4
To nipatujuku iweꞌi: Rapana maria sambaꞌa muli ntau nasugi. Tempo iꞌa danangana katuwuna nasimbayu ante sambaꞌa batua, naupa iꞌa to masipato mantarima pura-pura kakalumana nu umana banepia.
2 Iꞌa nasimbayu ewa batua sabana iꞌa nikatono ntau to nipakatantu umana, bo kakalumanana niurusi ntau to nipakakuasa sampe marata tempona to nipakatantu umana.
3 Iwetu woꞌu ante kita. Katuwuta nokolu nasimbayu ewa katuwu ngana. Kita batena nisoko nu ada-ada bo atura-atura to naria riara dunia eꞌi.
4 Tapi sangga naratamo tempo to nipakatantu Alatala, Iꞌa nombasuro Anana marata ri dunia. Anana etu nipoanaka sambaꞌa besi, pade Iꞌa natundu riara Atura-atura agama.
5 Iꞌa nisuro Alatala manggabasaka kita to nisoko Atura-atura agama, ala kita mamala raonggotaka majadi ana nu Alatala.
6 Alatala nompopanaꞌu Nosa Nagasa nu Anana riara ntaꞌita sabana kita najadi anana. Pade nggari pekeniaka Nosa Nagasa riara ntaꞌita kita nanguli ka Alatala, “O, Yuma, Komi Umaku!”
7 Jadi sampesuwu-sampesuwu, komi mana najadi batua, tapi komi najadi ana nu Alatala. Pade ane komi anana, natantumo komi masipato woꞌu mantarima pura-pura nuapa to nipakasadiana ka anana.
Kakini rara Paulus mompekiri to Galatia
8 Nokolu tempo komi daꞌapa nangginjani Alatala, komi najadi batua nu pue-pue ntanina to nireke komi Alatala, tapi kakonona daꞌa ntoto Alatala.
9 Tapi weꞌi-weꞌi komi nangginjani Alatala--atau nabelopa rauli Alatala nangginjani komi. Jadi nokuya komi madota manjili manjoko ada-ada bo atura-atura to daꞌa nakuasa mantulungi komi majadi manoa riara mpanggita Alatala? Nokuya komi madota matundu bali riara ada-ada bo atura-atura etu?
10 Nokuya komi nantora eo-eo mpopali, wula-wula to natantu, tempo-tempo ntanina to natantu bo mpae-mpae to nipakatantu riara Atura-atura agama?
11 Nakini mpuꞌu raraku neꞌe-neꞌe daꞌa ria gunana katiti nu iniku nompatuduki komi bopia!
12 Sampesuwu-sampesuwu, aku merapi ante mpuꞌu-mpuꞌu raraku ala komi mompasiala pokaingguku. Sabana naupa aku tau to Yahudi aku mana mantuki ada-ada nto Yahudi ala majadi nasimbayu ewa komi tau daꞌa to Yahudi.
Tempo aku nosanggani ante komi daꞌa sanggani komi nowia sala ri jaꞌiku.
13 Ninjani komi mbotomo pamulana aku nompatolele Kareba Belo ka komi sabana aku najuꞌa.
14 Tapi naupa juꞌaku etu nompakarunggu rara komi, aku daꞌa ntoto nipoara komi atau niporau rara komi. Tapi aku nitarima komi ewa malaeka Alatala, atau ewa Yesus Kristus mboto.
15 Tempo etu nasana mpuꞌu rara komi ri jaꞌiku. Tapi weꞌi-weꞌi nokuya komi mana nasana rara ri jaꞌiku? Nakono mpuꞌu tesaku eꞌi! Bopia komi mpuꞌu-mpuꞌu nasadia mantulungi aku. Ane namala nau mata komi mboto rasuꞌi rawai ka aku.
16 Tapi iwenumo weꞌi-weꞌi? Aku nireke komi balimu sabana aku nantesa ka komi nuapa to nakonona?
17 Tau-tau ntanina etu nompasimbuku ante mpuꞌu-mpuꞌu mangala rara komi, tapi patuju ira daꞌa nabelo. Ira aga madota mompopogaꞌa komi ante aku ala komi mpuꞌu-mpuꞌu mantuki ira.
