KITA MAJADI MANOA RIARA MPANGGITA ALATALA ANTE MOMPARASAYA I PUE YESUS, DAꞌA ANTE MANTUKI ATURA-ATURA AGAMA (3:1-4:31)
Rasi to nitarima to Galatia sabana nomparasaya i Pue Yesus
3
Umba komi to Galatia to nabodo, isema to nanjalipuyo komi sampe komi mana madota mantuki pepatuduki to nakonona? Niepe komi mbotomo tesaku bopia nompakanoto iwenu asele nu kamate Yesus Kristus ri kayu parika.
2 Aga sangele to madota kunjani nggari jaꞌi komi. Komi nantarima Nosa Nagasa nu Alatala ante nantuki Atura-atura agama, atau ante nangepe bo nomparasaya Kareba Belo? Natantumo ante nangepe bo nomparasaya Kareba Belo!
3 Jadi nokuya komi nadoyo-doyo? Nompamulamo komi natuwu ewa topomparasaya i Pue Yesus ante kuasa nggari jaꞌi Nosa Nagasa nu Alatala. Iwenu sampe weꞌi-weꞌi komi nompasimbuku majadi nagasa ante pompakule komi mboto?
4 Iwenumo? Daꞌa ria gunana pura-pura nuapa to nirasai komi etu? Natantumo naria pura gunana!
5 Alatala nompopanaꞌu Nosana to Nagasa ka komi ante najoi rarana pade Iꞌa nompowia kabaraka-kabaraka ri tatongo komi. Iwenumo? Etu pura-pura nipowiana sabana komi nantuki Atura-atura agama? Natantu daꞌa ntoto! Tapi etu nipowiana sabana komi nangepe bo nomparasaya Kareba Belo!
Abraham najadi nanoa riara mpanggita Alatala sabana nomparasaya pojanji Alatala
6 Etu nasimbayu ewa tesa to nitulisi riara Buku Nagasa ewa Abraham iweꞌi: “Abraham nomparasaya Alatala, pade nggari pomparasayana etu iꞌa nireke Alatala tau nanoa.” a
7 Jadi sampesuwu-sampesuwu, miki ranjani komi tau-tau to natuwu ante nomparasaya Alatala, iramo to mpuꞌu-mpuꞌu nireke muli Abraham, sabana ira woꞌu nomparasaya nasimbayu ewa iꞌa.
8 Ninjani Alatala nggari lamba pamulana patujuna mantarima tau daꞌa to Yahudi majadi manoa riara mpanggitana ane ira momparasaya Iꞌa. Jadi Iꞌa woꞌu nokolu nompakanoto Kareba Belo ka Abraham ewa to nitulisi riara Buku Nagasa iweꞌi: “Nggari mulimu banepia, pura-pura manusia ri dunia kana mombarata rasi nggari jaꞌiku.” b
9 Abraham nomparasaya pade iꞌa niwai Alatala ka rasi. Jadi iwetu woꞌu pura-pura tau to natuwu ante nomparasaya kana rawai Alatala ka rasi nasimbayu ewa Abraham.
Kita daꞌa mombarata rasi nggari jaꞌi Alatala ante matundu riara Atura-atura agama
10 Isema-sema to nanjarumaka majadi manoa riara mpanggita Alatala ante mantuki Atura-atura agama to nipapola i Musa, iramo to nijanjiaka Alatala. Etu nanoto sabana naria tesa riara Buku Nagasa to nanguli iweꞌi: “Isema-sema daꞌa natutu nantuki pura-pura parenta to nitulisi riara Atura-atura agama, iꞌamo to nijanjiaka Alatala.” c
11 Nanoto mpuꞌu daꞌa ria tau to nireke Alatala nanoa ante mantuki Atura-atura agama, sabana naria tesa ntanina ri Buku Nagasa to nanguli iweꞌi: “Tau to najadi nanoa riara mpanggita Alatala ante nomparasaya, iꞌamo to matuwu mabelo sampe ri kasae-saena.” d
12 Tapi to napokona riara Atura-atura agama daꞌa pomparasaya. To napokona matutu matundu riara Atura agama. Sabana riara Buku Nagasa naria nitulisi iweꞌi: “Isema-sema to natutu nantuki Atura-atura agama, iramo to matuwu mabelo.” e
13 Kakonona kita pura-pura masipato rajanjiaka Alatala, sabana kita daꞌa natutu nantuki Atura-aturana. Tapi Kristus nombakabasaka kita nggari pejanjiaka etu, sabana naria tesa riara Buku Nagasa to nanguli iweꞌi: “Isema-sema to namate ri kayu parika, iꞌamo to nijanjiaka Alatala.” f Jadi tempo Kristus namate ri kayu parika Iꞌa nijanjiaka nanjaliku kita.
