Kareba Belo to nikeni Paulus nitakono suro-suro i Pue Yesus
2
Pade sampulu patampae kaliuna nalau woꞌumo aku mpaka ri ngata Yerusalem nosanggani ante i Barnabas. Pade aku woꞌu nanggeni i Titus.
2 Aku nalau mpaka ri setu sabana naria tesa nggari jaꞌi Alatala nompakau aku malau. Sangga naratapa ri setu aku nasiromu aga ante topanggeniaka-topanggeniaka topomparasaya. Pade nipakanotoku ka ira isi Kareba Belo to nipatoleleku ka tau-tau daꞌa to Yahudi. Patujuku ala pepatudukiku neꞌe rasalai sampe daꞌa ria gunana bagoku mompatolele Kareba Belo, nabeloka to nipowiaku bopia, nabeloka to danipowiaku weꞌi-weꞌi.
3 Tapi ira nantakono pepatudukiku. Etu nanoto sabana i Titus, to Yunani to nosanggani ante aku ri setu, daꞌa nipasuꞌu ira rasuna
4 naupa naria tau ntanina nompasuꞌu. Iramo tau to nanguli ira topomparasaya i Pue Yesus, tapi ira nodawa. Ira nesua nggalino ri polibu etu ala manggita iwenu pokaingguta to natekabasaka nggari Atura-atura agama Yahudi sabana kita nosaongu rara ante Yesus Kristus. Patuju ira ala kita kana matundu riara Atura-atura etu.
5 Tapi kami daꞌa ntoto nekou ri jaꞌi ira, nau aga sampalai, ala kakono nu Kareba Belo kana maria ri jaꞌi komi.
6 Tapi topanggeniaka-topanggeniaka topomparasaya to nireke nalanga katuwuna nasituju ante Kareba Belo to nipatoleleku. Daꞌa ria nuapa-nuapa to nitambai ira riara Kareba etu. (Ane ira nalanga katuwuna atau daꞌa, nasimbayu riara mpanggitaku, sabana Alatala daꞌa nanggita lenje.)
7 Tapi nanotomo ka ira aku niparasaya Alatala nanggeni Kareba Belo ka tau daꞌa to Yahudi nasimbayu ewa i Petrus niparasaya Alatala nanggeni Kareba Belo ka tau to Yahudi.
8 Sabana Alatala nombawai pompakule ka i Petrus majadi topanggeni Kareba Belo ka tau to Yahudi, pade Iꞌa woꞌu nombawai pompakule ka aku majadi topanggeni Kareba Belo ka tau daꞌa to Yahudi.
9 Tempo ira Yakobus, i Petrus bo Yohanes, to nireke topanggeniaka topomparasaya i Pue Yesus ri ngata Yerusalem, nanggita kabelo nu Alatala to niwai ka aku, etumo majadi surona, ira nosisoko pale ante aku bo i Barnabas ewa tandaina kami pura-pura roa sampokarajaa nanggeni Kareba Belo. Kami pura-pura nasituju ala aku ante i Barnabas kana manggeni Kareba Belo ka tau daꞌa to Yahudi bo ira manggeni Kareba Belo ka tau to Yahudi.
10 Aga sangele niperapi ira, etumo ala kami mantora mantulungi tau napakasi ri ngata Yerusalem. Pade etumo bago to nipobete raraku bo nipowiaku ante mpuꞌu-mpuꞌu.
Paulus nangontiaka Petrus ri ngata Antiokhia
11 Tempo i Petrus narata ri ngata Antiokhia aku nangewa iꞌa ngga mata-mata sabana pokaingguna ri setu nasala.
12 Tempo iꞌa lako narata iꞌa nanggoni mpasanggani-nggani ante topomparasaya daꞌa to Yahudi. Tapi sangga naratapa bara sakuya mbaꞌa tau to nisuro Yakobus, nouramo iꞌa nggari jaꞌi ntopomparasaya daꞌa to Yahudi. Mana madota iꞌa manggoni mpasanggani ante ira, sabana naeka rarana raontiaka topomparasaya to Yahudi to nanguli kita kana rasuna ala rapakasalama.
13 Pade topomparasaya to Yahudi ntanina woꞌu nompasiala pokainggu i Petrus to nadenggona sampe i Barnabas mboto natikeni nantuki pokainggu ira etu.
14 Tapi tempo aku nanggita pokainggu ira etu daꞌa nasipato ante pepatuduki to nakono nggari Kareba Belo, aku nangontiaka i Petrus ri ngayo ira pura-pura. Niuliku, “Komi sambaꞌa tau to Yahudi, tapi komi mana nantuki ada nto Yahudi. Komi aga natuwu nantuki kabiasa ntau daꞌa to Yahudi. Ane iwetu, nokuya komi madota mompasuꞌu tau-tau daꞌa to Yahudi mantuki ada-ada nto Yahudi?”
Manusia nireke manoa riara mpanggita Alatala ante momparasaya Yesus Kristus
15 Sampesuwu-sampesuwu, i Petrus ante aku tau to Yahudi mami nggari pesuwu kami, daꞌa tau daꞌa to Yahudi to daꞌa nantuki Atura-atura agama to nipapola i Musa.
16 Tapi naupa iwetu ninjani kami manusia daꞌa nireke manoa riara mpanggita Alatala ante mantuki Atura-atura agama, tapi ante momparasaya Yesus Kristus. Kami mboto nomparasaya Yesus Kristus ala majadi manoa riara mpanggita Alatala sabana pomparasaya kami ri jaꞌi Kristus, daꞌa sabana mantuki Atura-atura agama. Sabana ante mantuki Atura-atura agama daꞌa ria sambaꞌa mamala majadi manoa riara mpanggita Alatala.
17 Kami topomparasaya to Yahudi manjarumaka majadi manoa riara mpanggita Alatala sabana mosaongu rara ante Kristus. Tapi ante nowia iwetu nanotomo kami topombaliunaka Atura-atura agama nasimbayu ewa ira tau daꞌa to Yahudi to daꞌa nantuki Atura-atura agama etu. Jadi iwenu? Etu batuana Kristus nantulungi tau nowia silaka? Etu daꞌa ntoto nakono!
18 Sabana ane aku manjili manjarumaka Atura-atura agama to nikabasakakumo, pade manguli ante mantuki Atura-atura etu aku mamala majadi manoa riara mpanggita Alatala, nanotomo aku topombaliunaka Atura-atura.
19 Sabana tempo aku danantuki Atura-atura agama, nanotomo ka aku daꞌa kupakule majadi manoa riara mpanggita Alatala ante mantuki Atura-atura agama, sabana daꞌa kupakule mantuki Atura-atura etu. Jadi nenontomo aku manjarumaka Atura-atura agama ala aku mamala matuwu ante mantuki nuapa to nikonoa Alatala. Tempo Kristus namate ri kayu parika, riara mpanggita Alatala aku woꞌu namate nosanggani-nggani ante Iꞌa, sabana Iꞌa namate nanjaliku aku.
20 Jadi namala rauli iweꞌi: Mana aku to natuwu, tapi Kristus natuwu riara ntaꞌiku. Pade katuwua to nabou to nirasaiku weꞌi-weꞌi nggari pomparasayaku ka Ana nu Alatala to nompotowe aku bo nombawai korona rapatesi manjaliku aku.
21 Aku daꞌa nompoara towe belo nu Alatala etu. Sabana ane kita mamala majadi manoa riara mpanggita Alatala ante mantuki Atura-atura agama, etu batuana kamate Kristus daꞌa ria gunana!