POKAINGGU TO MASIPATO KA TOPOMPARASAYA I PUE YESUS (5:1-6:18)
Neꞌe rapobatua Atura-atura agama
5
Kristus nanggabasaka kita nggari Atura-atura agama ala kita mpuꞌu-mpuꞌu makabasaka. Jadi pakaroomo rara komi ala komi batena makabasaka. Neꞌe mana madota rapobatua.
2 Toramo! Aku, Paulus, nanguli ka komi, ane komi mompasimbuku majadi manoa riara mpanggita Alatala ante rasuna nantuki Atura-atura agama Yahudi, etu batuana Kristus daꞌa ntoto ria gunana ka komi!
3 Sangganipa kupopatora ka komi to madota rasuna, komi kana masipato mantuki pura-pura Atura agama ntanina woꞌu.
4 Ane komi mompasimbuku majadi manoa riara mpanggita Alatala ante mantuki Atura-atura agama, nogaꞌamo komi nggari jaꞌi Kristus. Nakawaomo komi nggari towe belo nu Alatala.
5 Tapi sampesuwu-sampesuwu, ante petulungi Nosa Nagasa nu Alatala kita nanjarumaka majadi manoa riara mpanggita Alatala ante momparasaya i Pue Yesus. Pade etumo to nipopeata ante mpuꞌu-mpuꞌu rarata.
6 Ane kita nosaongu rara ante Yesus Kristus, daꞌa ria posisalana ane kita nisuna atau daꞌa nisuna. To napokona, momparasaya i Pue Yesus. Pade pomparasayata kana rapopokitata ante mompotowe tau ntanina.
7 Bopia pomparasaya komi nantambai eo nantambai naroso. Jadi iwenu sampe weꞌi-weꞌi komi mana madota mantuki pepatuduki to nakonona? Isema to nombalawa komi?
8 Natantumo powia ira etu daꞌa nggari Alatala to nompokio komi majadi todeana!
9 Pepatuduki ira to nasalana etu nasimbayu ewa ragi, sabana nau aga sakedi lau ragi rapake, pura-pura gando to rapowia roti kana mebombo.
10 Tapi niparasayaku komi daꞌa mantuki pepatuduki ntanina, sabana kita nosaongu rara ante i Pue. Pade niparasayaku isema-sema to nompakagado pekiri komi kana rapawela pesuku Alatala.
11 Sampesuwu-sampesuwu, naria tau to nanguli aku mboto danompatuduki ada mposuna kana ratuki ala majadi manoa riara mpanggita Alatala. Tapi tesa ira etu daꞌa ntoto nakono! Sabana ane aku danompatuduki iwetu, natantumo aku mana rapandasa ntau to Yahudi! Ane aku danompatuduki iwetu, pepatudukiku ewa kamate i Pue Yesus ri kayu parika mana mompakajuꞌa rara ira to Yahudi!
12 Agina tau-tau to nompakagado pekiri komi etu manggabiri koro ira mboto!
Neꞌe mantuki dota rara to najaꞌa tapi tukimo dota Nosa Nagasa
13 Sampesuwu-sampesuwu, komi nipokio Alatala ala rakabasaka nggari Atura-atura agama. Tapi neꞌe sampe etu majadi loga ka komi mantuki mpengele-ngele dota rara to najaꞌa. Tapi komi kana mosipotowe sambaꞌa bo sambaꞌa bo mositulungi,
14 sabana pura-pura Atura agama nesua riara parenta to nanguli iweꞌi: “Potowemo sanggamanusiamu ewa komi nompotowe koromu mboto.” a
15 Tapi ane komi mosinggarau bo mosipojuꞌa ka rara, pakabelo-belo. Neꞌe sampe komi mosipakaropu pomparasaya!
16 Patujuku iweꞌi: Komi kana matuwu mantuki dota Nosa Nagasa nu Alatala. Neꞌe aga matuwu mantuki dota rara to najaꞌa.
17 Sabana dota rara najaꞌa nangewa dota Nosa Nagasa, bo dota Nosa Nagasa nangewa dota rara to najaꞌa. Rongele etu nosiewa sampe komi daꞌa namala manggawia nuapa to nipodota komi mboto.
18 Tapi ane komi nikeniaka Nosa Nagasa nu Alatala, komi daꞌa natundu riara Atura-atura agama.
19 Nanotomo pokainggu ntau to nantuki dota rara to najaꞌa. Jonjona, iweꞌi: Ira nogau sala ante tau daꞌa rongo ira mboto, ira nowia to natantoru bo daꞌa nasipato.
20 Ira nepue ka pue-pue ntanina bo ira nombadoti tau ntanina. Ira nosipobali ante tau ntanina, ira nosibaga, ira nasiriati, ira nasasinta narau bo ira aga nompekiri koro ira mboto. Ira aga nangelo posinggarau sampe nosinjabingga.
21 Ira naino ka mbara-mbara ntau, ira nalangu-langu bo nasiromu nanggoni mpebasa, pade nadea woꞌu pokainggu ira ntanina ewa etu. Jadi ewa to niuliku ka komi bopia, sangganipa kupopatora ka komi, tau tunggai noinggu iwetu daꞌa ntoto mamala majadi todea riara Poparenta nu Alatala.
22 Tapi ane tau-tau to nikeniaka Nosa Nagasa nu Alatala, iweꞌimo inggu ira: Ira nosipotowe, ira nadamba-damba bo nasana rara. Ira nosabara bo nalusu bo nabelo rara ante tau ntanina. Ira namala raparasaya,
23 ira naede rara, pade ira nantaꞌamaka dota koro ira mboto. Daꞌa ria Atura-atura agama to nombatagi pokainggu-pokainggu ewa etu.
24 Isema-sema to nosaongu rara ante Kristus nompakalipo inggu-ingguna to najaꞌa bo dota rarana to najaꞌa bo dota rarana to daꞌa namala nipampa.
25 Ane kita nosaongu rara ante Nosa Nagasa nu Alatala masipato kita matuwu mantuki dota Nosa Nagasa etu woꞌu.
26 Neꞌe kita malanga rara atau mosipojuꞌa ka rara, bo neꞌe kita masiriati sambaꞌa bo sambaꞌa.