18 Kakonona nabelo ane tau nompasimbuku ante mpuꞌu-mpuꞌu mangala rarata. To napokona patuju ira kana mabelo. Waꞌa woꞌu aku, pade daꞌa aga tempo aku nosanggani ante komi.
19 Ana-anaku to nipotoweku, nasimbayu ewa sambaꞌa besi nandasa mpuꞌu tempo noana, iwetu woꞌu aku nandasa nompekiri komi. Pade aku kana mandasa iwetu sampe inggu Kristus mpuꞌu-mpuꞌu naria nikita riara nggatuwu komi.
20 Aku mpuꞌu-mpuꞌu madota mosanggani-nggani ante komi weꞌi-weꞌi ala aku mamala mombabali suaraku to naroꞌo majadi suara nalente, sabana nasudumo raraku mompekiri komi!
Tesa Hagar bo Sara
21 Umba komi to madota matundu riara Atura-atura agama ala majadi manoa riara mpanggita Alatala! Iwenu? Daꞌa nanoto ka komi nuapa to naria riara Atura-atura agama?
22 Ri setu nitulisi naria rombaꞌa ana Abraham, sambaꞌa nipoanaka i Hagar, besi to najadi batua, bo sambaꞌapa nipoanaka i Sara, rongo Abraham to daꞌa najadi batua.
23 Ana nu besi to najadi batua nipoanaka nantuki dota manusia. Tapi ana nu besi to daꞌa najadi batua nipoanaka nantuki pojanji Alatala ka Abraham.
24-25 Tesa eꞌi najadi sangele porapa ka kita. Rombaꞌa besi etu nirapaka ewa rongele pojanji. Hagar nirapaka ewa pojanji to niwai Alatala ka i Musa ri bunggu Bulu Sinai ri tana Arab. Iꞌa nirapaka ewa tau to nantuki Atura-atura agama ala mompasimbuku majadi manoa riara mpanggita Alatala. Sabana pura-pura tau to nompasimbuku mantuki Atura-atura agama natuwu ewa batua. Ira natundu riara Atura-atura etu nasimbayu ewa sambaꞌa batua natundu ri jaꞌi madikana. Pade i Hagar namala woꞌu nirapaka ewa ngata Yerusalem ri dunia eꞌi, sabana pue ngata Yerusalem natuwu ewa batua. Ira aga natundu riara Atura-atura agama.
26 Tapi i Sara nirapaka ewa Yerusalem ri suruga. Iꞌa namala nirapaka ewa tau to nomparasaya Alatala ala majadi manoa riara mpanggitana. Sara etu to nipoindota sabana kita daꞌa nipobatua Atura-atura agama nasimbayu ewa i Sara daꞌa najadi batua.
27 Pamulana i Sara nagampa, tapi kaopuna iꞌa noana ka sambaꞌa ngana nantuki pojanji Alatala ka Abraham. Etu nasimbayu ewa tesa to nitulisi riara Buku Nagasa iweꞌi:
“Kana madamba-damba
besi to nagampa, to daꞌa sanggani noana.
Kana meliu nggadamba,
komi to daꞌa sanggani nombarasai juꞌa mpoana,
sabana besi to nipalasi rongona kana meliu nggadea anana
nggari besi to naria rongona.” (Yes. 54:1)
28 Sampesuwu-sampesuwu, nasimbayu ewa Ishak to nipoanaka nantuki pojanji Alatala, komi woꞌu najadi ana-ana Alatala nantuki pojanjina.
29 Tapi tempo nggaolu Ismael, to nipoanaka nantuki dota manusia, nompandasa tuaꞌina Ishak to nipoanaka nantuki dota Nosa Nagasa nu Alatala. Iwetu woꞌu weꞌi-weꞌi, kita to nanjarumaka pojanji Alatala nipandasa ntau to nipobatua Atura-atura agama.
30 Tapi nuapa to niuli riara Buku Nagasa? “Popalaimo besi to najadi batua etu ante anana, sabana anana etu daꞌa mamala mombarata bagia nggari kakalumana umana nosanggani-nggani ante ana to nipoanaka besi to daꞌa najadi batua.” a
31 Jadi sampesuwu-sampesuwu, kita daꞌa nasimbayu ewa ana nu besi to najadi batua. Kita nasimbayu ewa ana nu besi to daꞌa najadi batua, sabana kita daꞌa nipobatua Atura-atura agama, tapi kita nomparasaya pojanji Alatala.