SURA PAULUS KA TOPOMPARASAYA RI NGATA
KOLOSE
Petabe
1
Sura eꞌi nggari jaꞌiku i Paulus, to nionggotaka najadi suro Yesus Kristus nantuki dota Alatala, pade nggari jaꞌi Timotius, sampesuwuta topomparasaya,
2 ka topomparasaya ri ngata Kolose to naroo nomparasaya bo nosaongu rara ante Kristus. Perapi Umata Pue Alatala mombagane bo mombawai katuwua mabelo ka komi.
Paulus nanguli tarima kasi ka Alatala
3 Butu nggani kami nomposambaya komi daꞌa nenonto kami nanguli tarima kasi ka Pue Alatala, Uma nu Pueta Yesus Kristus,
4 sabana niepe kami komi nomparasaya Yesus Kristus pade nompotowe pura-pura todea topomparasaya.
5 Etu nipowia komi sabana komi bate-batena nanjarumaka rasi bo belo to nipakasadia Alatala ka komi ri suruga. Pura-pura etu niepe komi mamimo tempo tesa to nakonona nipatolele ka komi bopia, etumo Kareba Belo.
6 Kareba Belo etu natolele sampe ri umba-umba ri dunia pade noasele riara nggatuwu tau-tau to nomparasaya tesa etu. Pade nantambaimo kadea ntau to nomparasayana. Etu nasimbayu ewa to najadi ante komi. Tempo komi nangepe Kareba Belo niparasaya komimo sampe komi mpuꞌu-mpuꞌu nombarasai towe belo nu Alatala.
7 Kareba Belo etu niepe komi nggari jaꞌi Epafras, roa sampokarajaa to nipotowe kami. Iꞌa sambaꞌa batua Kristus to natutu nantulungi komi.
8 Iꞌamo to nanguli ka kami iwenu komi nosipotowe sambaꞌa bo sambaꞌa ante pekeniaka Nosa Nagasa nu Alatala.
Paulus nomposambaya to Kolose
9 Jadi nompamula nggari tempo kami nangepe lele etu daꞌa nenonto kami nosambaya ka komi. Kami batena nerapi ka Pue Alatala ala komi rawai noto bo pangginjani nggari jaꞌi Nosa Nagasana sampe komi mamala mangginjani pura-pura dota Alatala ka komi.
10 Ante iwetu komi mamala matuwu ante pokainggu to masipato ka topomparasaya i Pue pade tunggai mompakadamba rarana. Komi mamala mompowia mpengele-ngele powia to nabelona pade mantambai eona mantambai mosinjani belo ante Alatala.
11 Kami nerapi ala Pue Alatala mompakaroso komi ante kuasana to nipogumaa sampe komi mompakule mantaꞌamaka ante mosabara tempo nipandasa,
12 pade mosukuru ri jaꞌi Umata Pue Alatala ante madamba rara. Sabana Iꞌamo to nompowia komi masipato mombarata bagia nggari pura-pura nuapa to nipakasadiana ka todeana riara Poparentana to nareme.
13 Iꞌamo to nanggabasaka kita nggari kuasa karumauna pade nanggeni kita majadi todea riara Poparenta nu Anana to nipotowena.
14 Nggari Anana etu kita nitolo, etumo silaka-silakata niampungimo.
Kristus to neliu nggakuasa
15 Kristus nasimbayu ntoto ewa Alatala to daꞌa namala nikita lenjena. Iꞌamo to nireke Ana Ulumbua sabana kuasana neliu nggabete nggari pura-pura to nipajadi.
16 Nggari Iꞌamo pura-pura nuapa to naria ri langi bo dunia nipajadi, nabeloka to namala nikita, nabeloka anu daꞌa namala nikita, nabeloka malaeka-malaeka i Pue, nabeloka karampua-karampua, nabeloka seta-seta, nabeloka pue-pue ntanina. Pura-pura nuapa to naria nipajadi Kristus ala mombabila bo mompakabete Iꞌa.
17 Kristus naria mamimo tempo daꞌapa naria nuapa-nuapa ri langi bo dunia. Pade Iꞌa nombakuasai bo nanggeniaka pura-pura etu.
18 Pade Iꞌa woꞌu balengga nu todea topomparasaya to namala nipakasimbayu ewa korona mboto. Iꞌamo puꞌu katuwua todeana etu. Iꞌamo to niuli Ana Ulumbua, etumo to pamulana natuwu bali nggari kamatena, ala manoto Iꞌamo to neliu nggakuasa nggari pura-pura nuapa to naria ri langi bo dunia.
19 Sabana to nipodota Alatala ala pura-pura ingguna bo kuasana maria woꞌu ri jaꞌi Anana.
20 Pade dota Alatala woꞌu ala nggari Anana etu pura-pura nuapa to nipajadi mamala rapoposinggabelo bali ante Iꞌa, nabeloka to naria ri dunia, nabeloka to naria ri langi. Pura-pura etu nipoposinggabelo bali ante Alatala nggari lei Kristus to natiti tempo Iꞌa namate nipaku ri kayu parika.
21 Bopia komi woꞌu natuwu nakawao nggari jaꞌi Alatala. Komi najadi bali nu Alatala sabana pekirimu bo pokainggumu najaꞌa.
22 Tapi weꞌi-weꞌi ante kamate nu Anana mboto, komi nipoposinggabelo bali ante Alatala. Patujuna ala mompakagasa komi sampe mana ria sala bara kakura komi riara mpanggitana.
23 Etu kana majadi ane komi maroo momparasaya bo maroso mantuki i Pue ante daꞌa molengga-lengga pade daꞌa menonto manjarumaka pojanji-pojanji Alatala to niepe komi riara Kareba Belo. Kareba etu nipatolele sampe ri njumaongu dunia. Pade aku woꞌu, i Paulus, nionggotaka najadi topompatolele Kareba etu.
Powia Paulus mantulungi topomparasaya
24 Jadi sampesuwu-sampesuwu, weꞌi-weꞌi nadambamo raraku nombarasai kasusa bo kapari sabana pokarajaaku mantulungi komi. Ante nombarasai kasusa bo kapari riara koroku mboto aku mompakagana kasusa bo kapari to nipakatantu Kristus ka aku riara pokarajaaku mantulungi todea topomparasaya, etumo ira to najadi ewa koro Kristus mboto.
25 Aku najadi topantulungi todea topomparasaya sabana aku nionggotaka Alatala mantui bago to niparasayana ka aku, etumo mompasimbayu pura-pura Tesa nu Alatala ka komi.
26 Riara Tesa etu nipakanoto nia Alatala to nitabuniaka nggari njobu-njobu mpae naliu tapi weꞌi-weꞌi nipopanjanina ka todea topomparasaya Iꞌa.
27 Iꞌa madota mompopanjani ka ira niana to neliu nggabelo ka pura-pura manusia ri dunia. Niana etu iweꞌi: Kristus kana matuwu riara ntaꞌi komi sampe natantumo komi mombarata bagia riara kuasa bo kagaya nu Alatala to nipogumaa.
28 Jadi Kareba Kristus etumo to nipatolele kami ka pura-pura tau nantuki noto to naria ria jaꞌi kami. Kami nantewai bo nompatuduki ira pura-pura ala kami mamala manggeni ira mantingayo Alatala ante daꞌa maria kakura nuapa-nuapa sabana ira nosaongu rara ante Kristus.
29 Etu sampe aku nokarajaa ntomo. Aku mpuꞌu-mpuꞌu nompasimbuku ante kuasa nggari jaꞌi Kristus to nokarajaa riara ntaꞌiku ante naroso.