepe tesa-tesa anu daꞌa namala rasowadaka, tesa anu daꞌa namala ratesa manusia. a
5 Aku mombatoiya katuwu tau etu, tapi daꞌa katuwuku. Ewa katuwuku mboto aku aga mombatoiya nuapa-nuapa to mompopokita kalenteku.
6 Kakonona ane aku madota mombatoiya koroku, aku daꞌa noinggu nadoyo-doyo sabana tesa to kuuli etu kana makono. Tapi aku daꞌa madota mombatoiya katuwuku mboto ala neꞌe sampe maria tau mompekiri aku meliupa nggari to nakonona. Neꞌe-neꞌe pompekiri ira meliu nggari pokaingguku to nikita ira riara nggatuwuku pade tesa to niepe ira nggari jaꞌiku.
7 Jadi aku niwai Alatala ka sangele to nompandasa aku nasimbayu ewa karui to nantosu koroku ala aku neꞌe majadi masombo nggari panggita-panggita to nikitaku. Etumo sangele suro nggari jaꞌi Magau nu Seta to nompandasa aku ala aku neꞌe majadi masombo.
8 Tolungganimo aku nerapi ka i Pue ante mpuꞌu-mpuꞌu raraku ala suro nggari jaꞌi Magau nu Seta etu rapopalai nggari jaꞌiku.
9 Tapi nangulimo Pue ka aku, “Naganamo ane naria towe beloku ri jaꞌimu, sabana neliu ngganoto kuasaku riara nggatuwumu ane komi nalente.” Jadi etu sampe aku kana mombatoiya kalenteku etu, ala Kristus bate-batena manggalendu aku ante kuasana.
10 Jadi aku kana madamba-damba riara kalenteku. Pade aku woꞌu madamba-damba ane aku rauli sinjaꞌi, rapakasusa, rapandasa, bo mpuꞌu-mpuꞌu rapakajaꞌa sabana nomparasaya Kristus. Sabana tempo aku nalente iwetu, aku naroso ante kuasa Kristus.
11 Sampesuwu-sampesuwu, aku eꞌi notesa ewa sambaꞌa todoyo, tapi komimo to nompasuꞌu aku nowia iwetu! Kakonona komimo to masipato mombatoiya aku, sabana naupa aku eꞌi nireke sambaꞌa tau to daꞌa ria gunana, aku daꞌa ntoto nakura ane rapoposisala ante ira to nireke komi suro-suro to neliu ntoto kataꞌuna.
12 Sabana tandai-tandai to nompakanoto aku mpuꞌu-mpuꞌu sambaꞌa suro i Pue Yesus to nakonona nipowiaku ante nosabara ri tatongo komi. Etumo aku nompowia tandai-tandai to nipogumaa bo kabaraka-kabaraka ri tatongo komi.
13 Pokarajaaku ri tatongo komi nasimbayu ewa pokarajaaku ri tatongo pura-pura topomparasaya ntanina. Aga sangele posisalana powiaku ri jaꞌi komi, etumo aku daꞌa nompakatomo komi mompekiri katuwuku. Naupa powiaku etu daꞌa nasala, tapi aku merapi ampu ri jaꞌi komi.
Kakini rara Paulus nompekiri to Korintus
14 Weꞌi-weꞌi nasadiamo aku momai mantalioda komi katolungganina, pade aku batena nopatuju daꞌa mompakatomo komi. Sabana to nipodotaku daꞌa mbara-mbara komi tapi towe komi! Daꞌa ngana-ngana to masipato mompasiromu kakalumana ka totuꞌana, tapi totuꞌa to masipato mompasiromu kakalumana ka ana-ana ira!
15 Jadi aku kana mombawai ka komi mpengele-ngele to naria ri jaꞌiku, nau koroku mboto woꞌu. Ane aku mpuꞌu-mpuꞌu nompotowe komi iwetu, nokuya komi nakura nompotowe aku?
16 Ninjani komi mbotomo aku daꞌa sanggani nompakatomo komi mompekiri katuwuku. Tapi danaria to nanguli, “Nataꞌu mpuꞌu i Paulus. Iꞌa nombaakala kita ala mombarata untu ka korona mboto ante mombabagiu kita!”
17 Iwenumo? Nariamo sanggani komi niakala tau-tau to nipakauku mpaka ri jaꞌi komi? Naria ira nangelo untu nggari jaꞌi komi?
18 Aku nompakau i Titus mpaka ri jaꞌi komi nosanggani-nggani ante sampesuwuta ntanina etu. Nariamo sanggani i Titus nangelo untu ka korona mboto nggari jaꞌi komi? Natantumo daꞌa ria! Tapi ninjani komi mbotomo kami rombaꞌa nosaongu rara, pade pokainggu kami ri tatongo komi nasimbayu puramo.
19 Bara nipekiri komi patuju tesa kami eꞌi aga mebali ri ngayo komi! Tapi sampesuwu-sampesuwu to nipotoweku, etu daꞌa nakono! Ri ngayo Alatala mbotomo kami notesa ewa tau to nosaongu rara ante Kristus. Pade pura-pura nuapa to nitesa kami patujuna ala mompakaroso pomparasaya komi.
20 Sabana nakinimo raraku ane aku momai ri jaꞌi komi pokainggu komi daꞌa masimbayu ewa to nipokonoku, pade pokaingguku woꞌu ri jaꞌi komi daꞌa masimbayu ewa to nipokono komi. Nakinimo raraku ane aku momai ri setu maria komi to mosinggarau, bara maria to masiriati, bara maria to marau rarana bara maria to aga mompekiri korona mboto. Nakinimo raraku maria tau manguli sinjaꞌi bo mompakajaꞌa roa-roana, bara maria to masombo-sombo bo mompakagado todea topomparasaya.
21 Nakinimo raraku neꞌe-neꞌe ane aku sangganipa momai ri jaꞌi komi, Alatala kana mompakaeya aku ri ngayo komi. Neꞌe-neꞌe aku mageo ri ngayo komi sabana madea nggari tatongo komi to nasilaka bopia daꞌapa najea nggari silaka-silaka. Bara maria to danogau sala ante tau daꞌa rongona mboto bara mowia to daꞌa ntoto masipato ewa to nabiasa nipowia ira bopia.