14 Patuju Yesus Kristus nombawai korona rapatesi iwetu ala rasi to niwai Alatala ka Abraham nggaolu mamala woꞌu rawai ka tau-tau daꞌa to Yahudi to momparasaya Iꞌa. Ante iwetu kita pura-pura mamala rapesua Nosa Nagasa to nijanji Alatala.
Atura-atura agama daꞌa nompakalipo pojanji Alatala ka Abraham
15 Sampesuwu-sampesuwuku, kuala saongu jonjo nggari katuwuta eo-eo. Sura pojanji to niteke manusia daꞌa namala rapakalipo ntau atau nitambai isina.
16 Waꞌa woꞌu ante pojanji Alatala. Iꞌa nombawai pojanjina ka Abraham bo mulina. Riara Buku Nagasa daꞌa nitulisi “bo ka muli-mulimu,” batuana ka muli Abraham to nadea. To nitulisi, “bo ka mulimu,” batuana ka muli Abraham sambaꞌa lau, etumo Kristus.
17 Patujuku iweꞌi: Pojanji Alatala ante Abraham nipakaasa Alatala mboto. Jadi Atura-atura agama to niwai patatu tolumpulu mpae nggapurina daꞌa namala mompakalipo pojanjina ante Abraham sampe pojanji etu mana nalaku. Pojanji Alatala kana madupa pura.
18 Ane rapana Abraham nantarima rasi sabana nantuki Atura-atura agama, etu batuana daꞌa rasi nggari pojanji Alatala, etu aga nggari powiana mboto. Tapi kakonona nggari pojanji etumo sampe Abraham nombarata rasi.
Patuju Atura-atura agama mompakanoto manusia nombaliunaka dota Alatala
19 Jadi ane iwetu nuapa patuju nu Atura-atura agama? Atura-atura agama nitambai nggapurina ala mompakanoto manusia nombaliunaka dota Alatala. Pade Atura-atura etu nalaku sampe karata nu muli Abraham to niboto riara pojanji Alatala ka Abraham nggaolu, etumo Yesus Kristus. Alatala nompakau malaeka-malaekana nanggeni Atura-atura agama ka i Musa to najadi tau ntongo nompapola Atura-atura etu ka manusia.
20 Sambaꞌa tau ntongo niparaluu ane maria robingga. Tapi tempo Alatala nompowia pojanjina ante Abraham, nipowiana njambaꞌana, daꞌa ria malaeka atau tau ntongo.
21 Jadi ane iwetu Atura-atura agama nosisala ante pojanji-pojanji Alatala? Natantumo daꞌa! Sabana ane rapana maria atura-atura to namala ratukita sampe kita mombarata katuwua mabelo sampe ri kasae-saena, etu batuana kita mamala rareke Alatala manoa ante mantuki Atura-atura agama.
22 Tapi tesa to naria riara Buku Nagasa nompakanoto pura-pura manusia batena nasilaka riara mpanggita Alatala. Patujuna ala aga tau to nomparasaya Yesus Kristus to mamala mantarima nuapa to nijanji Alatala, daꞌa tau to natundu riara Atura-atura agama.
Manusia nisoko Atura-atura agama sampe karata Yesus Kristus
23 Tempo nokolu daꞌapa ninjanita momparasaya ka i Pue Yesus, kita danisoko nu Atura-atura agama. Kita ewa niwala sampe marata tempona Alatala mompakanoto ka kita iwenu momparasaya ka i Pue Yesus ala kita mamala majadi manoa riara mpanggitana.
24 Jadi Atura-atura agama etu nasimbayu ewa topanggatono kita sampe karata Kristus ala kita mamala majadi manoa riara mpanggita Alatala ante momparasaya Kristus.
25 Tapi weꞌi-weꞌi kita mana nikatono Atura-atura agama sabana naratamo Kristus pade kita nomparasayamo.
Kita nionggotaka najadi ana nu Alatala
26 Jadi sampesuwu-sampesuwu, komi pura-pura najadi ana nu Alatala sabana komi nomparasaya Yesus Kristus.
27 Komi pura-pura nidiu ewa tandaina komi topomparasaya Kristus. Jadi komi nantarima inggu-inggu Kristus riara nggatuwu komi.
28 Riara mpanggita Alatala mana ria posisalana ri olo ntau to Yahudi bo tau daꞌa to Yahudi, batua bo tau daꞌa batua, langgai bo besi. Kita pura-pura nasimbayu riara mpanggitana sabana kita nosaongu rara ante Yesus Kristus.
29 Jadi ane komi bagia Kristus, komi woꞌu muli Abraham. Pade masipato komi mantarima nuapa to nijanji Alatala ka Abraham.