Popatora-popatora kaopuna
13
Tolunggani ka eꞌimo aku momai ri jaꞌi komi. Riara Buku Nagasa naria nitulisi iweꞌi: “Butu-butu tesa pepangadu ri jaꞌi ntau kana ratakono rombaꞌa atau tolumbaꞌa sabi pade namala rareke nakono.” a
2 Tempo aku naria ri tatongo komi karongganina bopia nipopatoraku tau-tau to nowia silaka bo komi pura-pura. Pade weꞌi-weꞌi naupa aku nosinggakawao ante komi kupopatora bali ka komi iweꞌi: Ane aku momai ri jaꞌi komi mana ria ampuku ri jaꞌi ira to nowia silaka etu.
3 Komi madota manggita tandaina to mompakanoto aku mpuꞌu-mpuꞌu niposumba Kristus! Jadi etu kana rakita komi! Sabana ane Kristus mangontiaka komi Iꞌa daꞌa nalente-lente, tapi Iꞌa mpuꞌu-mpuꞌu nakuasa ri tatongo komi.
4 Tempo Kristus nipaku ri kayu parika sampe namate nalentemo Iꞌa. Tapi weꞌi-weꞌi Iꞌa batena natuwu ante kuasa nggari jaꞌi Alatala. Iwetu woꞌu kami to nosaongu rara ante Iꞌa. Kami aga manusia to nalentena. Tapi ane mantingayo komi kami kana makuasa nasimbayu ewa Kristus ante kuasa nggari jaꞌi Alatala.
5 Sampesuwu-sampesuwu, ujimo koro komi mboto ala manggita ane komi mpuꞌu-mpuꞌu natuwu ewa topomparasaya i Pue. Paresamo koro komi mboto. Nanotomo Yesus Kristus naria riara ntaꞌi komi? Ane etu daꞌa nanoto, batuana komi daꞌa mpuꞌu-mpuꞌu topomparasaya i Pue.
6 Tapi nisarumakaku kana manoto ka komi kami eꞌi mpuꞌu-mpuꞌu suro i Pue to nakonona.
7 Kami nosambaya ka Alatala ala komi neꞌe mowia silaka. Patuju kami mosambaya iwetu daꞌa ala mompakanoto kami eꞌi mpuꞌu-mpuꞌu suro i Pue to nakonona. Tapi patuju kami ala komi batena mowia to nanoana. Jadi ane kami rareke ntau daꞌa suro i Pue to nakonona, daꞌa ria mokuya!
8 Sabana kami daꞌa namala mompowia sangele to mangewa to nakonona. Tapi kami aga mompowia to nakonona.
9 Nadamba mpuꞌu rara kami ane kami nalente bo komi naroso. Jadi kami bate-batena mosambaya ala pokainggu komi majadi mabelo pura.
10 Etu sampe aku nantulisi tesa-tesa eꞌi ka komi tempo kita nosinggakawao. Patujuku ala ane aku momai ri jaꞌi komi ri setu daꞌa paraluu aku motesa makoꞌo mompakabelo pokainggu komi ante kuasa to niwai i Pue ka aku. Sabana kuasa etu niwaina ka aku ala mompakaroso komi daꞌa ala mombagero komi.
Petabe Kaopuna
11 Jadi sampesuwu-sampesuwuku, pakadambamo rara komi. Pasimbukumo mompakabelo pokainggu komi. Tarimamo pepatudukiku eꞌi! Komi kana matuwu ante mosaongu pekiri bo mosaongu rara, pade mosinggabelo sambaꞌa bo sambaꞌa. Pade Alatala, puꞌu nu towe bo katuwua nabelo kana mosanggani-nggani ante komi.
12 Posipakasampemo tabe sambaꞌa bo sambaꞌa ante towe. Pade tarimamo tabe nggari jaꞌi pura-pura topomparasaya ri seꞌi.
13 Perapi Pue Yesus Kristus mombagane komi. Perapi Pue Alatala mompotowe komi, pade perapi Nosa Nagasa nu Alatala mosanggani-nggani ante komi pura-pura.
Tabe nggari jaꞌiku,
Paulus