SURA PAULUS KA TOPOMPARASAYA RI
GALATIA
1
1-2 Sura eꞌi nggari jaꞌiku i Paulus, suro i Pue Yesus, ka topomparasaya i Pue Yesus ri Propinsi Galatia. Tabe nggari jaꞌiku bo nggari jaꞌi pura-pura topomparasaya to nosanggani ante aku ri seꞌi. Aku eꞌi najadi suro i Pue daꞌa nggari dota nu manusia pade daꞌa woꞌu manusia to nangonggotaka aku. Tapi aku nionggotaka Yesus Kristus mboto bo Umata Pue Alatala to nompakatuwu bali Iꞌa nggari kamatena.
3 Perapi Umata Alatala bo Pue Yesus Kristus mombagane komi bo mombawai katuwua mabelo ka komi.
4 Pue Yesus nombawai korona rapatesi mantolo silakata nantuki dota Umata Alatala ala Iꞌa mamala mombakabasaka kita nggari pura-pura kajaꞌana ri dunia weꞌi-weꞌi.
5 Rabila bo ratoiyata Alatala sampe ri kasae-saena. Amin!
Paulus nangontiaka to Galatia sabana ira nompalasi pepatuduki to nakonona
6 Daꞌa nesua ri akalaku iwenu komi nasasinta gaga nompalasi Pue Alatala to nompokio komi majadi todeana nggari towe belo Kristus pade nantuki pepatuduki tau ntanina to niuli ira “kareba belo!”
7 Kakonona daꞌa ria “kareba belo” ntanina. Aga naria tau-tau nompakagado komi ante pepatuduki ira to nasala. Ira aga madota mompakadenggo Kareba Belo to nantesa Kristus.
8 Tapi kuuli ka komi, nau kami mboto atau malaeka nggari suruga mompatolele pepatuduki to nosisala ante Kareba Belo to nipatolele kami ka komi bopia, nasurukawumo iꞌa!
9 Tempo kami danaria ri tatongo komi bopia niuli kami mami iwetu, pade weꞌi-weꞌi sangganipa kuuli, ane maria tau mompatolele pepatuduki to nosisala ante Kareba Belo to nitarima komi, nasurukawumo iꞌa!
10 Jadi iwenumo, sampesuwu-sampesuwu? Ante nanguli iwetu aku miki ratoiya ntau? Etu daꞌa ntoto nakono! Aku aga madota ratoiya Alatala. Bara nipekiri komi aku aga madota mompakadamba rara manusia. Tapi etu daꞌa nakono, sabana ane aku danompasimbuku mompakadamba rara manusia aku daꞌa masipato majadi batua Yesus Kristus.
KUASA PAULUS NANGGENI KAREBA BELO NGGARI JAꞌI PUE YESUS MBOTO (1:11-2:21)
Paulus nisuro i Pue Yesus mboto manggeni Kareba Belo
11 Sampesuwu-sampesuwu, kana ranjani komi Kareba Belo to nipatoleleku etu daꞌa Kareba Belo nggari jaꞌi manusia.
12 Aku daꞌa nantarima Kareba Belo etu nggari jaꞌi manusia, pade daꞌa woꞌu manusia to nompatuduki etu ka aku. Tapi Yesus Kristus mbotomo to nompopanjani isi Kareba Belo etu ka aku.
13 Natantu niepe komimo tesa ewa katuwuku bopia tempo aku danantuki agama Yahudi. Ante daꞌa ria ampu aku nompandasa topomparasaya i Pue Yesus. Aku batena nompasimbuku mompakaropu pomparasaya ira.
14 Aku neliu nggaraji nggari pura-pura sanggatuwuku to Yahudi nantuki Atura-atura agama Yahudi. Aku mpuꞌu-mpuꞌu naria dotaku nantuki ada-ada ntotuꞌa kami nggaolu.
15 Tapi tempo aku daꞌapa nesuwu, nggari towe belona Alatala nompelisi aku bo nompokio aku majadi surona.
16 Iꞌa nompopanjani Anana i Pue Yesus ka aku ala aku mamala mompatolele Kareba i Pue Yesus ka tau-tau daꞌa to Yahudi. Tempo aku nisuro Alatala manggeni Kareba etu aku daꞌa nalau ri jaꞌi manusia merapi rapatuduki.
17 Aku daꞌa woꞌu nalau mpaka ri ngata Yerusalem manggita ira to najadi suro i Pue Yesus nokolu nggari aku. Tapi aku nalau mpaka ri tana Arab, pade nggari setu aku nanjili bali mpaka ri ngata Damsyik.
Kuasa Paulus nanggeni Kareba Belo daꞌa nggari jaꞌi suro-suro ri Yerusalem
18 Tolumpae kaliuna pade aku nalau mpaka ri ngata Yerusalem manggita i Petrus. Aku netoꞌo ri jaꞌina aga sampulu limambengi kasaena.
19 Tapi aku daꞌa nanggita suro-suro i Pue Yesus ntanina, aga Yakobus tuaꞌi i Pue.
20 Parasayamo tesaku eꞌi! Ri ngayo Alatala mboto aku manguli, tesa to nitulisiku eꞌi nakono! Aku daꞌa nodawa!
21 Naopu etu pade aku nalau mpaka ri Bagia Siria bo Kilikia.
22 Tapi sampe ri tempo etu topomparasaya Kristus ri Bagia Yudea daꞌapa nangginjani lenjeku.
23 Ira aga nangepe kareba to nanguli, “Tau to mpuꞌu-mpuꞌu nompandasa kita topomparasaya bopia weꞌi-weꞌi nompatolele Kareba Belo ewa pomparasaya ka i Pue Yesus to madota rapakaropuna bopia!”
24 Pade ira nantoiya Alatala sabana nuapa to najadi ante aku.