Neꞌe mabasa-basa mompowia to nabelona
6
Sampesuwu-sampesuwu, ane komi manggita roamu mompowia silaka, komi to natuwu nantuki Nosa Nagasa nu Alatala kana manggeni iꞌa manjili ri jala to nakonona. Tapi kawiamo etu ante nalusu rara, bo mainga ala neꞌe sampe komi woꞌu mawela pesoba.
2 Positulungimo komi sambaꞌa bo sambaꞌa ala ante iwetu komi mantuki parenta Kristus.
3 Ane sambaꞌa tau nompekiri koronapa neliu nggabelo nggari roana, tanusi daꞌa, iꞌa aga nombabagiu korona mboto.
4 Tapi nabelopa butu-butu mbaꞌa momparesa pokaingguna mboto ala manggita ane etu nabelo atau daꞌa. Ane pokaingguna nabelo, mamala iꞌa madamba-damba mompekiri etu. Tapi neꞌe iꞌa mompoposisala pokaingguna etu ante pokainggu tau ntanina,
5 sabana butu-butu mbaꞌa kana mombatanggu pokaingguna mboto.
6 Komi to nipatuduki Tesa nu Alatala masipato mantulungi tau to nompatuduki komi ante mombabagi ka iꞌa nuapa-nuapa to nabelona to naria ri jaꞌimu.
7 Sampesuwu-sampesuwu, neꞌe sampe komi rabagiu! Alatala daꞌa namala rapongei-ngei! Nuapa to nituja, etu woꞌu to rakato.
8 Batuana ane pokainggu ntau aga nantuki dota rara to najaꞌa, iꞌa kana mamate bo rapopogaꞌa nggari jaꞌi Alatala sampe ri kasae-saena. Tapi ane pokaingguna nantuki dota Nosa Nagasa nu Alatala, iꞌa kana mombarata katuwua mabelo sampe ri kasae-saena nggari jaꞌi Nosa Nagasa etu.
9 Sabana etu, neꞌe kita mabasa-basa mompowia to nabelona, sabana ane kita daꞌa menonto mompowia to nabelona, sanggani tempo kita kana mantarima aselena.
10 Jadi tempo danaria loga kita kana mompowia to nabelona ka pura-pura tau, neliu-liupa ka roa-roata topomparasaya.
Popatora kaopuna bo petabe
11 Kitamo, sampesuwu-sampesuwu, aku mboto mantulisi bagia sura eꞌi ante paleku mboto! Nikita komi iwenu kabete nu huruf-huruf to nipakeku!
12 Tau-tau to madota mompasuꞌu komi rasuna, kakonona aga miki ratoiya ntau to Yahudi ante mompopokita ira mantuki Atura-atura agama. Tapi patuju ira ala neꞌe rapandasa ntau to Yahudi, sabana ira mboto nomparasaya kamate Kristus ri kayu parika.
13 Kakonona, ira mboto, to nantuki ada mposuna, daꞌa natutu nantuki pura-pura Atura agama. Ira aga madota ala komi rasuna ala ira mamala mompakalanga koro ira sabana komi mantuki parenta ira etu.
14 Tapi aku daꞌa ntoto madota mompakalanga koroku mboto. Aku aga madota mompakalanga Pueta Yesus Kristus to namate ri kayu parika. Nggari kamatena nanotomo ka aku daꞌa ria nuapa-nuapa riara dunia to namala mompakanoa aku riara mpanggita Alatala. Jadi aku nanggabasaka pura-pura nuapa ri dunia to nisarumakaku bopia, pade aku aga manjarumaka i Pue Yesus.
15 Sabana nisuna atau daꞌa nisuna daꞌa napoko. To napokona majadi manusia nabou ante momparasaya i Pue Yesus.
16 Perapi Pue Alatala mompopokita asi matana bo mombawai katuwua mabelo ka tau-tau to natuwu nantuki pepatuduki eꞌi, pade ka pura-pura todeana ntanina.
17 Jadi nompamula weꞌi-weꞌi, neꞌe mana maria tau mompakasusa aku, sabana walea bela-bela ri koroku najadi tandaina aku batua i Pue Yesus.
18 Sampesuwu-sampesuwu, perapi towe belo nggari jaꞌi Pueta Yesus Kristus mosanggani-nggani ante komi. Amin!
Tabe nggari jaꞌiku,
Paulus